Albistea entzun

Bigarren saioa beharko du

Pere Aragones ERCko hautagaiak ez du Kataluniako presidente izateko adina babes lortu, eta asteartean izango du bigarren bozketa. Ez da ezustekorik izan, eta abstenitu egin da JxC
Pere Aragones ERCko hautagaia bere izendapenaren aldeko botoa ematen, atzoko saioan.
Pere Aragones ERCko hautagaia bere izendapenaren aldeko botoa ematen, atzoko saioan. QUIQUE GARCÍA / EFE

Julen Aperribai - Iosu Alberdi -

2021eko martxoak 27

«Bidea partekatzen dugun horiekiko deskonfiantza gainditu beharra daukagu». JxC Junts per Catalunyari zuzendutako mezu batekin hasi zuen Pere Aragones Kataluniako Generalitateko presidentegaiak bere diskurtsoa inbestidura saioan, jakinik ere bere eskakizunek ez zutela esperotako erantzunik izango, emaitza aurrez emana baitzegoen atzoko bozketan. Eskaera berbera egin zion hamar ordu geroago, baina ez zen ezustekorik izan, eta ezezkoa gailendu zen. Hala egin zuten 61 diputatuk —PSC, Vox, En Comu Podem, Ciutadans eta PPkoek—. ERCko eta CUPeko 44 diputatuen babesa jaso zuen, eta abstenitu egin ziren JxCko 32ak.

Horrenbestez, bigarren ahalegin batean saiatu beharko du Aragonesek presidentetza eskuratzen. Hurrengo asteartera arteko tartea izango du, printzipioz, JxCrekin akordioa egiteko, eta alderdi horretako 32 diputatuen babesa lortzeko. Epe hori nahikoa ez dela iritzita, bigarren saio horretara ez aurkezteko eskatu zion atzo Albert Batet JxCko bozeramaileak: «Gaurtik asteartera bitartean ez dago akordio bat lortzeko denborarik. Badakizu nola doazen negoziazioak».

«Prest nago egunean 24 ordu lan egiteko», adierazi zien Aragonesek JxCko kideei. Bateten arabera, baina, Katalunian gobernu bat izateko «aste bat edo bi» itxaron beharko dira. Izan ere, gobernu «sendo bat» bermatuko duen «akordio on baten» beharra azpimarratu zuen, eta bere alderdiak ERCrekin duen korapilo nagusiari heldu zion ondoren, 2017ko urriaren 1a mintzagai hartuta: «Ulertezina litzateke, orain, independentismoaren zati batek erreferendumari zilegitasuna kentzea».

JxCko eledunak behin eta berriz gogoratu zuen independentistek botoen %50eko langa gainditu zutela azken bozetan, eta egoera hori «aukera bat» dela 2017ko erreferendumarekin hasitako bideari jarraipena emateko. Horrek, Bateten esanetan, ez luke zertan bigarren erreferenduma izan helmuga gisa: «Botoen %52 eskuratu izanak ondorio politikoak izan behar dituela uste dugu».

Azken legealdiko «gudak» alboratzeko beharra azpimarratu zuen CUPek. «Batasun politiko estrategiko bat lortu beharra daukagu, alderdikeriak alboratuta», adierazi zuen Dolors Sabater diputatuak, eta, alde horretatik, «etxeko lanak egiten» lehenak izan direla esan zuen. ERCrekin egindako akordioa «abiapuntu bat» da, Sabaterrentzat, eta, hobetu beharra badago ere, Aragonesen aldeko botoa emango zutela aurreratu zuen. Ohartarazpena egin zion.

PSCko bozeramaile Salvador Illak ERCri eginiko kritika nagusiak PSOEk eta Espainiako Gobernuak azken astean eginikoen bide beretik jo zuen: CUP «antisistema eta erradikala» da, eta ez luke Generalitatearen jardunean eragin behar. Bi alderdi independentisten arteko akordioak aurreikusten duen puntuetako bat elkarrizketa mahaiari aukera bat ematea da. Illak ere jakinarazi zion «batera joango» dela Kataluniako mahaian adostutakoa Espainiako Gobernuarekin hasitako elkarrizketa mahaira eraman nahi badu. Atea itxi zion, baina, «haustura» helburu duen negoziazio bat hasteari: «Ez dago zuzenbide estatua errespetatuko ez duen konponbiderik». Horren aurrean, errealitatea ez ikusteko «begiak ixteaz» akusatu zuen Aragonesek PSC: «Pandemiarekin edo gabe, ez diogu uko egingo independentziari, ezta autodeterminazioari, ezta amnistiari ere».

Fronte zabalari keinua

Argudio batean bat egin zuten Ciutadanseko diputatu Carlos Carrizosak eta En Comu Podemeko Jessica Albiachek, Aragonesen aurka egiteko orduan. Biek leporatu zioten porrotera kondenatuta dagoen akordio batekin tematu izana. Marmotaren eguna filmarekin parekatu zuen ERCren eta CUPen ahalegina Carrizosak. Albiachek, berriz, «zaharkitze programatua duen» legealdi batekin tematu izana egotzi zion Aragonesi, eta larritzat jo zuen «erabakigarria izango den» legealdi batean hori egin izana.

Albiachi emandako erantzunean eskua luzatu zion ERCko hautagaiak, ordea. «Ez zarete harmailatik partida ikusten ari zareten ikusleak» esan zion, eta, eragiteko gaitasuna dutela gogorarazi; bide batez, hauteskunde kanpainan haizatutako «fronte zabala» berriz aipatuz.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Esteron ibaiaren ibarreko tarte lehortu bat, Niza hiritik gertu (Okzitania), uztailaren amaieran. ©SEBASTIEN NOGIER / EFE

Europan azken bostehun urteetako lehorterik handiena espero dute

Gorka Berasategi Otamendi

Kontinentearen erdialdeko eta mendebaldeko estatuak ezohiko bero boladak eta lehorteak ari dira pairatzen, klima larrialdiagatik. Suteek berotegi gas asko isuri dute zenbait herrialdetan

Salman Rushdie idazlea, 2019ko azaroaren 11n, Berlinen. ©HAYOUNG JEON / EFE
Monusco Nazio Batuen Kongoko Errepublika Demokratikorako misioaren kontrako protestetan hildako herritar baten hileta, aurreko astean. ©STR / EFE

Odolak mendekua nahi du

Oskar Epelde Juldain

Egunotan dozenaka lagun hil dira NBEren Kongorako misioaren kontrako protestetan. Milizianoen erasoen aurrean ezer ez egitea egozten diete kasko urdinei.

FBIko bi agente Donald Trumpen Mar-a-Lago etxearen atarian (Palm Beach, Florida), joan den asteartean. ©CRISTOBAL HERRERA-ULAXKEVITX, EFE

FBIk sekretupeko dokumentuak eraman ditu Trumpen Mar-a-Lago etxetik

Gorka Berasategi Otamendi

AEBetako presidente ohia ikerketapean dago, ustez espioitza legea urratzeagatik. Floridako etxean atzeman dioten dokumentazioaren edukia defentsa arloko gaiekin lotuta dago, besteak beste.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...