Albistea entzun

Baionako herriko kontseiluak Etxegarai izendatu du auzapez

Axuantak izendatu dituzte. Elkargoko lehendakaritzara aurkeztuko den «gogoetatu» behar du
Jean Rene Etxegarai, atzo egin zuten ekitaldian, herriko kontseiluan.
Jean Rene Etxegarai, atzo egin zuten ekitaldian, herriko kontseiluan. GUILLAUME FAUVEAU Tamaina handiagoan ikusi

Oihana Teyseyre Koskarat -

2020ko uztailak 5 - Baiona

Baionako elkarteen etxean bildu ziren atzo hautetsi guztiak, eta ofizialki izendatu zuten auzapeza. Aurreko sei urteetan bezala, Jean Rene Etxegarai izango da Baionako auzapeza. Berrogeita bost hautetsietatik berrogeita hiru bildu ziren lehen kontseilura. Gehiengoa Jean Rene Etxegaraien zerrendako 38 hautetsik osatzen dute. Oposizioan Henri Etxetoren (PS) zerrendako zazpi hautetsi daude, eta Mathieu Bergeren zerrendako hiru. Herriko bozen bigarren itzulian, Jean Rene Etxegarai zentro-eskuineko hautagaiak 1.027 bozen aldea atera zion Henri Etxeto eta Mathieu Bergek aliantza bidez osaturiko zerrendari. Etxetoren oposizioko taldeak deliberatu zuen bozketan ez parte hartzea, «auzapezaren hautaketa gehiengoari» dagokiola argudiatuta.

Hala ere, emaitza argia izan zen: 38 kontseilarik eman zuten euren botoa; horietarik 35ek bozkatu zuten Etxegarairen alde; beste hiruk, zuri. Etxetok eta Bergek «ohitura errepublikanoa segitzeko xedez», auzapez berria zoriondu zuten. Koronabirusak eragindako osasun egoera izan zuen gogoan auzapezak lehen hitzartze ofizialean, eta eskerrak eman zizkien osasun langileei eta zerbitzu publikoei. Egoera zailei aurre egiteko hiri bat eratzeko beharra azpimarratu zuen, «elkartasunez».

Auzapeza izendatu orduko, axuantak izendatu behar izan zituen kontseiluak. Lehen eztabaida piztu zuen horrek herriko kontseiluan. Etxegaraik Baiona lau auzotan banatzea proposatu zuen, haietako bakoitzean auzoko kontseiluak egiteko, eta lau axuant izendatu. Bergek eta Etxetok ez zuten bat egin zatiketa horrekin, «artifiziala» dela iritzita. Auzapezordeen izendatzeko bozketan ez parte hartzea deliberatu zuten. Hala ere, Etxegaraik proposatutako zerrenda onartu zuen gehiengoak.

Legez, hamahiru axuant ukan ditzake 45 hautetsiz osaturiko kontseiluak, baina, auzoko kontseiluen eratzea onartuz gero, lau axuant gehiago izenda ditzakete auzo bakoitzeko axuant bat. Auzapezordeak nortzuk izanen diren erran bazuten ere, oraindik finkatu beharko dute alor bakoitza nork kudeatuko duen.

Elkargoari so

Etxegarai auzapez izendatu zuten ofizialki atzo, eta ez zen sorpresa handirik gertatu. Euskal Hirigune Elkargorako lehendakaritzara aurkeztuko denez galdetuta, ihes egin zuen auzapez izendatu berriak: «Minutu gutxi pasatu dira auzapez izendatu nautenetik, betebeharreko baldintza bat zen. Bete dut. Elkargora aurkeztuko naizen pentsatuko dut orain. Gogoetatzeko denbora bat behar dut erabakia hartu aurretik. Erabaki inportante eta pisutsu bat da. Lankide askok galdetzen didate nire asmoa zein den».

Uztailaren 17an egingo dute Euskal Elkargoaren lehen biltzarra Baionan, eta lehendakaria hautatzeko bozkatuko dute bertan. Pentsa liteke Etxegarai izango dela hautagai nagusia, orain arte hark eraman baitu kargu hori. 2017an sortu zenean, Ipar Euskal Herriko auzapezen itzulia eginik lortu zuen gehiengoa lehendakari izateko. Ikusteko dago Baionako alkatetzaren eta Elkargoko buruzagitzaren artean aukeratuko duen ala ez, zenbaitek kritikatu izan baitute bi karguetan batera aritzeagatik.

Bestalde, Alain Iriarten hautagaitza aipatu dute batek baino gehiagok, ofizialki aurkeztu ez bada ere. Etxegaraik ez du iritzirik lehia horri begira. «Ez dut erreakzionatu beharrik, edonor aurkezten ahal da elkargorako lehendakaritzara. 233 hautetsi izango ditu; beraz, oraingoz, 233 lehendakari posible ikusten ditut».

Baionan ez ezik, Ipar Euskal Herriko beste hainbat tokitan ere auzapezak izendatu zituzten herenegun eta atzo. Sorpresarik ez zen gertatu Lapurdin: Ziburun, Eneko Aldana; Urruñan, Filipe Aramendi; Uztaritzen, Bruno Karrere; Itsasun, Mikel Hiribarren. Miarritzen, Maider Aroztegi izanen da auzapeza, eta Hendaian, Kotte Ezenarro.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

2021eko Ospa! eguna, Altsasun. ©Maialen Andres / FOKU

Ospa Eguna irailaren 3an egingo dute Altsasun

Oihane Puertas Ramirez

Espainiako polizia indarrak herritik joan daitezela eskatuko dute Altsasun, Poliziarik ez! Langileon aurkako errepresioa gelditu lelopean.

Etxeratek joan den astean Donostian egindako protesta. ©ANDONI CANELLADA/FOKU

Beste sei euskal preso jarri dituzte hirugarren graduan azken hilabetean

Berria

Guztira, 23 presori eman diete hirugarren gradua Eusko Jaurlaritzak espetxeen eskumena hartu zuenetik

Blboko agerraldia ©Monika del Valle / Foku

Preso eta iheslarien egoera «normalizatzeko» eskatuko dute manifestazio baten bidez

Gotzon Hermosilla

Sarek eta Bilboko konpartsek batera antolatuta, abuztuaren 26an egingo dute, Bilbon

Maia: «Prentsaren bidez izan dugu PPren erabakiaren berri»

Maia: «Prentsaren bidez izan dugu PPren erabakiaren berri»

Iñaut Matauko Rada

Maiak PPri egotzi dio koalizioa uzteko modua ez dela «egokia» izan. Esan duenez, Nafarroan zentro-eskuinaren liderra UPN izan da «historikoki», eta ez Alderdi Popularra, Telladok esan bezala

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.