Ibilbide luzeko autobusak doakoak dira jada ohiko bidaiarientzat Hegoaldean

Hego Euskal Herritik irten edo pasatzen diren ibilbide luzeko autobusak doakoak dira jada. Ibilbide luzeko lurreko garraioaren prezioetan dauden desberdintasunak «berdintzeko» helburuz, dekretu bat onartu du Espainiako Gobernuak, eta atzo sartu zen indarrean. Haren bidez, hemendik aurrera autobusak ere doakoak izango dira.

Izan ere, Renfeko aldiriko zein ibilbide ertaineko bidaiak doakoak dira duela hilabete batzuetatik, eta horiek erabiltzen duten antzeko sistema aplikatuko da autobusetan ere: 20 eta 65 euro arteko berme bat ordaindu beharko dute bidaiariek—bermea 20 eurokoa izango da 5 euro edo gutxiago balio duten txartelei dagokienez, eta 65ekoa 25 euro edo gehiago balio dutenei dagokienez; tarteko prezioak ere egongo dira, beti txartelen balioaren arabera—. Apirilera arte hamabi bidaia edo gehiago egiten badituzte, bueltatu egingo diete diru hori.

Doakoa, baina baldintzekin

Gutxienez abendura arte indarrean egongo da neurria, eta, bermeak ordaindu eta bueltatzeko, hiru epetan banatu dute urtea: otsailaren 1etik apirilaren 30era, maiatzaren 1etik abuztuaren 31ra, eta irailaren 1etik abenduaren 31ra. Epe horien hasieran ordaindu beharko da bermea, eta denbora hori igarotzean bueltatuko zaie bidaiariei dirua.

Espainiako Gobernuaren emakidadun diren enpresetan aplikatuko da neurria, eta enpresa horietan ohiko bideak erabilita erosi ahalko dira txartelak. Bankuko txartela erabilita ordaintzen bada, erabilera epea bukatzean modu automatikoan itzuliko da dirua bidaiariaren kontu korrontera. Eskudiruarekin ordainduz gero, ordea, bidaiariak eskatu beharko du dirua bueltatzeko, epea bukatu eta bi hilabete igaro aurretik.

Epe horietako bakoitzean bonu bat soilik erosi ahalko dute bidaiariek, eta beti ibilbide bera egiten duen autobuserako balioko du. Horrez gain, ezin izango da egun berean bidaia bat baino gehiago egin txartel horrekin, eta, bidaia bertan behera uztekotan, 24 ordu lehenago ezeztatu beharko da.

Txartelak, gainera, pertsonalak izango dira, eta pertsona bakar batek baino ezingo du erabili bonu horietako bakoitza. Azkenik, bidaia bat erosiz gero, hurrengorako txartel bat erosteko, bidaiak irauten duen denbora halako hiru itxaron beharko da. Arau horietakoren bat hiru aldiz apurtuz gero, bermea kenduko zaio bidaiariari.