Joseba Borde espetxera itzuli da, hirugarren gradua kenduta

Joseba Borde Ugaoko (Bizkaia) presoa Basauriko espetxera itzuli zen ostegun gauean. Eusko Jaurlaritzak hirugarren gradua eman zion Borderi, baina fiskalak helegitea aurkeztu zuen erabaki horren aurka, eta, Espainiako Auzitegi Gorenaren doktrinari jarraituta, kartzelara itzuli behar izan du, Espetxe Zaintzako Epaitegiak errekurtsoa ebatzi arte.

Bordek 64 urte dauzka, eta hogei daramatza kartzelan. Gaixotasun larriak dituzten presoen artean sailkaturik dago, eta zigorraren hiru laurdenak duela hiru urte baino gehiago bete zituen, 2019an.

Sarek nabarmendu du legeak ez duela «inolaz ere» esaten «zigorrak espetxeko hormen artean» bete behar direnik «azken egunera arte»; araubide irekian betetzeko aukerarik izan gabe, alegia, «gizartearekin harreman estuagoan bizitzeko aukera ukatuz». Eusko Jaurlaritzak eskumena bere gain hartu zuenetik, 42 presori onartu zaie hirugarren gradurako progresioa, baina, 42 kasu horietatik 29tan, fiskaltzak errekurtsoa jarri du erabakiaren kontra, eta hamahiru espetxean sartu ditu Auzitegi Nazionalak, bigarren graduko erregimenean.

«Haserrea adierazi nahi dugu, berriro ere, oztopoak baino ez dituztelako jartzen presoek aspaldi hasitako espetxe ibilbidea moztu nahian. Etxera etortzea eskakizun demokratiko bat da, eta salbuespeneko auzitegiek ez lukete behin eta berriz boikotatu beharko», nabarmendu du plataformak. Hori dela eta, manifestaziora deitu du Sarek hilaren 9rako, Ugaoko Herriko Plazan, 20:00etan.

Bestalde, Patxi Markes Zelaia preso berangarra aske geratu da, zigor osoa bete ostean. 25 urtez egon da espetxean. 2017an bete zituen zigorraren hiru laurdenak. 2022ko urrian baldintzapean aske utzi zuten.