Albistea entzun

Miel A. Elustondori eman diote Rikardo Arregi kazetaritza saria

BERRIAn argitaratutako 'Tonban ehortzirik' elkarrizketa sortagatik jaso du saria. Komunikazio saria 'enpresabidea.eus' webguneak irabazi du

Atzoko sari banaketaren argazki bat, Andoainen.
Atzoko sari banaketaren argazki bat, Andoainen. JAGOBA MANTEROLA / FOKU Tamaina handiagoan ikusi

Julen Otaegi Leonet - Jone Arruabarrena -

2022ko abenduak 1 - Andoain

Miel A. Elustondo kazetari eta idazle azpeitiarrari eman diote aurtengo Rikardo Arregi kazetaritza saria, BERRIAn argitaratutako Tonban ehortzirik elkarrizketa sortagatik. Komunikazio saria, berriz, Enpresabidea.eus webguneak irabazi du.

Euskal kazetaritzari aitortza bat egiteko asmoz banatzen dira sari horiek, eta, aurten, bi sariez gain, «ohorezko mugarriak» ere banatu dituzte, sarituen ibilbideak aitortzeko. Elixabete Garmendia kazetariak eta Patxi Baztarrika Rikardo Arregi sarien sortzaileak jaso dituzte mugarri horiek.

Andoaingo Bastero kulturgunean egin zuten atzo sari banaketa, eta, ekitaldiaren hasieran, Polonian preso dagoen Pablo Gonzalez euskal kazetariaren aldeko adierazpen bat irakurri zuen Alaitz Mendoza aurkezleak. Elustondok harrituta jaso zuen saria: «Finalista geratu naizen hirugarren aldia da, eta ez nuen espero oraingoan saria jasotzea». Saria espero ez zuenez, ez zekarren hitzaldirik prestatuta; baina paperik gabe ere, Arregigatik daukan miresmena adieraztea lortu zuen, hunkiturik: «Rikardo Arregi irakurtzen dut, hasieratik amaiera arte. Barruraino sartzen zait, eta min egiten dit. Horregatik idazten dut idazten dudana». Jarraian, Rikardo Arregiren heriotzagatik auhenez poema irakurri zuen, Gabriel Arestik Arregiri eskainitakoa.

Enpresabideako Maite Reizabal ere igo zen taula gainera saria jasotzera, eta hark ere onartu zuen «sekulako sorpresa» izan zela saria jasotzea. Azaldu zuen webgunea «ekonomia etxeko giroan» egiteko helburuz sortu zutela, eta bide horretan jarraituko dutela, «diruaren hotsa euskarazkoa ere izan dadin ekarpena egiten».

«Ohorezko mugarria» jaso duen Patxi Baztarrikak, berriz, sariek «garai berrietara egokitzeko izan duten gaitasuna» azpimarratu zuen, eta eskerrak eman nahi izan zizkion 1989an berarekin batera sariak sortu zituen Andoaingo orduko udal taldeari. Elixabete Garmendia kazetariari eman diote beste mugarria. Hark ere ondo ezagutzen du saria: lehen bost urteetan epaimahaikide izan zen, eta 2000. urtean Kazetaritza saria jaso zuen ETB1eko Bertatik bertara saioak, bere gidaritzapean. Aste honetan zendu den Pilar Iparragirre kazetaria izan du gogoan Garmendiak: «Berarengana luzatu nahiko nuke aitorpen hau».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Gasteizko Askabide Klinika ©Jaizki Fontaneda/ FOKU

Askabide klinikak eskatu du abortuaren kontrako protestak ez daitezela guneetatik hurbil egin

Isabel Jaurena

40 Días por la Vida abortuaren aurkako elkarteak iragarri du protestak eginen dituztela otsailaren 22tik aurrera.

Frankismoaren biktimei omenaldia Bilboko hilerrian, artxiboko irudian ©Aritz Loiola/ Foku

EP-IUk eta Jaurlaritzak akordioa lortu dute memoria demokratikoaren legearen inguruan

Edurne Begiristain

Biktimen errolda bat sortuko da, erreparazio «osoa» bermatuko zaie biktimei, eta memoriaren aurkako sinboloak kentzeko plan bat onduko du Gogora-k, besteak beste.

Javier Remirez, Nafarroako Gobernuko lehendakariordea, parlamentuan. ©JAGOBA MANTEROLA / FOKU

Nafarroako Gobernuaren abisua sindikatuei: «Ez dugu asmorik soldatak gehiago igotzeko»

Ion Orzaiz

Remirez lehendakariordea, Sindikatu Medikoaren grebaz: «Ahalegin guztiak egin ditugu; orain esan behar dute gure eskaintza onartzen duten ala ez»

Biz-ren ekintza Dartamenduko kontseiluak Baionan duen egoitzan ©Guillaume Fauveau

AHTaren «inposaketa» gaitzetsi du Bizik

Ekhi Erremundegi Beloki

AHTaren proiektuak Ipar Euskal Herriko herritarrentzat zerga berriak ekarriko dituela salatu du. Irun, Baiona eta Bordeleko auzapezen deiarekin bat egin du

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...