Albistea entzun

Durangoko 53. Azoka. ARAZOKA

Nork zainduko du hau bihartik aurrera?

Itziar Ugarte Irizar -

2018ko abenduak 9

Azokak ateak ixten dituenean, hau da geratzen dena: azken orduan taka-taka-taka-taka ari diren kazetariak, Totiren ilararen eguneko hondarra eta segurtasuneko gizon bat pasilloetan bueltaka. Gero, beste denak joatean, bera geratzen da denaren kargu. Prosegurreko langile bat euskal kulturaren zaindari.

Zer egingo ote du gizonak gau osoan? Jasoko ditu erakusmahaietako tapakiak? Hartuko du libururen bat, komikiren bat, eta etzango da atseden guneko sofatan luze? Har ditzake diskoak eta saiatu nonbait entzuten; ETBren gune gorriko ordenagailu puntakoenetan ziur posible dela. Ostu ditzake txapak, itsasgarriak, egutegiak edo agendak. Txalapartaren erakusmahaian ardo botilak izan dira, eta sagardoarenak Argia-renean; har dezake bana, eta, bakarrik egonda ere, disimuluan edan. Esan, zer egingo zenukete zuek Landakon gau batez bakarrik utziko bazintuztete?

Ateak ixten direnean, argiak itzali, gero eta hotz handiagoa egiten du azokan. Bada, orain kendu azokan eta jarri, oso-osoan, euskal kulturan.

Gaur itxiko ditu ateak Durangoko 53. Azokak. Heldu den abendura arte galduko ditu fokuak, galdu bisitariak. Sortzailerik ez du galduko. Beraz, nork zainduko ditu? Zaintzaz ari garenean, badakigu, bizitza bizigarriago egiteaz ari gara. Sormenaren zaintza nork egiten du? Kultura batena?

Sortzaileak beroa jaso dezake azokan, eta karga ditzake pilak, gogoarenak, afektuarenak. Baina agortu ere, agudo agortu ahal zaizkio gero. Ze, bai, hotza latza egiten du kanpoan, eta sumatzen da azoka egunetan ere. Josu Amezagari entzun genion aurten: «Katarro batek hil dezake euskal kultura».

Gehitxo irudi lezake, baina sintomak asko dira. Aurten jakin ditugun datuak dira hauek: euskarazko kultur lanen kontsumoa ez da heltzen 200.000 lagunera, eta, funtsean, 40.000 dira honi eusten diotenak. Xeheago, bi euskaldunetik bat baino gutxiago joaten da urtean, gutxienez, euskarazko talde baten kontzertu batera; hamar euskaldunetik hiruk baino gutxiagok erosten dute euskarazko diskoren bat urtean; euskaldunen erdiek baino gehiagok ez dute urtean euskarazko liburu bakar bat irakurtzen. Atxus!

Azken bost gauetan Landakon bueltaka aritu den gizona beste norabait bidaliko dute laster. Eta, atxus!, nor ariko da euskal kulturaren pasilloetan zaindari bihartik aurrera?

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Harry Potterren sortaren lehen liburua, Londresko liburu denda batean. / ©Claudia Sacrest, EFE

Harry Potterrek 25 urte beteko ditu bihar

Jon OrdoƱez Garmendia

J. K. Rowlingek 1997ko ekainaren 26an argitaratu zuen Harry Potter eta Sorgin Harria-ren ingelesezko edizioa.

<b><em>Simone Veil <em>pastoraleko mustraka bat; 95 arizale aste hondar guziez elkartzen dira.</em> </em></b> ©SEVERINE DABADIE

Veil pastorala hasia da ate joka

Ainize Madariaga

Hiru emanaldi eginen ditu 'Simone Veil' pastoralak Muskildin: uztailaren 24an eta 31n, eta agorrilaren 6an. Bostehun lagunendako bazkaria prestatuko dute ikastolek egunotan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...