Albistea entzun

Pasaiako segada argitzeko eskea egingo diote Jaurlaritzari

Biktimen senideek sumina adierazi dute «hiru urteko lana lapurtu dietelako». Etzi, sarraskian parte hartu zuten polizietako bat identifikatzeko proba egingo dute auzitegian
Ekitaldia atzo, Azpeitian.
Ekitaldia atzo, Azpeitian. GOTZON ARANBURU / FOKU Tamaina handiagoan ikusi

Gurutze Izagirre Intxauspe -

2023ko martxoak 26

Pasaiako segadaren biktimen senideek haserrea adierazi dute, aste honetan ezagutarazi duten Jaurlaritzaren txostenaren berri oraintsu arte izan ez dutelako, eta auzia argitzeko «konpromisoa eta epeak» exijituko dizkiote Eusko Jaurlaritzari. Ekitaldi bat egin zuten atzo, Azpeitian (Gipuzkoa), sarraskiaren 39. urtemugaren harira; han adierazi zuten duela egun gutxi jasotako informazioak eragin dien ezina. Izan ere, 39 urte bete berri dira Espainiako Poliziak segada bat egin zuenetik Pasai Donibanen (Gipuzkoa) eta Komando Autonomo Antikapitalistetako lau kide hil zituenetik: Pedro Mari Isart, Dionisio Aizpuru, Rafael Delas eta Jose Maria Izura. Auzia argitzeko dago. EHU Euskal Herriko Unibertsitateko Unesco giza eskubideen eta botere publikoen katedrak egin zuen ikerketa txosten bat, Eusko Jaurlaritzaren Giza Eskubide, Bizikidetza eta Lankidetza Idazkaritzak eskatuta. Besteak beste, txostenaren ondorioa da ez zela «ikerketa judizial eraginkorrik egon», eta «epaiketarik gabeko exekuzioaren» hipotesia irekitzen du. Zantzuak, honatx: autopsiak, hildako gazteek armak erabili zituztela frogatu ez izana, bertsio ofiziala gezurtatzen edo zalantzan jartzen duten testigantzak, operazioan parte hartu zuten agenteen nortasuna isilpean gorde izana, eta Poliziaren arduradunen ahaleginak auzibidea «atzeratu eta oztopatzeko», besteak beste.

Aitortza eske dabiltza geroztik biktimen senideak: «Gure gurasoek ere aitortza merezi zuten». Atzo, Pello Aizpuruk ekitaldian hitza hartu zuen senideen izenean, eta adierazi zuen bide horretan Jaurlaritzarekin izandako harremana «gazi-gozoa» izan dela. «Lehen bilera bat jartzea ere asko kostatu zen», eta 2019an lortu zuten, eta auzia bidera zitekeela helarazi zieten, baina ez zuten beste berririk izan iragan martxoaren 3ra arte.

«Nork ezkutatu du?»

Jaurlaritzaren teknikariek osatutako batzorde batekin bildu ziren. «Oso ondo hartu gintuzten, eta oso eroso sentitu ginen». Bileraren amaieran eman zieten txostena. Adierazi zuten minduta sentitu zirela irakurri zutenean, informazio hura oraintsu arte eskura ez izateagatik. «Txosten horrekin hiru urtean lana egiteko aukera lapurtu digute, eta batzordeari ere ez zioten eman txosten hori. Norbaitek hori nahita ezkutatu du», Aizpururen esanetan. Gisa horretako beste hiru txosten egin ditu Jaurlaritzak. Perturrena, Donibane Lohizunen desagertutako hiru gazte galiziarrena eta Naparrarena, eta kasu horiek publikoki aitortu eta senideei eman diete ikerketaren ondorioen berri. «2020ko martxoko data du azken hark ere», Aizpuruk esan zuenez. Laugarrena, Pasaiako sarraskiarena, «nork erabaki du Eusko Jaurlaritzan kaxoi batean sartzea? Hauek al dira biktima guztiak berdin tratatzen dituztenak?», esan zuen. Aurrera begira, bi eginbehar hartu dituzte: Eusko Legebiltzarreko giza eskubideen batzordera jotzea, alderdi politikoek zer jarrera duten azal dezaten; eta Eusko Jaurlaritzara: «Jaurlaritzara exijitzera joango gara. Konpromisoak eta epeak eskatzera joango gara».

Esker hitzak ere izan zituen Azpeitiko Udalarekiko eta oroimen ekitaldian urtez urte aritzen direnekiko. Beste eskaera bat egin zien bildutakoei: etzi, identifikazio proba egingo dute Donostiako Instrukzioko 2. Epaitegian, eta sarraskian parte hartu zuten polizietako baten bat identifikatzen ahaleginduko da Joseba Merino, segadatik bizirik irten zen militante bakarra. Auzitegi aurrean elkarretaratzea egingo dute. «Ez gaude prest inpunitatean uzteko 113 bala zulo horiek».

Urola Erdiko Kontseilu Sozialistak antolatuta ere, ekitaldia egin zuten atzo eguerdian, Azpeitian, eta Merino bertan izan zen. «Estatu kapitalista zapaltzaileak militante iraultzaileen aurka erabiltzen duen basakeriaren sinboloetariko bat» dela esan zuten. Elkarretaratzera deitu dute etziko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Indarkeria matxistaren aurka, sanferminak hasi aurreko manifestazioa, Iruñean, artxiboko irudi batean. ©IDOIA ZABALETA / FOKU

Bortxaren harea mugikorretan

Jone Arruabarrena

Gasteizko azken hilketa matxistaren harira, eztabaida piztu da babes neurrien eta biktimen gaineko arriskua neurtzearen garrantziaren inguruan. Egungo protokoloak «hutsuneak» dituela diote adituek
 ©ARITZ LOIOLA / FOKU

«Andre askok ezin dute harreman hori moztu»

J. Arruabarrena

Mendekotasun emozionala sortzea da indarkeriazko harremanen ezaugarrietako bat. Norma Vazquezek azpimarratu duenez, garrantzitsua da hori kontuan hartu eta emakumea errudun ez bihurtzea.
 ©GORKA RUBIO / FOKU
Jaurlaritzako Segurtasun sailburu Josu Erkoreka, Tourrarekin lotutako plana azaltzen. ©IREKIA

Erkorekak esan du Ertzaintzako lan gatazkak ez duela Tourra baldintzatuko

Iosu Alberdi

Uztailaren 1etik 3rako «segurtasun publikoaren gida plana» aurkeztu du Segurtasun sailburuak: 1.700 ertzainek parte hartuko dute egunero. Ertzainak Borrokan plataformak, berriz, Urkulluri leporatu dio gatazkari konponbide bat bilatzeko aukera galtzea

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...