Isil-gordeka egin beharreko arrantza

Autoa tentuz aparkatu, eta, Oria ibaira iristeko egin beharreko metroetan, kopeta argia ere ez dute pizten isilpeko angulazaleek. Isunen beldur dira.

Igor Susaeta -

2020ko urtarrilak 17

Aparkatu, eta, ilunpetan, erreminta aldean dutela, oinez hasi dira Oria ibaiaren ertzeraino. Arrantzatzera ateratzen diren gauetan, autoa non utzi erabakitzeko orduan ere tentuz ibili behar izaten dute Usurbil eta Orio (Gipuzkoa) artean lizentziarik gabe angulak harrapatzen ibiltzen direnek. Bidean, soro zabal bat ia itsumustuan gurutzatu, eta, kanaberadi mardul batera iritsita, zeharkatu, adarrak begietan sartzea saihesteko ahaleginean bi besoak zabalduta. Hor behar du ibaiak. Kopeta argiak baieztatu du baietz, hor dagoela. «Askotan kopeta argia itzalita etortzen gara honaino». Poliziaren kontrolak direla eta, «beldurtuta» ibiltzen dira. Zarata bat entzun da. Argiak dituen zerbait hurbiltzen ari da. Ez dago arduratzeko motiborik: Donostia-Bilbo bidea egiten duen Euskotrenen tren bat da, Oriora bidean doana. Batzuetan, zaratek eta argiek izututa, korrika hanka egin behar izan dute isilpeko angulazaleek. «Arriskutsua da».

Oroitu dute iazko kanpainako sarekada. «Handia izan zen hura». 40 bat ertzain ibili ziren Usurbil eta Orio arteko ibai zatian, eta bai ezkutuko angulazaleak, bai lizentzia edukita araudia betetzen ez dutenak ezustean harrapatzea zuten helburu. Harrapatu zuten, bai, lizentziarik gabeko bat. «Ez zuen angula gehiegi... Ez dut isunaren kopurua zehazki gogoratzen, baina uste dut 150-175 euro ordaindu behar izan zituela». Zenbat gramorekin, kilorekin, harrapatzen dituzten, isun hori dezentez handiagoa izan daiteke. «Baita 3.000 eurokoa ere».

Arrantzarako tresna ez da hain garestia; ez, behintzat, ezkutukoek erabiltzen dutena. Salabardo moduko bat da, etxean egindakoa. Kanabera egurrezkoa makila, eta angulek ihes ez egiteko sarea, metro bat pasa diametrokoa, alanbrearekin zirtzildutakoa. Badira plastikozko edo metalezko makila dutenak erabiltzen dituztenak, gutxiago pisatzen baitute.

Erreminta gisa, janzkera ere zaintzen dute. Gauez ibiltzen dira, udazken-neguan, eta hiruzpalau ordu pasa ditzakete ibaian. Aurpegia ez beste guztia estaltzen dute. «Inoiz ez gara gaixotu». Hori bai, esaten dutenez, alerik ez biltzea izaten da ohikoena arrantzatzera ateratzen direnean. Gertatu izan zaie «gaupasa eginda» lanera joatea, eta handik gutxira jakitea inguruan arrantzan ari zen bat poltsa bete angularekin etxeratu zela. Etxean angulak harrapatzeko ohitura egon delako ateratzen dira haiek ere arrantzatzera, eta uzta biltzen dutenean «sekulako poza» hartzen dute.

Angulak Bilboko arrandegi batean, kiloa 980 euroan salgai, 2010. urteko irudi batean. Luis Jauregialtzo / Foku

Egun jakin batzuetan soilik ateratzen dira angulatara, baldintza jakin batzuk behar baitira arrantzarako. Marea igotzen hasten denetik guztiz igo arteko tartean joaten dira, eta jaisten ari denean ere harrapa daitezke angulak, nahiz eta hori «salbuespena» izaten den. Ilbete edo ilberri egunak izan behar dute. «Mareak biziagoak izaten dira». Eta beharrezkoa da, gainera, arrantza unean bertan edo lehenago euria egitea, ura mugitu, «zikindu» dadin. Gau on batean «ehun pertsona inguru» ibil daitezke angulak harrapatzen.

Duela pare bat urte hildakoa

Uholdeak daudenean sasoi ona izaten dela nabarmendu dute ezkutuko angulazaleek. Baina egoera horretan arrantza egitea are arriskutsuagoa izan daiteke. Ibaian behera joaten dira zuhaitzen enborrak, adarrak... Istripuak gertatu izan dira, eta aipatu dute, kasurako, duela pare bat urte angulazale bat hil zela, itota.

Orian dena ez da angula, ordea. «Gerta liteke horren bila ateratzea, eta etxera bueltatzea lupia aleren batekin». Ezkutuko angulazaleek ez dute halakorik ikusi BERRIArekin hitzordua egin duten egunean, ezta ura argi more batekin argitu dutenean ere. «Arrainak hobeto ikusten dira, baina izutu egiten dira». Argiak itzali behar dira, baina: trasteak jaso eta autora itzultzeko ordua da.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Txagorritxuko erietxean, COVIDaren test serologikoak aztertzen. ©G. RUBIO / FOKU

Eritasunari buruzko lezio berrikusia

Arantxa Iraola

Asko falta da oraino, baina COVID-19aren inguruko ezagutzak egunero ari dira argitzen, osatzen; ondorioz, izurriaren hasieran gaitzaz esan ziren hainbat gauza zahartuta eta atzeratuta geratu dira guztiz. Etengabeko berrikusketa eskatzen du gai honek.

Nafarroako haur eskoletan "normaltasun berriarekin" ekingo diote ikasturteari

Olatz Esteban Ezkati

Lau egoera posible irudikatu ditu Nafarroako Gobernuak, eta COVID-19aren bilakaeraren arabera ezarriko da bat edo beste.

Angeluko hondartza. ©Guillaume Fauveau

Maskara derrigorrezkoa izango da Ipar Euskal Herriko hainbat herritan ere

Olatz Esteban Ezkati

Berrehun positiboren langa gainditu da seigarren egunez jarraian Hego Euskal Herrian: 224 kasu izan dira azken orduetan. Gipuzkoako tabernariak kexu agertu dira Jaurlaritzaren murrizketak direla eta

Emakume bat oinez Donostian, erosketen poltsak eskuetan, joan den apirilean. ©GORKA RUBIO / FOKU

Zaurgarrienak, zaurgarriago

Maddi Ane Txoperena Iribarren

Pandemiak emakume eta gizonen arteko desberdintasunak sakondu dituela ondorioztatu du Emakunderen txosten batek. Egoera hobetzeko gomendioak eman dizkie erakundeei

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna