Albistea entzun

HITZ ETZANAK

Omikron

Andoni Egaña -

2021eko azaroak 28

Zakurra da bizimodua. Niri gertatu behar hau ere! Egia esan, birusaren iritsierarekin zoriontsu izan nintzen. Mimatua sentitzen nintzen oso, eta konturatzen nintzen zorteko nintzela, gizakiek ez bezala, egunero kalean bueltaxka bat egiteko aukera izaten nuelako.

Jatorrak dira nire nagusiak. Tira… arrarotxoa gizona aukeran. Unibertsitateko irakaslea da, eta edozein aitzakia du on, hala dela jakitera emateko. Nirekin pasieran dabilenean, behin eta berriz deitzen dit izenez, propio, harik eta norbaitek nire izenaren arrazoiaz galdetzen dion arte. Orduan harro ematen du azalpena, nire izen hautaketan zeinen irudimentsuak izan ziren argi uzteko: «Greziar alfabetoko hamabosgarren letra da. 'O' idazten da, letra larriz nahiz xehez». Pedantea da tipoa, eh! Eta grazia egiten saiatzen da gero gainera: «Gurera heldu zenean txakurkume pottolo-pottolo eta borobil-borobila zen, eta horregatik deitu genion Omikron».

Joan zen ostiraletik ez naiz bizi. Nire izena entzuten dut batean eta bestean. Etxean, irrati-telebistek ez didate bakerik ematen. Auzoko tabernako terrazara jaisten nautenean, igurtzika hurbiltzen zaizkit haur, gazte eta helduak. Lehen, Pintto, Rin tin tin eta Banbulo-ez errukitu egiten nintzen. Orain, neuk ematen dut pena.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.