Albistea entzun

Jean Dauger zelaiko harmailen berritzea diruztatuko du elkargoak

Bi oreneko eztabaidaren ondotik, 141 boz bildu ditu alde. Bilera hautetsien erdiekin egitea salatu dute

Baionako Lauga kiroldegian egin zuten batzarra atzo Euskal Hirigune Elkargoko hautetsiek.
Baionako Lauga kiroldegian egin zuten batzarra atzo Euskal Hirigune Elkargoko hautetsiek. BOB EDME Tamaina handiagoan ikusi

Oihana Teyseyre Koskarat -

2021eko martxoak 21 - Baiona

Aurrekaririk gabeko egoera batean egin zuten Euskal Hirigune Elkargoko batzarra atzo. Osasun egoera dela eta, Jean Rene Etxegarai lehendakariak hautetsien erdiak baizik ez zituen deitu: 119 hautetsik baizik ez zuten parte hartu ahal izan. Gainerakoek sarean ikusi ahal izan zuten bilkura, eta ahalordeen bidez bozkatu. Eztabaida eraginik ere, kezka piztu duen proiektu bat onartu dute hautetsiek: Jean Dauger Baionako errugbi zelaiko harmailak berritzeko bi miloi euro emanen ditu elkargoak.

Bi oren baino gehiago iraun zuen eztabaidak. Elkargoak bi milioi euroko diruztatzea ekarriko dio AB Rugby Pro enpresa pribatuari. Proiektuak izaera komunitarioa ote duen zalantzan eman zuten hautetsi batzuek. Gaineratu zuten gai hori arrunt berant txertatu ziola gai zerrendari Etxegaraik, eta, ondorioz, denbora eskasa izan dutela taldeetan eztabaidatzeko. Hala eta guztiz ere, haren alde bozkatu zuen batzarrak: 141 boz alde, 44 kontra, eta 24 abstentzio. Hainbat hautetsik kontra eginen zutela onartu zuten jendaurrean: Peio Etxelekuk, Alain Iriartek eta Mixel Estebanek, kasurako.

Gai horrek ez ezik, testuinguruak berak ere eztabaidak piztu zituen hautetsien artean. Sandrine Derville Angelukoak salatu zuen batzarra ordezkarien erdiekin egiteak zailtasunetan ematen duela «demokrazia». Dudak agertu zituen erabakia zinez egoera sanitarioagatik hartu ote den. Egoitz Urrutikoetxea EH Baiko kideak ere zalantzan eman zuen hautetsien erdiak baizik ez bildu izana. Izan ere, hainbat gai eztabaidatsu aipatu zituzten atzo, tartean Ipar Euskal Herrian 5Gk izanen duen hedapena, Jean Dauger errugbi zelaiarena, eta Mugikortasun Plana.

Espero ez ziren uneetan ere sortu ziren eztabaidak. Claude Olive Angeluko auzapezak kritikatu zuen hautetsi batzuk beren alderdiaren izenean mintzatzea: EH Baiko bozeramaileak, kasurako. Gainera, eskatu zuen hitzaldiak frantsesez egiteko lehenik, «Errepublikaren hizkuntzan», eta ez euskaraz. Filipe Aramendi Urruñako auzapezak «mindurik» hartu zituen erran horiek, eta honela erantzun zion Oliveri: «Euskara da nire ama hizkuntza, eta, batzar honetan, hitzartzeak nire hizkuntzan ere egiten segituko dut». Hainbat ordezkarik txalotu egin zuten.

Esaterako, juridikoki, frantsesez diren hitzaldiek baizik ez dute balio. Baina, zenbait instituziotan, sinbolikoki, euskaraz —edo beste hizkuntza batean— ere egitea onartu dute; besteak beste, Euskal Hirigune Elkargoan.

5Gren hedapena

Aipatu beharreko gai eztabaidatsuen artean, Ipar Euskal Herrian 5Gk izanen duen hedapena ere izan zuten batzarrean. Atzo goizean, 5Gren kontrako kolektiboa elkargoko atarian bildu zen, bere kezkak helarazteko. Martine Bisauta lehendakariordeak segurtatu zuen elkargoak proposamen «handinahiak» egin dituela hedapenaren kontrolatzeko. Lehenik, azpimarratu zuen Frantziako Estatuak duela eskumena arlo horretan; horregatik, estatuari kezkak helarazi nahi dizkiote hautetsiek. Bigarrenik, operatzaileei 5Gren hedapenaren mapa eskatu diote hautetsiek, egoera ezagutzeko. Azkenik, herriko etxeak eta herritarrak informatzen laguntzeko prest agertu da elkargoa. Urrutikoetxeak, EH Bairen izenean, azaldu zuen moratoria bat eskatu zutela, aldarriei «indar sinboliko handiagoa» emateko. Moratoriarik ez denez egin, ez zuten elkargoaren proposamena onartu hautetsi batzuek. Halere, bozaren ondotik, gehienek Bisautak azaldutakoaren alde egin zuten.

Beste zenbait gai ere eztabaidatu zituzten. Mugikortasun Planari oniritzia eman zioten. Buxetaren orientabideez ere aritu ziren: ondoko batzarrean bozkatuko dute, apirilaren 10ean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Marbore tontorrera iritsi berri, argiak kolokatzeko lanetan jarri ziren parte hartzaileak. ©MIKEL EGIBAR

Bide eder bat tontorrera

Iosu Alberdi

Gure Esku-k antolatutako egitasmoa bizitzeko moduak askotarikoak izan dira. Mendi garaiago edo txikiagoetara igo, lagunarteko giroa nabarmendu dute parte hartzaileek.
Bakartxo Tejeria Eusko Legebiltzarreko lehendakariak harrera egin zien Josu Etxaburu eta Amalur Alvarez Gure Esku-ko bozeramaileei ekainaren 22an. ©E. P. / FOKU
Bakartxo Tejeria Eusko Legebiltzarreko lehendakariak harrera egin zien Josu Etxaburu eta Amalur Alvarez Gure Esku-ko bozeramaileei ekainaren 22an. ©E. P. / FOKU
Zurekin Nafarroa koalizio berriaren aurkezpena, atzo. ©ENDIKA PORTILLO / FOKU

Zurekin Nafarroa ezkerreko koalizioa aurkeztu dute

Yasmine Khris

Ahal Dugu, Ezkerra, Batzarre eta independenteen talde bat batu dira, «ezker feminista, berde eta transformatzailearen» indar berria izateko

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...