Albistea entzun

Lehen pausoa eman dute

Kataluniako Parlamentuko presidente aukeratu dute Laura Borras. Independentistek zazpi eserlekuetatik bost izango dituzte mahaian. CUPek adostasun falta kritikatu du
Laura Borras, Kataluniako Parlamentuko presidente hautatu berritan, atzo, Bartzelonan.
Laura Borras, Kataluniako Parlamentuko presidente hautatu berritan, atzo, Bartzelonan. QUIQUE GARCIA / EFE Tamaina handiagoan ikusi

Iosu Alberdi -

2021eko martxoak 13

Kataluniako Parlamentuaren «duintasuna berreskuratzeko» eta hura «instituzio burujabe bat bihurtzeko» lan egitea. Eginbehar horiek izango dituzte independentistek legealdi berrian. Hala adierazi zuen atzo Laura Borras parlamentuko presidente izendatu berriak. XIII. legealdian erdietsi duten lehen akordio handiak parlamentuko mahaiko zazpi eserlekuetatik bost eman dizkie independentistei. Halere, ez da denen gustuko adostasunik izan, eta CUPeko Laia Estrada diputatuak lehen abisua eman du: «CUP batzeko dago, eta ez inposizioak betetzeko». Lana dute, beraz, aurretik, Kataluniako Gobernuaren osaera adosteko.

Parlamentuko presidente kargua hartu berritan, Borrasek «politikaren judizializazioari» aurre egiteko asmoa adierazi zuen, eta gaineratu parlamentuko eztabaidetan ezarriko diren muga bakarrak «demokraziak» ezartzen dituenak izango direla: «Gure betebeharra da parlamentu honen bortxaezintasuna eta independentzia mantentzea, ez baimenduz beste botere batzuen esku hartzeak». Hala, JxCko kidearen esanetan, legealdi berriak «inflexio puntu bat ezarri behar du Kataluniaren independentziara bidean».

Borrasekin oso kritiko agertu ziren alderdi unionistak. Voxek «onartezintzat» eta «sektariotzat» jo zuen haren hitzaldia; PPk, «eredugarritasun falta» kritikatu zion, haren aurka martxan den prozesu judizialagatik; eta Ciutadanseko diputatuek, zuzenean, auditoriumetik martxa egin zuten hitz egiten hasi zenean.

PSCko zerrendaburu Salvador Illaren hitzak ez ziren adeitsuagoak izan. Espainiako Osasun ministro ohiak «tamalgarritzat» jo zuen parlamentuko presidentearen lehen hitzaldia, eta gaineratu zuen haren gidaritzapean Kataluniako egoera politikoak «kroniko bihurtzeko arriskua» duela.

En Comu Podemeko buru Jessica Albiachek, berriz, ERC kritikatu zuen, «1980tik egon den parlamentu ezkertiarrena dagoenean» Borrasen aldeko hautua egiteagatik.

Gobernu akordioa, airean

Independentismotik ere ez zen iritsi Borrasek esperotako babesik. ERCko buru Pere Aragonesek zoriondu zuen, baina burua hurrengo eginbeharrean jarrita, gobernuaren osaeran: «Gaur, berreraikuntza ekonomiko eta soziala bultzatzeko, eta autodeterminazioaren eta amnistiaren alde borrokatzeko gobernu indartsu bat izan behar duen legealdi bati eman diogu hasiera».

Akordio hori, ordea, oraindik ixteko dago. Hala esan zuen atzo, Kataluniako presidente ohi eta JxCko buru Carles Puigdemontek, Punt Avui egunkariak eginiko elkarrizketan: «Ezin dugu jakintzat jo gobernua osatzeko elkar ulertuko dugunik».

Bien arteko akordioa erdietsita ere, beste baten beharra dute. CUP, baina, kritiko agertu da orain arte ERCk eta JxCk izan duten jarrerarekin. Izan ere, azken egunetan, alderdiak jakinarazi zuen parlamentuko mahaiak gehiengo independentista izatea erraztuko zuela, baina inolaz ere ez zuela bozkatuko Borrasen alde.

Behin hark Kataluniako Parlamentuko Presidentetza eskuratuta, Albert Botran CUPen Espainiako Kongresuko diputatuak JxCko kidearen jarrera kritikatu zuen. Zehazki, hitzaldian Roger Torrent Parlamenteko presidente ohia eta CUP «nahita» ez aipatu izana leporatu zion: «Batasuna ez da lelo bat; eraiki egin behar da». Antzera mintzatu zen Laia Estrada parlamentaria ere, eta adierazi legealdia «Parlamentuko Presidentetza adosterik lortu gabe hastea kezkagarria» dela.

Vox mahaitik kanpo

ERCren eta JxCren artean 64 boto eman zizkioten Borrasen hautagaitzari, PSCko Eva Granadosek jasotakoak baino hamalau gehiago. Izan ere, independentisten artekoa ez zen izan eguneko akordio bakarra. Granadosek, sozialisten babesaz gain, En Comu Podem, Ciutadans eta PP alderdietako diputatuena ere jaso zuen. Boto horiek nahikoa izan ziren bigarren presidenteordetza eskuratzeko. Lehena, berriz, ERCko Anna Caudarentzat izan zen, independentisten akordioa tarteko.

Lehen bi bozketetan CUPek zuri bozkatu arren, idazkariak izendatzeko garaian, ERCk eta JxCk haren hautagaitza babestu zuten. Hala, CUP lehen aldiz sartu da mahaian. Mugimendu horrek, gainera, Voxek eserleku bat izatea ere eragotzi du. Horiek hala, idazkariak, lehenengotik laugarrenera, ondorengoak izango dira: Ferran Pedret (PSC), Jaume Alonso Cuevillas (JxC), Pau Juvilla (CUP) eta Ruben Wagensberg (ERC).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Sua eta kea Gazan, bart, Israelgo Armadaren bonbardaketen ondorioz. ©Haitham Imad / EFE

Nazioarteko Zigor Auzitegiak ez du baztertzen Gazaren aurkako erasoaldia "gerra krimena" izatea

Julen Aperribai - Paulo Ostolaza

Tel Avivek gutxienez 48 lagun hil ditu Gaza bonbardatzen hasi zenetik, tartean 14 haur. Hamasek suziriekin erantzun dio, eta sei lagun hil ditu. NBEk proposatutako su-etenari ezezkoa eman dio Israelek.

<b>Boris Johnson lehen ministroa, Downing Streeteko 10. zenbakitik irteten, atzo.</b> ©VICKIE FLORES / EFE

Ipar Irlandan aritutako soldaduak epaitzea galarazi nahi du Londresek

Iosu Alberdi

Ostiral Santuko Akordioaren aurreko gertaerei eragingo lieke legedi berriak; 2.000 kasu inguru
Etxegabetzeen aurkako protesta bat, joan den martxoan, Madrilen. ©LUCIA FRANCO

Hogei urte aterpe bila

Lucia Franco

NBEk bosgarrenez zigortu du Espainia, Madrilgo familia kaltebera bat etxerik gabe uzteagatik, eta sei hilabeteko epea eman dio halakorik ez gertatzeko protokolo bat aurkeztu dezan.

Manifestazio bat, joan den astelehenean, Bogota hiriburuan. ©MAURICIO DUEÑAS CASTAÑEDA / EFE

Negoziazioetan urratsik egin nahi ez izatea leporatu diote Bogotari

Arantxa Elizegi Egilegor

Barne ministroak «terrorista infiltratuei» egotzi dizkie istiluak. Calin izan da Duque presidentea

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.