JIRA
Balioan jarri
Sare sozial batean ikusi ditut espresio horren zabalkundearen aurkako mezuak, haien artean Xabier Euzkitzerenak. Arakatu ditut nik ere onlineko orrialdeak, eta egia da maiz, oso maiz, maizegi, agertzen dela, BERRIAko estilo liburuak haren ordez balioa eman edo onartu eta aintzat hartu hobesteko darabilen mezua gorabehera.
Nik uste dut ez dudala inoiz erabili, baina ez da meritu handirik, nire gaztelanian ere ez dagoelako. Kutsaberak gara denok, eta ez dut azkenean neureganatzea baztertzen. Dena den, neure har dezadan aukera gehiago du La isla de las tentaciones telebista saioan barra-barra erabilita entzuten dudan beste espresio batek, niretzat berria denak. Darme mi sitio. «X-k ez dit nire tokia eman». Garai batean halako saioetan aldarrikatu errespetu eta begirune eskakizunen ordezkoa.
Inoiz baliatzen badut, PSNk atera dituen afixei aplikatuko diet lehenik. Ikusi dituzue? Leloak elebidun; ez dezatela gero esan ez diotela bere tokia eman (edo balioan jarri, zuek nahiago bezala). Euskarazko testua ezin txikiago idatzita egotea, eta letrarik meheenekin, hizkuntza honi ematen dioten balio eta tokiaren seinalea baino ez da. Ze onak. Ikasi dute ezer jarrita baino gehiago sumintzen garela gure tokian jarriz gero.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
