Berri Txarrak-en kontzertuaz saio berezia egingo du Hamaikak, bihar

Kobetamendiko emanaldiko giroa, kanta batzuk eta zenbait elkarrizketa jasoko ditu lanak
Gaur eta azaroa bitartean jasotako irudiekin lan luzeago bat egitea pentsatzen ari da Hamaika.
Gaur eta azaroa bitartean jasotako irudiekin lan luzeago bat egitea pentsatzen ari da Hamaika. MONIKA DEL VALLE / FOKU

Edu Lartzanguren -

2019ko uztailak 14
Gaur arratsaldean, agurtzeko birako udako kontzerturik handiena emango du Berri Txarrak taldeak, Kobetamendin (Bilbo), eta han egongo da Hamaika Telebista. Kateak saio berezia emango du hurrengo egunean, 20:30ean. Horretan, kontzertuko irudi batzuk emateaz gain, protagonistei eginiko elkarrizketak eta bestelakoak tartekatuko dituzte.

«Taldeak dimentsio oso handia hartu du, batez ere etenaldi mugagabea iragarri zuenetik; horregatik erabaki dugu saio berezia egitea», esan du Hamaika Telebistako Beñat Zarrabeitiak. «Udako ekitaldi kulturalik handiena izango da Euskal Herrian. Milaka lagun bilduko dira Kobetamendin, eta horrek albistegarritasuna ematen dio kontzertuari». Horrek guztiak justifikatzen, du, Zarrabeitiaren arabera, bihar ekitaldia «patxada puntu batekin» lantzea.

Berri Txarrak lagun artean izango du izenburu saioak, hau da, kontzertuak izango duen izen bera. Ordu erdiko lana izango da. Giroko irudiak, zaleei eginiko elkarrizketa labur batzuk, eta kontzertuan grabatu ahalko dutena erakutsiko dute saioan. Horrekin batera, agertokiaren atzean musikariekin grabaturiko elkarrizketak tartekatuko dituzte. Kontzertuaren aurretik, Ahotsenea gunean zortzi talde gazte arituko dira, eta horretan grabaturiko irudiak eta elkarrizketak sartuko dituzte.

Ostiralean, Berri Txarrak-eko abeslari Gorka Urbizuri eginiko elkarrizketa zabaldu zuen Hamaika Telebistak, eta horren pasarteak ere erabiliko dituzte asteleheneko saioan. «Kontzertuaz esaten dituenak ez ditugu sartuko, noski, ordurako pasatuta egongo direlako», esan du Zarrabeitiak. Izan ere, duela lau egun grabatu zuten elkarrizketa. «Baina etorkizunari begira eta taldearen dimentsioaz esaten dituenak bai, horiek sartu egingo ditugu».

Lau kazetari bidaliko ditu Hamaikak Kobetamendira. Sarean ere jarraipena egingo dute. Kontzertuaren grabazioa agertokiaren aurreko zulogunetik egin beharko dute, eta hiru kanta baino ezingo dituzte jaso.

Koldo Otamendik zuzenduko du saioa. Musika Zuzenean saioko aurkezle eta zuzendaria da. «Berak ezagutzen du inork baino hobeto musika eszena», esan du Zarrabeitiak. Laguntzaile gisa ibiliko da Zarrabeitia, Maddi Mochales eta Nagore Sarasolarekin.

Dokumental bat aukeran

Kontzertua «esperimental samarra» izango dela esan du Urbizuk, eta Hamaikan ere ez dakite oraindik oso ondo zer aterako den jasoko duten materialetik. Edonola ere, Zarrabeitiak esan du irudi asko hartuko dituztela, eta ez du baztertu azaroan Nafarroa Arenan emango duten azken kontzertuarekin eta iaz BECen eginikoarekin «zerbait luzeagoa» egiteko aukera. «Nire ustez, fenomenoak emango du azaroa bitartean gehiagorako, ikusten ari garelako sarrerak berehala agortzen dituztela, eta ikusminak gora egingo duela uste dugu. Izango dugu materiala azaroan zerbait txukuna egiteko».

Marino Goñi ekoizleak aurrekoan ETBko Ur Handitan saioan esandakoak gogoratu ditu kazetariak: Hertzainak, Negu Gorriak eta Berri Txarrak direla «euskal rockaren hirutasun saindua». Berri Txarrak-ek belaunaldiak lotzeko izan duen ahalmena eta utziko duen ondarea nabarmendu du Zarrabeitiak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna