Koronabirusa

5.000 ikasletik gora etxeratuta daude

Gutxienez 82 ikastetxetara sartu da birusa. Iparraldeko campusetan hamahiru kasu izan dira
Burlatako (Nafarroa) Askatasuna ikastetxea, sartze egunean.
Burlatako (Nafarroa) Askatasuna ikastetxea, sartze egunean. IDOIA ZABALETA / FOKU Tamaina handiagoan ikusi

Oihana Teyseyre Koskarat - Uxue Rey Gorraiz -

2020ko irailak 17

Ikastetxeetara ere sartu da gaitza: guztira 5.108 ikasle bakartuta daude Hegoaldean. Javier Remirez Nafarroako Gobernuko presidenteordeak Nafarroako datuak eman zituen atzo. Haur Hezkuntza eta Lehen Hezkuntza soilik hartuta 2.308 ikasle daude konfinatuta. Bakartze horiek 111 taldetan dute eragina, eta, beraz, Remirezek argitu du ziklo horietako taldeen %3,15 daudela konfinatuta. Hau da, guztira, Nafarroako Haur Hezkuntzako eta Lehen Hezkuntzako ikasleen %3,60.

Gutxienez, hemezortzi ikastetxe hunkitu ditu birusak Nafarroan. Azken orduetan, honako herri hauetan itxi behar izan dituzte ikasgelak, besteak beste: Erriberrin, Iruñean, Murchanten, Tuteran, Erratzun, Zizurren, Sarrigurenen, Noainen, Aiegin, Barañainen eta Irurtzunen.

Gisa berean, Eusko Jaurlaritzak EAEko datuak eman zituen atzo: 59 ikastetxetako 79 klase bakartu dituzte, baina ez dute zehaztu zein irakastaldiko ikasleak diren. Osakidetzak atzo jakinarazi zuenez, guztira 2.800 ikasle inguru daude konfinatuta Araban, Bizkaian eta Gipuzkoan. Soraluzeko (Gipuzkoa) institutua da EAEn erabat itxita dagoen eskola bakarra.

Ipar Euskal Herriko datu zehatzik ez bada ere, iragan astetik dozena bat ikastetxetan atzeman dituzte kasu positiboak. Azken datuen arabera, Larresoroko, Biriatuko (Lapurdi) eta Larraineko (Zuberoa) eskolak hetsi behar izan zituen Eric Spitz prefetak. Bestalde, Hendaiako (Lapurdi) eskola bateko klase bat bakartuta dago, eta Basusarriko (Lapurdi) beste bat ere bai.

Baionako Xaho haurtzaindegia ere itxi zuten iragan astean, lau langilek positibo eman ondoan. Egoera «kontrolatuta» badago, bihar irekitzekoa dute berriz.

Campusetan kezka

Unibertsitateetara ere heldu da birusa. Iragan astean milaka ikasle sartu ziren Baionako eta Angeluko (Lapurdi) campusetara. Unibertsitatea martxotik egon zen itxita, eta berriz zabaldu zuten sartzea egiteko. Maskara derrigorrezkoa da ikasle eta irakasle guztientzako, eta eskolaz kanpoko aktibitateak debekatu dituzte. Alta, aste bakarrean jadanik hamahiru ikasle kutsatu dira Ipar Euskal Herrian. Paueko eta Aturri Herrialdeetako unibertsitateko Mohamed Amara lehendakariak bigarren fasera pasatzeko agiria izenpetu behar luke datozen orduetan.

Bigarren fasea aktibatu, eta antolaketan zenbait aldaketa gertatuko dira. Ordutegia 22:00 arte hedatzeko eskubidea izanen du lehendakariak, eta larunbatetan klaseak ematen ahalko dituzte. Halaber, klase ez-presentzialak ere emateko antolatu beharko dute irakasleek eta ikasleek. Asteko txandak ezar ditzakeela azaldu du Amarak, prentsan.

BERRIAk jakin duenez, irakasle zenbaitek salatu dute ez direla erabakien jakinean; eta Amarari leporatu diote soilik prentsan komunikatu izana. Baionako unibertsitateko irakasleak gaur dira biltzekoak datozen asteetako antolaketa finkatzeko. Ikasleengan ere kezka piztu da, klase ez-presentzialak egiteko baliabide eskasiarengatik sustut.

Hegoaldeko unibertsitateetako egoeren inguruko daturik ez dute oraindik zabaldu.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

PCR proba bat, Gurutzetako ospitalean. ©Luis Jauregialtzo, FOKU

Positibo kopuruak goia jo du Nafarroan

Uxue Rey Gorraiz

Beste 749 kasu atzeman dituzte Hegoaldean, eta nabarmen ugaritu dira Nafarroan: 362 kutsatu detektatu dituzte azken egunean. 501 lagun daude erietxeratuta Hego Euskal Herrian, eta 82 gaixo daude ZIUetan.

Zestoa, artxiboko irudi batean. ©Gorka Rubio / Foku

Eraikin publikoak eta tabernak itxi dituzte Zestoan

Berria

28 kasu baieztatu dituzte azken egunetan, eta neurri murriztaileak hartu dituzte agerraldiari aurre egiteko asmoz. Datozen egunetan egoera «kontrolatzea» espero dute.

Iñigo Urkullu omenaldian ©Eusko Jaurlaritza

Koronabirusaren biktimak omendu dituzte Gasteizen

Uxue Rey Gorraiz

Iñigo Urkullu lehendakariak gidatu du ekitaldia. Pandemiarengatik hildakoak gogoratu ditu, eta elkartasuna adierazi die familiei. «Elkarrizketa soziala» bultzatu dadin galdegin du, bizikidetza sozialaren berreraikuntzarako.

Sindikatuen eta Sareren elkarretaratzea, presoen egoeraren harira Bilbon. ©Marisol Ramires/FOKU

Hainbat espetxetan komunikazioak eten dituztela salatu dute Sarek eta Etxerat-ek

Maria Ortega Zubiate

Presoek eta haien senideek “garai oso zailak” bizi dituztela adierazi dute bi elkarteek, eta pandemiak “salbuespenezko erregimenaren aplikazioa” areagotzen duela. Positibotzat jo dituzte Eusko Legebiltzarrean eta Espainian espetxe politika aldatzeko egindako adierazpenak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna