Albistea entzun

Koronabirusa

«Osasun publikoaren aurkako delitua» izango da gaixorik bozkatzea

Sorburua Ordizian duten lau kasu berri agertu dira, eta Tuterakoarekin lotutakoak 34 dira guztira
Hauteskunde eguneko bozkalekuak prestatzen ibili ziren atzo Ordizian (Gipuzkoa).
Hauteskunde eguneko bozkalekuak prestatzen ibili ziren atzo Ordizian (Gipuzkoa). JON URBE / FOKU Tamaina handiagoan ikusi

Edurne Begiristain -

2020ko uztailak 12 - Gasteiz

Araban, Bizkaian eta Gipuzkoan COVID-19a duten herritarrek ezin izango dute gaur botorik eman Eusko Legebiltzarrerako hauteskundeetan. Atzo, Eusko Jaurlaritzak berretsi egin zuen azken orduetan zabaldutako mezua: gaixotasunagatik «mugikortasuna mugatua» duten herritarrak ezin izango dira gaur etxetik atera eta bozkalekuetara joan. Eta abisua bidali zien pertsona horiei: «Osasun publikoaren kontrako delitu bat» egingo lukete bozkatzera joanez gero, gainerako pertsonen osasuna arriskuan jarriko luketelako.

Koronabirusaren azken datuak eta gaurko hauteskunde deialdiari buruzkoak jakinarazteko, elkarrekin agertu ziren atzo komunikabideen aurrean Nekane Murga eta Estefania Beltran de Heredia Osasun eta Segurtasun sailburuak, hurrenez hurren. Koronabirusa duten herritarrei ezarritako debekuaren inguruan galdetuta, Murgak argudiatu zuen «osasun publikoko» arrazoiengatik dela, eta berdin jokatzen dela bestelako gaixotasun infekzioso batzuk dituzten gaixoekin ere. Mugikortasuna mugatzea «guztien onerako» dela azpimarratu zuen Murga sailburuak, eta «norberaren ardura» dela botoa ematera ez joatea: «Herritar guztiek dakite zer den positibo ematea, eta gainerakoen osasuna arriskuan jar dezaketela. Arduraz jokatzea ezinbestekoa da».

Eusko Jaurlaritzak ez du aurreikusi bestelako alternatibarik gaixorik dauden pertsonei boto eskubidea bermatzeko. Beltran de Heredia Segurtasun sailburuak zehaztu zuen legeak ez duela horretarako aukerarik jasotzen. Haren esanetan, gobernuak ez die boto eskubidea ukatu COVID-19a duten pertsonei; etxetik irtetea dutela galarazia, eta, ondorioz, aurrez posta bidezko botoa eskatu ez badute ezin izango dutela gaur botoa eman. «Botoa emateko bi aukera baino ez daude: aurrez aurre hauteskunde egunean, edo posta bidezko botoaren bitartez: eta horretarako epea amaitu egin da», gogorarazi du, gainera, Beltran de Herediak.

Denera, 160 lagun inguruk ezin izango dute euren botoa eman gaur. Une honetan COVID-19a dutela baieztatu dietenak dira horiek. Kopuru horrek, ordea, ez du bat egiten gaur egun koronabirusagatik ospitaleratuta dagoen eri kopuruarekin. Murgak arrazoitu zuenez, erietxean dauden gaixo ugarik izan badute botoa emateko aukera, COVID-19agatik ospitaleratuta izan arren jada hura zabaltzeko aukerarik ez badute. Kasu horietan, gaixo bakoitza artatzen duen mediku taldeak aztertu beharko luke eria prest dagoen edo ez bozkalekura joan eta berriz ospitalera itzultzeko.

Bozak direla eta, Espainiako Hauteskunde Batzordeak ohar bat kaleratu zuen atzo ontzat joz Eusko Jaurlaritzako Osasun Sailak gaurko ezarritako osasun neurriak, eta, modu horretan, alboratu egin zuen Elkarrekin Podemosek gaixo daudenen boto eskubidea bermatzeko eskatuz aurkeztutako errekurtsoa. Hauteskunde Batzordeak uste du Jaurlaritzaren erabakia «proportzionala» dela, eta herritarren osasun eskubidea «bermatzen» duela.

Beste 58 kasu

Jaurlaritzako Osasun Sailak jakinarazi duenez, izurriaren aurkako azken zenbaketan, COVID-19a duten beste 31 positibo atzeman dituzte PCR proben bidez: bi Araban, hamabi Bizkaian eta hamazazpi Gipuzkoan. Gainera, herritar bat hil da koronabirusaren eraginez. Ordiziako (Gipuzkoa) agerraldiari lotutako kasuei dagokienez, orain arte atzemandakoak 70 dira; eta horietatik 45 dira herrian bertan egindako PCR probekin atzemandakoak. Azken orduetan lau kasu berri baieztatu dituzte han, baina beste hiru kendu dituzte orain arteko zenbaketetatik, foku harekin lotuta ez daudelakoan. Horiek Lleidako (Herrialde Katalanak) foku batekin lotuta egon daitezke, Murgaren esanetan.

Nafarroako osasun agintariek ere eman zuten atzo azken datuen berri; Tuteran hiru kasu gehiago atzeman dituzte, eta dagoeneko 34 dira positiboak. Gainera, Iruñean beste agerraldi bat atzeman dute, eta zortzi positibo agertu dira. Joan den astelehenean Iruñean egindako hamaiketako batekin lotu dituzte positibo horiek. Kasu horiei dagokienez, positibo gehienak gazteak direla jakinarazi du gobernuak. Guztira, Nafarroan beste 27 positibo atzeman dituzte azken orduetan, baina ez da hildakorik egon koronabirusaren eraginez.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Donostia ospitalea, artxiboko irudi batean. ©JON URBE / FOKU

Lehen azterketen arabera, Donostian ospitaleraturiko andreak ez du ebolarik

Edurne Begiristain Arantxa Iraola

Eria ondo dagoela eta herritarrentzako arriskurik ez dela esan du Xabier Zubeldia medikuak. Gaitz tropikaletarako protokoloa martxan dute
Nekane Arratibel irakasle eta ikertzaileak <em>Zer behar dute gazteek?</em> jardunaldietan parte hartu zuen atzo, Bilbon. ©OSKAR MATXIN EDESA / FOKU

Euskara, gazteen ikuspegitik

Olatz Silva Rodrigo

Lehen mailako ikasleen profil linguistikoa ezagutzeko ikerketa egin du Mondragon Unibertsitateak. Azterlanaren arabera, testuinguruak eragina dauka gazteen hizkuntza ohituretan eta hautuetan
 ©OSKAR MATXIN EDESA / FOKU

«Periferia maiz deserosoa da, eta injustizia ere bada»

Gotzon Hermosilla

Euskarari eta euskal kulturari dagokionez periferian dauden gazteek «euren zentroak» sortzen dituztela azaldu du Jauregizuriak, eta hori «balioetsi» behar delakoan dago.
Maialen Mazonen hilketa salatzeko astelehenean Gasteizen egin zuten elkarretaratzeko irudi bat. ©JAIZKI FONTANEDA / FOKU

Indarkeria matxistaren biktimak babesteko protokoloa gogortu dute

Javi West Larrañaga

Gasteizko hilketagatik aldatu dute protokoloa Araban, urruntze agindua urratzen dutenak atxilotzeko, Bizkaian eta Gipuzkoan egiten den legez

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.