Albistea entzun

Espainiako Gorteetarako hauteskundeak. Gipuzkoa

Abertzaleak gailendu dira, EAJk eta EH Bilduk bina diputatu lortuta

EAJk berreskuratu du lehen tokia, eta emaitza onenak ditu 1982tik. Elkarrekin Podemosek hiru boto emailetik bat galdu du. Hori eta parte hartze handia alde izan dute alderdi abertzaleek eta PSE-EEk

EH Bilduko Gipuzkoako diputatu Mertxe Aizpurua eta Oskar Matute Bizkaikoa, Donostian, atzo.
EH Bilduko Gipuzkoako diputatu Mertxe Aizpurua eta Oskar Matute Bizkaikoa, Donostian, atzo. J. C. R.UIZ / FOKU Tamaina handiagoan ikusi

Jokin Sagarzazu -

2019ko apirilak 29 - Donostia

Espainiako Gorteetarako hauteskundeetan ere boto emaileak mobilizatzeko gaitasuna erakutsi dute alderdi abertzaleek. Gipuzkoarrek lehenetsi egin dituzte Espainiako gobernabidean eragin dezaketen alderdiak, goberna dezaketenen alde egin beharrean. EAJk irabazi ditu bozak, eta EH Bildu izan da bigarren indarra. Duela hiru urte, bigarren eta hirugarren izan ziren, hurrenez hurren; Elkarrekin Podemos lehenengoa izan zen. EAJk eutsi egin dio diputatu kopuruari, baina gora egin du: 6 puntu eta 31.000 boto gehiago. Jarraian, EH Bildu: duela hiru urte galdutako diputatua berreskuratu du, Elkarrekin Podemosen kaltetan. Senatari guztiak abertzaleak izango dira: hiru EAJkoak eta bat EH Bildukoa.

Parte hartze handiak eta Elkarrekin Podemosen beherakadak baldintzatu ditu lurraldeko emaitzak: hiru boto emailetik bat galdu du alderdi horrek. 2015eko eta 2016ko bozetan gailendu zen, eta kolpea hartu du: 11 puntu eta 35.000 boto gutxiago, duela hiru urteko emaitzekin alderatuta. Orduan, bi diputatu lortu zituen; orain, bakarra. Eserlekua lortu duen azkeneko indarra izan da.

Galera horrek mesede egin die beste denei: EH Bilduk eta PSE-EEk ere gora egin dute, eta biek ere aurrea hartu diote Elkarrekin Podemosi. EH Bilduk 4 puntu eta 24.000 boto gehiago lortu ditu. Sozialistek eutsi egin diote diputatu bakarrari, baina gora eginez: 4 puntu eta 23.000 boto gehiago.

EAJk emaitza onenak ditu 1982. urtetik (125.000 boto). 2004tik ez zuen gainditzen 100.000 botoen langa. EH Bilduren erreferentziak azkenengo bozak eta 2011n Amaiurrek lortutakoak ziren. 2016koak zituen txarrenak, eta horiek eta 2015ekoak (81.200 boto; %21) hobetu ditu, baina 2011koetatik urrun geratu da: orduan botoen 130.000 boto lortu zituen (%35).

PSE-EEk alde izan du haizea, eta azken urteetako odolustea gelditzea lortu du. Ez hain aspaldikoak, hau da, 2008koak ditu lurraldean inoiz lortu dituen emaitza onenak: botoen %40.

Espainiako eskuinak ez du ordezkaritzarik lortu Gipuzkoan. Ez zuten aulkirik eskuratu aurreko bozetan ere, eta, ehunekoetan, gainera, pisua galdu dute: PPk eta Ciudadanosek botoen %13 lortu zituzten 2016an, eta orain, Vox ere gehituta, %10 eskas.

Mobilizazio handia

Parte hartze handiak ere eragin du emaitzetan. Inoizko handiena izan da herrialdean, lehenengo bozak —1977. urtekoak— eta 1982koak kenduta: horietan bietan ere jeltzaleak izan ziren garaile. 2016koetan txikienetan hirugarrena izan zen parte hartzea.

Gipuzkoako herri nagusiei dagokienez, EAJ buru izan da Donostian, Zarautzen, Arrasaten, Tolosan eta Hondarribian; PSE-EE Irunen, Errenterian, Eibarren, Lasarte-Orian; eta EH Bildu Hernanin.

Hego Euskal Herriko emaitzak

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

PSNk atea itxi dio Mañeru eremu mistoan sartzeari

Berria

Etzi bozkatuko dute proposamena parlamentuan. Alzorrizek esan du ez dela gaiaz «hitz egiteko garaia»
Odon Elorza, 2021eko urtarrilaren 22an egindako agerraldi batean. ©Gorka Rubio / Foku

Odon Elorzak dimisioa eman du diputatu gisa

Jon O. Urain

Donostiako alkate ohiak aitortu du PSOEko zuzendaritzarekin «desadostasunak» saihesteko hartu duela erabakia. 11 urte egin ditu Espainiako Kongresuan.

Onintze Oleaga eta Unai Urruzuno, otsailaren 11ko topaketa aurkezten. ©/ EH Bildu

EH Bilduk jardunaldi munizipalistak egingo ditu otsailaren 11n

Jon O. Urain

Bost erronkaren inguruan ariko dira, eta indar subiranistak saio horrekin abiatuko du udal hauteskundeetako kanpaina.

Maria Txibite Nafarroako Gobernuko lehendakaria eta Ramon Alzorriz, PSNko bozeramailea, Nafarroako Parlamentuan. ©JESUS DIGES / EFE

PSNk atea itxi dio Mañeru eremu mistoan sartzeari

Xabier Martin

Jakina zen Navarra Sumak ezezkoa emango ziola Euskararen Legea aldatzeko proposamenari, eta, orain, PSNk iragarri du harekin batera bozkatuko duela, Mañeru ez dadin sar eremu mistoan.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...