Musika

Ezustean, eta protestan

Drive by Truckers taldeak 'The New OK' eman du argitara, aurten kaleratutako bigarren lana. Hegoaldeko ukitua duen rocka dute oinarri protesta kutsuz betetako kantuek.
Ezker-eskuin, Brad Morgan, Patterson Hood, Matt Patton, Mike Cooley eta Jay Gonzalez.
Ezker-eskuin, Brad Morgan, Patterson Hood, Matt Patton, Mike Cooley eta Jay Gonzalez. ANDY TENNILLE Tamaina handiagoan ikusi

Aitor Biain -

2020ko urriak 18

Hamar hilabete ere ez dira Drive by Truckers taldeak The Unraveling diskoa kaleratu zuenetik. Zehazki, urtarrilaren 31n kaleratu zuen AEBetako taldeak estudioko hamabigarren lana, baina, pandemiaren ondorioz, bertan behera utzi behar izan zituzten hura aurkezteko kontzertuak oro; tartean, iragan ekainean, Gasteizko Azkena Rock jaialdian ematekoa zirena. Horrek guztiak sortutako «ezinegonak» eta «frustrazioak» eraginda, eta, bereziki, Amerikako Estatu Batuetan duten egoera politiko eta sozial aldrebesak bultzatuta, disko berri bat plazaratzea erabaki dute: The New OK.

Patterson Hood, Mike Cooley, Brad Morgan, Matt Patton eta Jazy Gonzalezek osatutako boskoteak urte berean argitaratzen duen bigarrena lana da. Disko berriak badu, hala ere, aurrekoarekin lotura bat, segida bat. Izan ere, The New OK diskoa osatzen duten bederatzi kantuetatik sei The Unraveling diskorakoak hautatzean baztertutakoak dira. 2018ko udazkenean grabatu zuten disko hura, Menphisko (AEB) Sun estudioetan, Matt Rossen eta David Barberen gidaritzapean, eta orduan grabatu zituzten gainerako kantuak ere. Badira konfinamendu garaian sortutako pieza berriak ere. «Egin dezakegun guztia da», adierazi dio Patterson Hood abeslari eta gitarristak Rolling Stone aldizkariari; alegia, sortutako lanak munduan zehar eta kontzertuz kontzertu erakusteko aukerarik izan ezean, sortzen segitzea beste aukerarik ez dutela. COVID-19ak sortzaileengan eragin dituen ondorioen erakusle da.

Abuztuaren lehen egunetan otu zitzaien disko berri bat argitaratzeko ideia, eta Hood bera arduratu da kanta berrietako bat konposatzeaz. Azaldu duenez, bere lehen zirriborroa taldekide guztiei pasatu zien nork bere ekarpenak egiteko eta ideiari forma emateko, eta grabaketa ere modu berean egin zuten, kide guztiak elkartzeko zituzten arazoak zirela eta. «Dibertigarria izan da», adierazi du Cooleyk. «Tarte gehiago izan dut nire zatian pentsatzeko, ez bainuen beste zereginik». Harena da diskoko bigarren pieza berria, hain zuzen ere.

Hegoaldeko ukitua duen rockak eta AEBetako gizartearen erroetan sakontzeko abileziak ezaugarritu ditu Drive by Truckers taldearen jarduna orain artean, eta estudioko hamahirugarren lanak ere ez dio ildo horri muzin egiten. Donald Trump presidenteari, arrazakeriari eta eskoletako tiroketei kritika gordinak egin zizkieten The Unraveling diskoan, esate baterako, eta The New OK lanak ere badu protesta kutsu horretatik zerbait, nahiz eta, haren aldean, disko berria «baikorragoa» izan, Hoodek berak adierazi duenez.

Ramonesen bertsio bat

Hala, Watching the Orange Clouds kantuak, esaterako, poliziak hiltzeraino ito zuen George Floyd afro-amerikarra du gogoan. Gertakariak alderik alde astindu zituen AEBak, eta protesta eta istilu ugari eragin zituen. Sarah's Flame kantuak, berriz, Sarah Palin politikaria du jomugan, Alaskako gobernadore izandakoa eta John McCain AEBetako presidentegai errepublikanoak bere presidenteorde izan zedin nahi zuena. Country doinu lasai baina ironiko eta garratz batekin gogora dakarte arrazakeriaren sua piztearen erantzulea nor den. Zerrendan sar daitekeen beste adibideetako bat Ramonesen The KKK Took My Baby Away-en moldaketa da.

Kantu gehienak gordinak eta indartsuak dira, eta taldeak bere dituen rock, country eta blues doinuak uztartzen dituzte. Diskoaren izen berekoThe New OK eta The Distance piezak dira horren adibide. The Perilous Night eta Sea Island Lonely, ostera, gehiago lerratzen dira soulera. Abenduan kaleratuko dute disko fisikoa, baina sarean entzun daiteke dagoeneko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©MAIALEN ANDRES / FOKU

«Lasai aztertu behar da egoera hau, onik aterako bagara»

Amagoia Gurrutxaga Uranga

Ordu eta erdi pasatxoko errepasoa kantu propioei: hori da 'Ezezagunak' kontzertua, kantariarentzat. Bere buruari egindako opari gisa prestatu du, eta bihar emango, Donostiako Viktoria Eugenia antzokian, musikari taldea lagun.
Plateruena berriro irekitzea lortu duen taldea, dinamikaren aurkezpenean. ©BERRIA

Itxaropenari lekua egin nahian

Gotzon Hermosilla

Plateruena berriz irekitzea xede duen dinamika bat antolatu dute. «Bide luze baten hasiera da»

Txillardegi Liburutegia ekimenak jarritako afixa, hiriko liburutegiaren sarreran. ©BERRIA

Donostiako Liburutegiari Txillardegi izena jartzeko eskaera berretsi dute

Berria

Bihar omenaldi bat egingo diote idazle eta linguistari, bere heriotzaren bederatzigarren urteurrenean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.