Voxen helburuetako bat izango da «euskararen inposaketa» salatzea

Voxek aurrenekoz edukiko du parlamentari bat Eusko Legebiltzarrean, eta horrek, Amaia Martinezen arabera, «euskararen inposaketa» salatzea izango du helburu, besteak beste. Hori nabarmendu zuen atzo Radio Euskadin. Martinezen hitzetan, eskuin muturreko alderdiak datorren legegintzaldian lehenetsiko dituen beste helburuetako bat izango da «nazionalismo totalitarioa» amaitzea. «Eta, beste edozeren gainetik, Espainiaren batasuna aldarrikatzea».

Martinezek beste alderdiren batekin lankidetzan aritzea baztertu du. «Gure ahots propioa izango dugu, eta bat egin nahi duenari eskua luzatuko diogu». Espainiar abertzaleak ez diren alderdiak legez kanpo uztearen alde agertu izan da Vox, eta horri buruz galdetu zioten Martinezi. Defendatu zuen «nazioaren, Espainiaren, batasunarekin» ados ez daudenek ez dutela «ahotsik eduki behar instituzioetan».