Albistea entzun

Kontratu «egonkorrak» galdegin dituzte Osakidetzako egoiliarrentzat

Legebiltzarrak Osasun Sailari eskatu dio «erakargarriak» egiteko lehen arretako lan baldintzak
Rebeka Ubera EH Bilduko legebiltzarkidea, artxiboko irudi batean.
Rebeka Ubera EH Bilduko legebiltzarkidea, artxiboko irudi batean. RAUL BOGAJO/ FOKU Tamaina handiagoan ikusi

Edurne Begiristain -

2022ko ekainak 24 - Gasteiz

Osakidetzako lehen arretako egoiliarren lan baldintzak hizpide izan zituzten atzo Eusko Legebiltzarreko osoko bilkuran. Egoiliarren kontratazio eredua aldatzeko proposamena eraman zuten EH Bilduk eta Elkarrekin Podemos-IUk eztabaidara, baina ekinbidea bertan behera geratu zen, babes faltagatik. Haren ordez, EAJk, PSE-EEk eta PP-C's-k hitzartutako testuak egin zuen aurrera, Voxen babesarekin. Hiru puntu ditu onartutako proposamenak. Batetik, legebiltzarrak Eusko Jaurlaritzako Osasun Sailari eskatu dio hurrengo urteetan «beharrezkoak diren postuak» eskaintzeko, Osakidetzako profesionalen artean belaunaldi erreleboa bermatzeko. Halaber, galdegin dio «ahalik eta egonkortasun handiena» bermatzen duen lan kontratua egiteko egoiliarrei prestakuntza amaitzen dutenean. Azkenik, lehen mailako arretako egoiliarrei «arreta berezia» emateko eskatu dio, eskaintzen zaizkien kontratuak «kalitatezkoak» eta «erakargarriak» izan daitezen.

EP-IU abstenitu egin zen bozketan, eta aurka bozkatu zuen EH Bilduk. Eztabaidan, Osakidetzari «prestigioa emateko» beharraz aritu zen Rebeka Ubera EH Bilduko legebiltzarkidea, eta horretarako politikak aldatu behar direla esan zuen. Ohartarazi zuen osasun profesionalen gabeziaren erantzukizuna Jaurlaritzarena dela, eta kontratazio eredua aldatzeko galdegin zion, oraingoak ez duelako laguntzen «Osakidetza erakargarria izaten». Eredu horrek soldatetan ez ezik, arreta jasotzen duten pazienteen kopuruan ere eragina duela azpimarratu zuen. Haren iritziz, lan baldintza kaskarren ondorioz, «belaunaldi berriak Osakidetza ez den beste hautu batzuk lehenesten ari dira».

EP-IU taldeko Jon Hernandezen esanetan, Osakidetza «ez da behar bezain erakargarria osasun arloko profesionalentzat». Hori dela eta, kontratazio eredua aldatzeko eskatu zuen, egoiliarrek lehen mailako arretaren alde egin dezaten. Haren iritziz, «arazo nagusia lan kargak eta karrera profesionalaren garapena dira».

Kritikak EH Bilduri

EAJk gogor egin zuen EH Bilduren aurka: Osakidetzari buruzko «gezurrak» esatea eta osasun publikoaren «desprestigioaren sustatzailerik handiena» izatea aurpegiratu zion Estibaliz Larrauri legebiltzarkideak EH Bilduri. Osasun Sailak lehen mailako arreta indartzeko eta langileei egonkortasuna emateko egindako ahaleginak azpimarratu zituen Larraurik. «Profesional faltaren arazoa ez da Osakidetzarena: erkidego guztietan eta Europako zati batean gertatzen da, eta Jaurlaritza lanean ari da irtenbideak aurkitzeko». Ideia bera azpimarratu zuen Ekain Rico PSE-EEkoak ere. Haren ustez, Eusko Jaurlaritzak espezializazioak sustatu behar ditu, eta egoiliarrei «kalitatezko enplegu egonkorra» eskaini behar die lan eskaintza publikoen bidez.

PP-C's taldeko Laura Garridok akordioaren garrantzia nabarmendu zuen, lehen mailako medikuen falta konpontzeko «aurrerapausoa» delakoan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Elbira Zipitriaren estatuaren aurkezpena, Gipuzkoako foru jauregian. ©Gipuzkoako Foru Aldundia

Elbira Zipitriaren estatua jarri dute Gipuzkoako foru jauregian

Julen Otaegi Leonet

Lehenbizikoz, andre baten eskultura jarri dute jauregiko ohorezko patioan; Gipuzkoaren historiako izen handientzat gordetako espazioa da.

Imanol Pradales Sestao e Areetako metro geltokiak lotuko ditun trenaren aurkezpenan. ©Bizkaiko foru aldundia

Sestaoko eta Areetako metro geltokiak lotuko dituen trenak ez du makinistarik izango

Mikel Garcia Martikorena

Itsasadarraren azpitik igaroko den tren baten bidez, Bilboko Metroko lehenengo eta bigarren lineak lotuko dira.

Hondakin meta bat, eraikuntza baten azpian, Angelun. ©Guillaume Fauveau

Eiffage enpresaren arabera, «ez dago arrisku sanitariorik» Angeluko obran

Oihana Teyseyre Koskarat

Eiffage enpresako komunikazio zerbitzuak BERRIAri esan dio enpresak «ulertzen» duela zabaldutako bideoek eragin «emozioa», baina segurtatu dute hondakin bizigabeak direla.

Poliziaren kontrol bat Irun eta Hendaia arteko mugan. ©Jagoba Manterola / FOKU

Irungo Harrera Sareak ohartarazi du handitzen ari dela bide ez seguruak hartzeko arriskua

Berria

Mugako kontrolak gogortu egin direla salatu du, eta Gurutze Gorriarren egoitza ahalik eta azkarren uztera behartzen dituztela migratzaileak. «Egoera lazgarriak prebenitzeko» eskatu die sareak erakundeei.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...