Albistea entzun

Koronabirusa

Astebetean %27 handitu da positibo kopurua Hego Euskal Herrian

Azken zazpi egunetan 1.193 kasu detektatu dituzte. Ospitaleratutako gaixo kopurua %32 handitu da epe berean: 128 eri daude gaitzarekin
PCR probak, Gasteizko Txagorritxu ospitaleko laborategi batean.
PCR probak, Gasteizko Txagorritxu ospitaleko laborategi batean. G.RUBIO / FOKU Tamaina handiagoan ikusi

Edurne Begiristain -

2021eko urriak 26

Eusko Jaurlaritzako eta Nafarroako Gobernuko osasun agintariek egunak daramatzate ohartarazten COVID-19aren izurriaren bilakaera okertzen ari dela. Atzo, bi gobernuetako osasun departamentuek eman zituzten datuek berretsi egin zuten joera hori: pandemiaren bilakaera neurtzeko adierazle askotan antzeman daiteke egoeraren makurtzea. Kutsatuen kurba, adibidez, goraka doa. Osakidetzak eta Osasunbideak atzo emandako datuen arabera, azken zazpi egunetan 1.193 positibo atzeman dituzte Hegoaldean. Hilaren 18tik 24ra bitarteko epeari dagokio kutsatu kopuru hori. Datuok argiki islatzen dute koska bat gora egin dutela kutsatzeek aurreko astearekin alderatuta. Zehazki, %27 handituda positibo kopurua hilaren 11tik 17ra bitartean 939 kasu atzeman zituzten.

Eusko Jaurlaritzako Osasun Sailak astean behin jakinarazten ditu birusaren transmisioari buruzko datuak, eta atzo izan zen gaitzaren bilakaerari argazkia ateratzeko egunik egokiena. Izan ere, Osakidetzak Arabako, Bizkaiko eta Gipuzkoako datuen asteko txostena plazaratu zuen. Emandako datuen arabera, igandean 112 positibo detektatu zituzten, egindako testen %4,7. Lurraldeka aztertuz gero, Araban bederatzi kasu detektatu zituzten, Bizkaian 41, eta Gipuzkoan 62. Nafarroan, berriz, 27 positibo atzeman zituzten, egindako test diagnostikoen %3,2. Hegoaldeko positibo tasa, beraz, %4,2 da. OME Osasunaren Mundu Erakundeak %5eko langa du zehaztua pandemia kontrolpean edukitzeko gehienezko muga gisan, eta kopuru horretara gerturatzen ari da Hegoaldeko positibo tasa.

Azken hiru asteetan, transmisioari buruzko grafikoetan aski argi ikus daiteke kutsatzeek lau herrialdeetan izandako goranzko joera. Azken hamalau eguneko positibo berrien batezbestekoari erreparatuta ere, argi ikusten da goranzko joera hori: atzo, hamalau eguneko batezbestekoa 151 positibo zen Hegoaldean, eta urriaren 18an, berriz, batezbesteko hori 123 zen.

Ospitaleak, beteago

Birusaren transmisioarekin lotutako datuetan ez ezik, ospitaleetako egoeran ere atzeman da okertzea. Atzo emandako datuen arabera, Hego Euskal Herriko erietxeetan 128 pertsona daude COVID-19ak jota; horietako 32, ZIUetan. Duela astebete, urriaren 18an, 97 pertsona zeuden erietxeraturik gaitzak jota. Gaixo kopurua %32 handitu da azken zazpi egunetan, horrenbestez. ZIUetako egoerak, ordea, egonkor jarraitzen du.

Gaitzaren ondorioz hildakoen kopuruari erreparatuta ere, okertzea sumatzen da: azken zazpi egunetan 24 pertsona zendu dira, aurreko astean baino lau gehiago.

Izurriaren bilakaerarekin «kezka» agertu zuen atzo Gotzone Sagardui Eusko Jaurlaritzako Osasun sailburuak. Olatu berri baten atarian ote gauden esatera ez zen ausartu Sagardui, baina ohartarazi zuen «erne eta tentuz» ibiltzea ezinbestekoa dela halakorik gerta ez dadin. Santos Indurain Nafarroako Osasun kontseilariak, berriz, «harreman sozialen areagotzeari» egotzi zion intzidentziaren gorakada.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Euskaraz ikasteko eskubidea aldarrikatu zuten atzo NUPeko Euskara Taldeko kideek. ©NUP-EKO EUSKARA TALDEA

Euskararen eguna: Txibiteren agendan ageri ez den ospakizuna

Ion Orzaiz

Euskararen Nazioarteko Eguna «ospatzera» deitu du Ana Ollo kontseilariak (Geroa Bai), baina gobernuak ez du ekitaldi ofizialik prestatu
<b>Mahai ingurua.</b> Ezkerretik, Lander Muñagorri, Ihintza Ostolaza eta Joseba Ibarretxe. ©ARITZ LOIOLA / FOKU

Bolumena igo, ertzetan ere entzun dadin

Gotzon Hermosilla

Eremu erdaldunetako gazteei euskararen eta euskal kulturaren transmisioa nola bermatu aztertu dute jardunaldi batean. Zenbait adituk esan dute periferia, arazoa baino gehiago, «irtenbidea» izan daitekeela
<em>Batuz aldatu</em>-ren aurkezpena, aurtengo ekainean. ©JON URBE / FOKU

Hizkuntza politiketan eragiteko prest

Berria

Ia urte erdia pasatu da eremu askotako ia ehun eragilek adostutako 'Batuz aldatu' dokumentua aurkeztu zutenetik. Euskara eroso erabiltzeko baldintzak sortzea du helburu egitasmoak. Arloz arloko lanketari ekingo diote 2022an.
Maiatzean Baionan murgiltze ereduaren alde egindako protesta. ©BOB EDME

Murgiltze eredua, erabateko dilindan

Berria

Frantziako Konstituzio Batzordeak hizkuntza gutxituen aldeko legearen zenbait artikulu atzera bota izanak kezka eragin du aurten. Eragileek konstituzioa aldatzeko eskatzen dute.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.