«Gerrilla gatazkan» 24 hildako Papua Ginea Berrian

Azken egunetako indarkeria oldarraldian, guztira 24 pertsona hil dituzte Papua Ginea Berriko Hela probintzian, hango Post-Courier hedabidearen arabera. Philip Undialu Helako gobernadoreak Reuters berri agentziari esan dio astelehenean izan zela azken erasoa, eta hemezortzi pertsona hil zituztela Karida herrian.

Hilketa hori egun batzuk lehenagoko beste batekin lotu du probintziako Poliziak; sei pertsona hil zituzten orduan, Peta herrian. Orduko biktimen senideak dituzte Karidako erasoaren egiletzat. «Emakume eta haur errugabeen masakre bat izan da», esan zuen Undialuk. Teddy Augwi Helako polizia buruak adierazi zuen gertatzen ari dena ez dela «tribuen arteko liskar bat», baizik eta «gerrilla gatazka bat».