Donostiako 66. Zinemaldia. Zuzenda berriak. KRITIKA

Kontatu nahi direnak

Uxue Arzelus -

2018ko irailak 29

'Qing feng de wei dao / Breeze'



Zuzendaria: Kun Yang. Herrialdea: Txina. Iraupena: 80 minutu.

Yu Zhao Pekinen bizi da, eta bere semearen etxean laguntzen igarotzen ditu egunak. Haren jaioterrira joatea erabakiko du Yuk, familia eta aspaldiko lagunak bisitatzera. Bertan, familiako hainbat kide bisitatu, eta lagun berriak egingo ditu.

Kun Yang zuzendari txinatarraren lehen film luzea da Breeze. Bertan, jaioterrira itzultzean sortzen diren emozio eta frustrazioak erretratatu nahi izan dituela adierazi du zuzendariak; protagonistari bezala, urte asko kanpoan egon ondoren etxera itzultzeak eta dena aldatuta dagoela ikusteak sortzen dituen sentimenduak. Aldi berean, familiarteko harremanei eta familia-kide zaharrenen zaintzari buruz gogoeta egin nahi izan du.

Nik ez dut zuzendariak aipatutako gai eta hausnarketarik aurkitu. Film zuzena da, era egokian zuzenduta dago, eta abiapuntu interesgarria du, baina ez dakit nor den protagonista, ez dakit zer nahi duen, eta ez dirudi inolako motibaziorik duenik. Hori dela eta, Yangen filmak bata bestearen atzetik doazen sekuentzia multzo bat dirudi eta, amaitzerako, ez dakigu zer kontatu nahi izan duen. Lehen sekuentziak, Pekinen gertatzen direnak, zuzendariak aipatutako familiarteko harremanei buruz hausnartzeko abiapuntu indartsua badira ere, filmak aurrera egin ahala gogoeta hori desagertuz joango da, zentzua galtzen duen arte.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna