Albistea entzun

Estatu indarkeriaren bost biktimatik lauk ez dute aitortza ofizialik izan

Foro Sozialak txosten bat landuko du, jatorri horretako indarkeriaren biktimei «ahotsa» emateko
Estatu indarkeriaren bitkima ugariren senideak, atzo, Foro Sozial Iraunkorrarekin eginiko bileran.
Estatu indarkeriaren bitkima ugariren senideak, atzo, Foro Sozial Iraunkorrarekin eginiko bileran. IDOIA ZABALETA / FOKU Tamaina handiagoan ikusi

Jon O. Urain -

2019ko martxoak 17

Espainiako Estatuaren estamentu ofizialen indarkeriaren eraginez hildako 364 herritarretatik 82k baino ez dute jaso aitortza ofizialen bat; alegia, %22,5ek, Foro Sozial Iraunkorrak jakinarazi duenez. Hori dela eta, erakunde horrek txosten bat prestatuko du datozen asteetan, estatuaren indarkeriaren biktimen egoera jaso eta ezagutarazteko. Izan ere, uste du biktima horiek bizi izandakoa «ezezaguna» zaiela herritar askori, «urteetako lubakien» ondorioz; hori zuzentzeko, konpromisoa hartu du dokumentu hori landu eta biktimei «ahotsa» emateko. Agiria prest edukitzean, erakundeen eta alderdi politikoen esku utziko dute.

Foro Sozial Iraunkorra osatzen duten eragileetako hemeretzi ordezkarik eta estatuaren hainbat indarkeria motaren biktima izan diren hemezortzi herritarrek bilera bat egin zuten atzo, Donostian, jite horretako indarkeria jasan dutenen errealitateaz mintzatzeko. Hemezortzi horien artean, indarkeria era anitzen biktimen senideek hartu zuten parte: Poliziak, gerra zikinak edota presoak sakabanatzeko eta urruntzeko politiken ondorioz hildakoenak, torturaren biktimak, deportatuta zeudelarik hildakoak...

Foro Sozial Iraunkorraren arabera, topaketaren helburu nagusia izan zen «lehen eskutik» jasotzea pertsona horiek zer egoeratan dauden «biktima izaeraren aitortza ofizialari dagokionez». Era berean, biktima horiei azaldu zien «ezinbestekoa» iruditzen zaiola aitortzarik ez dutenen errealitatea «sozializatzea»: «Beharrezkoa da euskal gatazka esaten zaionaren testuinguruan gertatutako sufrimendu guztiak ezagutzea, ezagutaraztea, aitortzea eta erreparatzea».

«Biktimizazio bikoitza»

Atzoko bileran hitz egindakoarekin, zenbait ondorio bildu zituen Foro Sozial Iraunkorrak. Batetik, biktima horiek «babes soziala» sentitu dutela baina «erabat baztertuta» sentitu direla erakunde publikoen aldetik. Gainera, «biktimizazio bikoitza» nozitu dute, sektore politiko, sozial eta komunikatibo jakin batzuen aurrean «susmagarri» sentitu direlako. Egiari Zor fundazioak atzoko bilkuran aurkeztutako datuei erreparatuta, Foro Sozialak azpimarratu du estatuaren erakundeetatik eratorritako indarkeriaren biktimek «ageriko diskriminazioa» jasaten dutela «aitortzaren eta erreparazioaren» esparruetan: «Guztiz kontziente gara zaila dela maila instituzionalean pausoak ematea Poliziaren indarkeriaren, gerra zikinaren, eskuin muturraren biolentziaren eta beste batzuen biktimen aitortzan».

Aitzitik, Foro Sozial Iraunkorrak uste du aitortza hori «beharrezkoa» dela eta ekarpena egingo liokeela «elkarbizitza demokratikoari»: «Soilik indarkeria bakarra egon dela dioten sektore negazionisten kontakizuna apurtzea ahalbidetuko luke». Kontakizun horrek «oinazea» eragiten die biktimei, eta «berriro egiten ditu biktima», Foro Sozial Iraunkorraren esanetan. Horrez gain, aitortza horrek «egia poliedrikoa marrazten» lagunduko luke, «errealagoa eta gizarteak sufritutako esperientzietara egokituagoa».

Eusko Legebiltzarrean eta Nafarroako Parlamentuan tramitazioan dira Poliziaren indarkeriari buruzko legeak, Espainiako Auzitegi Konstituzionalak atzera bota eta gero bi legebiltzarrek aurrez onartutako arauak. Herenegun, esaterako, Eusko Legebiltzarreko Giza Eskubideen Batzordean onartu zuten 2016ko araua aldatzen duen txostena. Eztabaida fasean dauden legegai horiek «aurrerapausotzat» dauzka Foro Sozial Iraunkorrak, uste baitu baliagarriak izango direla biktima batzuei aitortza emateko, baina arbuiatu du ez duela guztientzat balioko: «Ildo horretan, ikusi dugu ezinbestekoa dela lanean jarraitzea, ortzimugak, perspektibak eta lan markoak zabaltzea, eremu inklusibo, plural eta zabal bat lortzeko, indarkeria guztien biktimek lekua izan dezaten». Horretarako, premisa bat jarri du erreferentzia gisa: «Urraketa berdinentzat, aitortza bera».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Bilboko Aste Nagusian egindako mobilizazioa. ©Oskar Matxin Edesa / Foku

Euskal presoen eskubideen alde mobilizatuko dira bihar, Donostian

Berria

Sare Herritarrak egun osoko egitaraua prestatu du. Manifestazioa 12:00etan hasiko da, Pio XII.a etorbidetik. 

Frantziako Poliziaren kontrola  Irun eta Hendaia arteko mugan ©Bob Edme

Frantziak Bruselari eskatu dio atzera ditzala mugetako kontrolak 2023ko apirilera arte

Ekhi Erremundegi Beloki

Kontrolak zorroztu dituzte azken urteetan, eta Ipar eta Hego Euskal Herriaren arteko zortzi pasabide itxi zituzten 2021eko urtarrilean. Horiek irekitzeko eskatu diote erakundeetako ordezkariek Frantziako Gobernuari aste honetan.

Marisol Garmendia, ostegunean, Donostian. ©Juan Herrero / EFE

Dagoenarekin jarraitu edo lehenera itzuli

Iosu Alberdi

Donostiako PSEko militanteek Garmendia eta Elorza hautagaien artean aukeratu beharko dute igandean. Lehenak Gascoren babesa du; besteak, Itxasorena.

Nikolas Blain eta Anita Lopepe, Baionan egin duten agerraldian ©Bob Edme

Eskaintza politiko berri bat eratu nahi du EH Baik

Ekhi Erremundegi Beloki

Lehen kongresua eginen du azaroaren 26an. Txosten politikoa eta organizatiboa eztabaidatzen hasiko da ondoko egunetan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Jon O. Urain

Informazio osagarria

Iruzkinak kargatzen...