TUTERA
Erriberako hiriburua, Ezkerraren eskuetan
Bere gotorleku nagusietako bat galdu du UPNk. Bost agintalditan jarraian gobernatu ostean, azken bozetan 1.050 boto eta bi zinegotzi galdu zituen. Nahiz eta lehen indarra izan, Ezkerrarekin berdindu zuen hautetsi kopurutan. Ezkerrak 900 botoren gorakada izan du, eta, lortutako sei hautetsiez gain, asteon PSNren hirurak eta Tudela Puede taldearen hirurak gehitu zaizkio. Asteon, hiru aldeek akordio programatikoa lortu dute eta, euren babesarekin, atzo Ezkerrako Eneko Larrarte alkate izendatu zuten. CUP taldeak ere baiezkoa eman zion.Larrartek azaldu du Tuterak historikoki izandako «erresistentziarako ahalmena» berreskuratu behar duela. Ihi batekin parekatu du. «Tolesten da, baina hautsi gabe». Gogora ekarri du Erriberan krisiak gogor jo duela. Hori aldatzeko lan egingo duela promes egin du, «de facto Tutera egun ez baita Nafarroako bigarren hiria».
BARAÑAIN
Oihaneder Indakoetxea, Barañaingo alkatea
Zentsura mozio bidez eta PSNren babesarekin lortu zuen alkatetza 2008an UPNko Jose Antonio Mendibek, Nafarroa Baiko Floren Lukiri kenduta. Zazpi urtez izan du aginte makila, baina atzo EH Bilduko Oihaneder Indakoetxeari pasatu behar izan zion. Nahiz eta UPN lehen indarra izan, zinegotzi bat gutxiago du (6). EH Bilduk (4), berriz, hitzarmena lortu du asteon, Geroa Bai (3), Barañainen Parte Hartuz (2) eta Ezkerra/Equorekin (2). Babes horrekin, UPNren eta PSNren oposizioari aurre egiteko moduan da udal gobernua. Atzo izendatu zuten alkate Oihaneder Indakoetxea, 31 urtean lehen alkate emakumezkoa. Orain arteko udalaren aldean, beste eredu bat ezarriko duela zin egin zuen.EGUESIBAR
Geroa Baiko Alfonso Etxebarria berriz alkate
Azken hamarkadan Nafarroan gehien handitu den udalerria da, eta hirigintza hazkundeak UPNren kudeaketa irregulartasunez kutsatu du. Lau agintalditan gobernatu du UPNk, eta ustelkeriaz zipriztindu da. Halere, horrek ez du higatu. 2011ko hautetsi kopurua lortu zuen UPNk, baina ez zaio aski izan. 2012an, zentsura mozio bidez, alkatetza kendu zion Geroa Baiko Alfonso Etxeberriak. Asteon, Geroa Baik (5), EH Bilduk (2), Eguesibar Garak (1) eta Ezkerrak (1) akordio programatikoa erdietsi dute. UPNren urteak gogoan, itunaren puntu nagusia kudeaketa eta kontratazio publikoa gardentasunez egiteko mekanismoak ezartzea da.IRUÑERRIKO BESTE UDALAK
Geroa Bai eta EH Bilduren artean banatu dituzte
Iruñerrian udalik gabe geratu da UPN. Barañainen eta Eguesibarren ostean, Burlatak du biztanle gehien, eta han, Geroa Baik eta Podemosek osatutako taldeak irabazi zituen bozak, 2.434 boto eta bost zinegotzi lortuta. EH Bilduk gertutik jarraitu zion, eta UPN hirugarren geratu zen. Atzo Txema Noval izendatu zuten alkate.Zizur Nagusian, UPNren ostean bigarren geratutako Geroa Baiko Jon Gondan gaztea izendatu zuten atzo alkate. Asteon, Geroa Baik (4), EH Bilduk (4), Zizur Elkarturik (Podemos gehi Ezkerra 2) eta Zizur Bultzatuz taldeak (1) konpromisoa hartu zuten Gondan babesteko. Datorren astean kaleratuko dute ituna.
Berriozarren, Antsoainen eta Atarrabian, EH Bilduren alkateak izango dituzte. Berriozarren, aise irabazi zuen koalizioak 1.629 boto lortuta. Aralarreko Xabi Lasa izan da bi agintalditan alkate, eta Raul Maizak hartu dio lekukoa. Atarrabian ere 2011n jasotako babesa bikoiztu zuen EH Bilduk, eta Mikel Oteizari eman dio aginte makila Kirio Gastearenak. Antsoainen ere garaipena berretsi du EH Bilduk. Ia boto kopurua bikoiztu ostean, Ezkerraren babesarekin, Ander Oroz izendatu zuten atzo alkate.
