«Egia zor digute, informazioa»

Zaldibar Argitu-k deituta, manifestazioa egin dute Eibarren, eta erantzukizunak eskatu dituzte
Eibarren (Gipuzkoa) atzo egindako manifestazioak jende dezente bildu zuen. Distantzia fisikoa mantendu zuten parte hartzaileek.
Eibarren (Gipuzkoa) atzo egindako manifestazioak jende dezente bildu zuen. Distantzia fisikoa mantendu zuten parte hartzaileek. JUAN CARLOS RUIZ / FOKU Tamaina handiagoan ikusi

Igor Susaeta -

2020ko uztailak 5

Eibarko (Gipuzkoa) Untzaga plazatik abiatuta, Zaldibar Argitu herri plataformak deitutako manifestaziora bildutakoek isilik egin zituzten lehen metroak, pauso lasaiean. Mobilizazioaren buruan, bi pertsona Joaquin Beltranen silueta irudikatzen duen kartelari eutsiz, eta beste pertsona bat, gauza bera egiten, Alberto Sololuze ordezkatzen duen kartelarekin. Apur bat atzerago zihoazen Verter Recycling 2002 SM enpresaren Zaldibarko zabortegian gertatutako luiziaren ondorioz desagerturiko bi beharginen senideak. Isilik.

Bihar beteko dira bost hilabete zabortegia amildu zenetik, eta plataformak erantzukizunak eskatzeko baliatu zuen atzoko mobilizazioa. «Oraindik ez dituzte mahai gainean jarri», salatu zuen Jokin Bergara bozeramaileak, manifestazioa abiatu aurretik. Iruditzen zaio «eskandalu publiko bat» dela, bai gertatu zena, baita Eusko Jaurlaritzak auzia nola kudeatu duen ere, eta, hortaz, «higiene demokratiko hutsagatik», dimisioak egon behar direla nabarmendu zuen, eta bi izen aipatu zituen: Iñigo Urkullu Eusko Jaurlaritzako jarduneko lehendakaria, eta Iñaki Arriola Jaurlaritzako Ingurumen sailburua. Eta, hain zuzen, «Arriola dimititu!» izan zen isiltasuna hautsi zuten oihuetako bat, baita gero gehien errepikatuetakoa izan zenetako bat ere. Ingurumen Sailak auzian izandako jokabidea «tatxarik gabea» izan dela esan zuen Arriola eibartarrak, maiatzaren 6an.

Asfaltoaren gainean oinez ibiltzeko ez beste edozertarako eguraldia zegoen atzo arratsaldean, baina LAB, ELA eta CCOO sindikatuek babestutako mobilizazio nazionalak jende dezente erakarri zuen Eibarrera. Manifestazioan parte hartu zutenen artean zeuden, besteak beste, Rebeka Ubera EH Bildurekin azkeneko legegintzaldian legebiltzarkidea izandakoa, eta Juan Karlos Izagirre koalizio independentistaren Gipuzkoako batzarkidea.

Manifestazioa bukatu eta Zaloa Urain, Maite Arroitajauregi eta Miren Narbaiza musikari eibartarrek aldarrikapenerako propio sortutako kantu bat interpretatu aurretik, plataformakoek hitza hartu zuten, eta, hasteko, Beltran eta Sololuze izan zituzten gogoan. Amiltzea gertatu zenetik Jaurlaritzak izandako jarrerarekin kritiko agertu ziren: «Egia zor digute, informazioa. Herritarron galdera eta aldarrikapenek erantzunak merezi dituzte». Idoia zaldibartarrak otsailaren 6az geroztik egindako mobilizazioetan parte hartu ohi du, eta, hain justu, orduz geroztik «zalantza berdinak» dituztela nabarmendu zuen. «Jaurlaritzak ez du erantzukizuna hartu, eta pilota enpresari pasatu nahi dio». Ezin du ulertu, gainera, PSE-EEk Arriola uztailaren 12ko hauteskundeetarako zerrendetan aurkeztea. «Arduragabekeria bat da».

Enpresa aipatuta, Andoni eta Jose Luis eibartarrei «ulertezina» iruditzen zaie zabortegiaren azpiko aldean zakarrak zigilatzeko Verterrek proposatutako biltegiari jarraipena emateko baimena ematea Jaurlaritzak. «Esaten dute [langileen] bila dabiltzala, eta aprobetxatu dute zabor gehiago sartzeko. Haien interesak defendatzen ditu Jaurlaritzak».

Horregatik, «sare klientelarrez eta laguntxoez osatutako negozioak» bukatzeko exijitu du plataformak. «Hondakinen kudeaketa ezin da saldu. Zabortegien zaintza eta kontrola kudeaketa publikoaren esku uzteko eskatzen dugu».

EBra jotzea, «kuriosoa»

Bergara plataformaren bozeramailearen esanetan, erakundeek «bizkarra» eman diete azkeneko hilabeteotan. Bide batez, «azpimarratu» nahi izan zuen Jaurlaritzak «Bruselara», EB Europako Batasunera, jo duela «babes» bila. «Kuriosoa da... Kristoren kontraesana». Izan ere, aintzat hartu behar da Europako Batzordeak iragarri zuela, maiatzaren 13an, «kasuaren larritasuna ikusita», amiltzea aztertzea. Egun batzuk geroago Josu Erkoreka Jaurlaritzaren bozeramaileak adierazi zuen «lankidetza eskaintza irmoa eta argia» egin ziotela EBri.

Maddi legorretarrak laburbildu zuen Eibarren bildutakoen sentipena. «Senideekin duten jarrera oso mingarria da; eta dena nola kudeatu duten, penagarria».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Raiundo Berri taberan izan zirenak PCR proba egiteko zain, Okendu kultur etxean gaur goizean. ©Gorka Rubio/FOKU

500 positibotik gora atzeman dituzte Hego Euskal Herrian

Berria

Atzo baino 119 kasu gehiago izan dira. Ospitaleratzeak areagotu egin dira azken orduetan.

Lasarte-Oriako klasururako konbentua itxita, gaur. ©Javier Etxezarreta / EFE

Lasarte-Oriako klausurako komentu bateko moja guztiek positibo eman dute

Berria

Hamar izan dira positiboak guztira. Alkateak adierazi du oldarraldia kontrolpean dagoela.

Kutsatze kopuruen azken datuek gora egin dutela ikusita zientzialariak gaineratu du gaitzak “arazo bat” izaten jarraitzen duela. ©Gorka Rubio / FOKU

Bengoak uste du egoera «larria» dela

Aloña Beraza Peña

Ikuskaritza independente bat eskatu dute gertatu dena ikertzeko, egin diren akatsak berriz ere egin ez daitezen eta aurrera begira ikasteko

PCR proba egiten gaur, Donostiako Okendo kultur etxean. ©Gorka Rubio/FOKU

Gasteizko Kilimanjaro diskotekan eta Galdakaoko Muguru tabernan egon zirenei proba egiteko eskatu die Jaurlaritzak

Berria

Gasteizko diskotekan uztailaren 17tik abuztuaren 6ra izan zirenek egin beharko dute testa, eta Galdakaoko tabernan uztailaren 27tik abuztuaren 4ra egon zirenek ere bai.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna