Ez dakit egia den edo asmazio hutsa. Ez dut pasadizoa protagonisten ahotan entzun, eta horrexegatik sortzen zait zalantza. Nolanahi ere, egia bada, gure egia da, eta, gezurra bada, gure gezurra, gure euskal mundu honetan nor diren bi pertsona baitira protagonista.
Jose Luis Korta Orioko traineruaren entrenatzaile zen bolada haietako batean Benito Lertxundi han izaten zen entrenamenduei begira, zale zintzo, fin-fin. Bien arteko berriketaldi batean zertan dabilen galdetu dio Kortak Benitori, eta honek disko bat prestatzen ari zela, grabatzen hasi aurretik utziko ziola CD bat bere iritzia jakiteko. Utzi dio CDa. Handik egun batzuetara berriz egin dute topo eta kantariak kirolariari: «Zer, Jose Luis, entzun al duk? Gustatu al zaik?». Eta Kortak, kasete eta biniloetara ohitua ordura artean, leial erantzun zion: «Bai. Entzutea lortu dudan aldea asko gustatu zaidak. Baina bestea… eginahalak eginarren ez diat entzuterik lortu».
Egia itxura tamainan duen pasadizo hori etortzen zait burura klima larrialdia dela-eta manifestazioetan txartelek diotena ikustean: «Ez dago B planetarik». Eta hori bai egia borobila dela. Gazteak ohartu dira. Gaitz erdi. Gure belaunaldikoak ohituak geunden alde bat bukatzean buelta eman eta bestea jartzen…
HITZ ETZANAK
B aldea
Iruzkinak
Ez dago iruzkinik
Ordenatu