Politikari «izaera juridikoa» kentzea adostu du Elkarrizketa Mahaiak

Kataluniako Generalitatearen eta Espainiako Gobernuaren arteko Elkarrizketa Mahaiak bi akordio sinatu zituen atzo, Moncloan. Batetik, politikari «izaera juridikoa» kentzeko itun bat. Eta, bestetik, katalana babesteko eta bultzatzeko hitzarmen bat; Madrilek europarlamentuari eskatuko dio katalana osoko bilkuretan erabiltzeko aukera ematea —horretarako atea ireki dio euskarari ere—.

2020ko otsailean jarri zuten martxan Mahaia, eta bi gobernuetako ordezkariak —Generalitatearen aldetik ez zen JxCko kontseilaririk izan—, bakoitzeko lau, aterki horren pean hirugarrenez batzartu ziren, atzo. Urtea amaitu aurretik beste bilera bat egitekotan geratu dira.

Batzarraren ondotik nor bere aldetik mintzatu zen, eta Laura Vilagra Kataluniako Gobernuaren Presidentetzako kontseilariak nabarmendu zuen «aurrerapauso bat» eman dutela Generalitatearen eta Moncloaren arteko harremanerako «baldintza berriak» ezartzeko.

Bi aldeek adostu dute Kataluniako auziari izaera juridikoa kentzeko erreformak hauspotzea, horiek elkarrizketaren ondorio izatea, eta indarrean dagoen «ordenamendu demokratikoaren barruan» aurrera eramatea, eta «gehiengo sozial zabal baten» bermea edukitzea.

Felix Bolaños Espainiako Presidentetzako ministroak adierazi zuen bi gobernuei iruditzen zaielakatalanak izan behar duela Kataluniako hizkuntza sistemako «irakaskuntzarako hizkuntza».