PSNk ez du UPNrekin akordiorik egingo, eta EH Bildurekin bilduko da

PSNren Nafarroako presidentegai Maria Txibitek argi azaldu zuen nortzuk nahi dituen koalizio gobernu batean: Geroa Bai eta Zurekin Nafarroa. Negoziazioak hasiak ditu bi talde horiekin, baina, bien bitartean, gainerako alderdiekin ere bilduko da. Atzo goizean, UPNren txanda izan zen, eta iragarri dute EH Bilduko kideekin ere elkartuko direla. Halere, Ramon Alzorriz sozialisten Antolaketa idazkariak adierazi du ez dutela gobernu akordiorik egingo ez batarekin, ez bestearekin.

PSNko eta UPNko kideek Nafarroako Parlamentuan egindako bilerak, bien harremana indartzeko baino gehiago, elkarrengandik aldentzeko balio izan du; bai, behintzat, inbestidura bati begira. «Ez dago aukerarikUPNrekin akordiorik egiteko», zehaztu zuen Alzorrizek. Eta UPNko presidente Javier Esparzak erantzun zuen bileran ez dela «ustekabekorik» izan, PSNk berretsi baitie asmoa dutela Geroa Bairekin eta Zurekin Nafarroarekin aurkezteko inbestidurara.

Hiruren artean, baina, ez dute gehiengo osorik, eta beharrezkoa lukete UPNren edo EH Bilduren abstentzioa gobernua osatzeko. Independentistak Nafarroako politikako «ekuazioetatik ateratzeko» eskatu die Esparzak sozialistei, baina adierazi du Txibitek ez duela bide hori jorratzeko asmorik, eta, beraz, «EH Bilduri esker» izan nahi duela berriz ere presidente: «PSNk ez du UPNz ezer jakin nahi, eta ez dago gure abstentzioa eskatzeko baldintzetan».

PSNko ordezkariak EH Bildurekin ere bilduko dira, baina, Alzorrizen hitzetan, ez da gobernu akordiorik jorratuko, ezta koalizioaren abstentzioa eskuratzeko ere: «Ez dugu gobernurako ezer negoziatuko EH Bildurekin, eta ez dugu gobernuarentzat ezer itunduko EH Bildurekin».

Hitzarmenik ez Gipuzkoan

EH Bilduren Gipuzkoako ahaldungai nagusi Maddalen Iriartek ere «gobernabiderako ituna» proposatu zien atzo EAJri, PSEri eta Elkarrekin Podemosi, aldundian «proiektu partekatu bat» bideratzeko. EAJren Euzkadi Buru Batzarreko presidente Andoni Ortuzarrek, baina, ez du «arrazoizkotzat» jo, Gipuzkoako Foru Aldundia «parlamentu bat» bilakatuko lukeelako, «irizpide argiak eta bateratuak» ezarri beharrean. Koalizio subiranistako eledun Unai Urruzunoren hitzetan, arazoa beste bat da: EAJk eta PSE-EEk ez dituzte «edukiak eta programak» mahai gainean jarri nahi, baizik eta EH Bildu gobernuetatik kanpo utzi.

Esan duenez, maiatzaren 28ko bozek erakutsi zuten «bestelako politika publiko eta gobernantza eredu batzuen» alde egin behar dela, eta, Gipuzkoaren kasuan, Iriarteri dagokiola aldaketa hori zuzentzea: «Gizarteak akordio handiak behar ditu; ez dugu uste guk soilik egin diezaiekegunik aurre erronka guztiei. Proba ditzagun bide ezberdinak».

Bestalde, Juan Karlos Izagirre EH Bilduko Donostiako alkategaiak esan du bere hautagaitza aurkeztuko duela Donostiako alkate izateko. Gipuzkoako hiriburuan, ziurra da Eneko Goia EAJko zerrendaburuak eutsiko diola alkatetzari; lehen indarra izan zen, eta PSE-EErekin batera, ziurtatuta dauka gehiengo absolutua.