Frantzian diren euskal preso guztiek eskatzen ahalko dute baldintzapean aska ditzatela

Kontseiluak konstituzioaren kontrakotzat jo du hori egitea eragozten zien araua. 2020ko uztailaren 1a arteko epea eman diote gobernuari legea aldatu dezan
Euskal presoen askapena eskatzeko manifestazio bat egin zuten 2017ko abenduan, Parisen.
Euskal presoen askapena eskatzeko manifestazio bat egin zuten 2017ko abenduan, Parisen. MARISO RAMIREZ / FOKU Tamaina handiagoan ikusi

Ekhi Erremundegi Beloki -

2019ko irailak 7

Frantzian preso diren euskal preso guztiek eskatu ahalko dute baldintzapean aske uzteko. 2016. urtetik, Frantziako zigor prozedurako lege artikulu berri batek eskaera horiek egiteko baldintzak zorroztu zituen, eta Frantziako lurraldean egoteko debekua jasoa zuten atzerriko presoei eskaera egitea eragotzi zien, de facto. Maritxu Paulus Basurco abokatuak arazo hori aipatu zuen joan den uztailaren 23an, Frantziako Konstituzio Kontseiluaren aitzinean, Alaitz Areitio euskal presoaren kasutik abiatuta. Atzo, Kontseiluak ebazpena atera zuen, eta zigor prozedurako Frantziako Konstituzioaren aurkakotzat jo zuen 730-2-1. artikulua. 2020ko uztailaren 1a arteko epea eman diote Frantziako Gobernuari Frantziako nazionalitatea ez duten presoek baldintzapean askatzeko eskaerak egin ahal izateko, legea alda dezan. Paulus Basurco, Xantiana Cachenault eta Clara Rouget-Aranibar EPPK-ko presoen abokatuek Frantziako Gobernuari dei egin diote behar diren neurriak har ditzan.

2016ko ekainaren 3an aldatu zuten Frantziako zigor prozedurako kodea, eta bertan erabaki zuten «terrorismo» aferetan zigortuak izan diren guztiek proba epe bat bete beharko zutela baldintzapean aske uzteko eskaerak egiteko —urte bat eta hiru urte artekoa, zaintza neurriekin—. Hor sortu zen arazoa: Frantziako lurraldean egoteko debekua zuten Hego Euskal Herriko presoek, edo euroagindu edo estradizio prozedura batean zirenek, ez zuten baldintza hori betetzen ahal; ez zuten dispentsarik aurreikusi, eta, beraz, ez zuten baldintzapean aske uzteko eskaera egiteko aukerarik. «Lege hori aitzin, preso batek kanporatze agindua zuenean —judiziala edo administratiboa— besteen moduan eskatzen zuen baldintzapean aske utz zezatela. Desberdintasun bakarra zen onartuz gero Frantziatik kanporatuak zirela. Kondena luzeentzat, Frantziako legeak aurreikusten zuen jadanik froga epe bat ezartzea, baldintzapean askatzeko prozeduran sartu aitzin. Kasu horretan ziren atzerritarrak, kanporatuak ziren besterik gabe», azaldu du Paulus Basurcok.

2016ko lege moldaketaren ondorioz, ez dute baldintzapean aske uzteko eskaerarik egin ahal izan Hego Euskal Herriko presoentzat. «Proba garai hori Frantziako lurraldean egin behar duzu; zuk debekua baldin baduzu lurraldean egoteko, ezin duzu proba epe hori bete. Egoera hori are latzagoa da bizi osorako kondena dutenentzat, irteteko aukera bakarra baldintzapean aske uztea baita». Frantziako Konstituzio Kontseiluaren aitzinean, abokatuak ohartarazi zuen 2016ko legeak berdintasun, proportzionaltasun, eta gizarteratze printzipioak urratzen zituela.

Atzo argitaratu zuen ebazpenean, Frantziako Konstituzio Kontseiluak epea eman dio Frantziako Gobernuari. Berantenez 2020ko uztailaren 1erako egin beharko du legearen aldaketa, Frantziako nazionalitatea ez dutenek ere baldintzapean aske uzteko eskaerak egiteko aukera izan dezaten. Egun horretarako egiten ez badu, legea bertan behera geldituko da. Paulus Basurco: «Ez dute heldu den urteko uztail arte itxaron beharrik. Nahi badute, berehala egin dezakete».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Ramontxu Berri tabernan egondako 683 laguni egin ziete proba, atzo ©Gorka Rubio / Foku

Hego Euskal Herrian, 492 positibo

Berria

Pertsona bat hil da Nafarroan, uztailaren 15etik lehena. Uztailaren 27tik abuztuaren 3ra Galdakaoko Muguru tabernan izan ziren 420 laguni PCR proba egingo diete, eta Donostian PCR-ak egiten jarraituko dute Ramontxu Berriko bezeroei.

Iñigo Urkullu Eusko Jaurlaritzako lehendakaria, iragan astelehenean, Gasteizen ©Jaizki Fontaneda / Foku

«Erantzukizunerako» deia egin du Iñigo Urkulluk

Joxerra Senar

Sare sozialetan zabaldutako ohar batean, Eusko Jaurlaritzako jarduneko lehendakariak ohartarazi du «denen artean ahal den guztia» egin behar dela lehen olatuan bizitako egoera dramatikora ez itzultzeko.

 ©ARITZ LOIOLA / FOKU

Eragile guztiekin biltzeko eskatu dio oposizioak Eusko Jaurlaritzari

Olatz Esteban Ezkati

538 positibo atzeman dituzte Hego Euskal Herrian, iragan astean halako bi. Ospitaleratzeak ere bikoiztu egin dira egun batean: 103 pertsona daude erietxean.

 ©RAUL BOGAJO / FOKU

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna