Diskoteketan metal detektagailuak jarri nahi ditu Jaurlaritzak
Azken asteotan Euskal Herriko hainbat tokitan gaueko aisialdiko lokaletan arma zuriekin izandako erasoen ondotik, diskoteketako sarreretan neurriak zorroztea aztertzen ari da Eusko Jaurlaritza. Gorka Urtaran Gasteizko alkateak egindako proposamenaren haritik ari da aukera hori aztertzen. Halako armak eramateagatik ezarritako zigorrak zorroztea eta diskoteketako sarreretan metal detektagailuen erabilera baimentzea proposatu zuen Urtaranek, eta Jaurlaritza segurtasun neurriak areagotzeko bide hori aztertzen ari dela jakinarazi zuen atzo Bingen Zupiria Eusko Jaurlaritzako bozeramaileak.
Arma zuriz egindako delituak ugaritzen ari direla ohartarazi zuen Zupiriak. Argitu zuen ez dela oraingo kontu bat, asteak daramatzala Jaurlaritzak egoera aztertzen, baina azken datuek adierazten dutela halako kasuak ugaritzen ari direla, batez ere ostiraletik igandera, kalean eta gaueko aisialdiko lokaletan. Horri aurre egiteko, Ertzaintzak miaketak areagotuko ditu, eta Segurtasun Sailak aztertuko du legeak zer aukera ematen duen diskoteketan metalak atzemateko gailuak ezartzeko. Dena den, Zupiriak gaineratu zuen arazoari aurre egiteko erakunde publikoekin eta gaueko aisialdiko arduradunekin lan egin behar dela, era koordinatuan.
Bestalde, Gasteizko Udalak adierazpen bat onartu zuen atzo, aho batez, asteburuan hirian izandako erasoaren aurka.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
