Arabatik euskara zabaltzeko asmoz antolatuko dute ikastolen jaialdia

Amurrioko Aresketa ikastolak antolatuko du 2020ko Araba Euskaraz, Darabagu lelopean. Jaialdiaren helburuetako bat da euskara Arabatik kanpora zabaltzea. Leloarekin ere gauza bera adierazi nahi izan dute: «Aditz trinko bat da, Amurrio eta Aiaralde osoa mundura euskaraz eramaten dugula adierazteko asmatu duguna». Ikastolako ordezkarien arabera, ikasleak beharrezkoak dira horretarako: «Izango den euskara irudikatu nahi dugu; beti erabilgarri suertatuko da gazteek arbasoengandik jaso eta eraldatzen duten hizkuntza».

Araba Euskaraz-ek, ordea, beste zenbait helburu ere zerrendatu ditu. Besteak beste, azaldu dute Amurrion euskararen erabilera sustatzeko testuinguruak sortu nahi dituztela, eta balio «positiboen» lanketa ere egin nahi dutela: «Genero berdintasuna, inklusioa, jasangarritasuna eta tokiko ekonomia bultzatzea, jantokiko eredu berriarekin bat eginez». Horrez gain, nabarmendu dute jai ereduak «berritzailea» eta «eraldatzailea» behar duela izan, baita «parte hartzailea» ere. Horretarako, ordea, gazteen autonomia beharrezkotzat jo dute: «Haiek sortutako dinamikak behar dira».

Arabako ikastolen jaialdian ez ezik, Aresketa ikastolaren barnean ere helburu zenbait finkatu dituzte. «Ikastolako berrikuntza pedagogikoa indartu nahi dugu, eta euskararen erabilera eta ahozkotasuna sustatzeko egitasmoak egin», azaldu dute ordezkariek. Areago, gaineratu dute ikastolaren kanpoko aldea eraldatzeko eta egokitzeko asmoa ere badutela, «ingurune hezitzaile bihurtzeko».

Ereindako hazien emaitza

Amurrioko guraso talde batek jarri zituen Aresketa ikastolaren lehen harriak, 1977. urtean. Ordutik 42 urte igaro dira, eta, ikastolako ordezkarien arabera, egitasmoa «erabat sendotuta» dago. Egun, Haur Hezkuntza, Lehen Hezkuntza eta Derrigorrezko Bigarren Hezkuntza ematen ditu ikastetxeak, eta guztira 670 ikasle ditu. Orain bide berean jarraitu nahi dute bertako kideek: «Landare oso bat bihurtzeko bidea marraztuko dugu, eta landareak osasuntsu hazteko behar duen testuinguru egokia sortu».