Albistea entzun

LABek Nafarroako Barne zuzendariaren dimisioa eskatu du

Sindikatuak salatu du urteetako gabeziak «inoiz baino nabarmenago» geratu direla, eta ez dela egon ez aurreikuspenik, ez alerta gaitasunik
LABeko suhiltzaileen atalaren prentsaurrekoa, atzo, Iruñean.
LABeko suhiltzaileen atalaren prentsaurrekoa, atzo, Iruñean. IDOIA ZABALETA / FOKU Tamaina handiagoan ikusi

Joxerra Senar -

2022ko ekainak 25 - Iruñea

LABek salatu du berdin diola alerta egoera zero mailakoa (leunena) edo laugarren mailakoa (larriena) izan, «beti berberak» baitira Nafarroako Suhiltzaileen Zerbitzuak eskura dituen langileak eta baliabide materialak. «Larrialdi egoera bat aktibatu ala ez, guardiako suhiltzaileen kopurua gutxieneko zerbitzuena da», nabarmendu du Urko Araiz suhiltzaile zerbitzuko LABeko ordezkariak.

Gaur Iruñean emandako prentsaurrekoan, adibide gisa jarri du ekainaren 14an Leire mendilerroan sutea piztu zenean Zangozako parkean hiru suhiltzaile baino ez zeudela laneko txandan. «Hori da ezarritako gutxienekoa, eta, praktikan, egunerokoan gehienekoa dena».

LABek azpimarratu du urteak daramatzatela zerbitzuaren gabeziak salatzen, eta bi asteotako egoerak «inoiz baino nabarmenago» utzi duela gabezia hori. Adibidez, langileei dagokienez, «orain dela hogei urteko langile kopuru bera» mantentzen da: hiru suhiltzaile parke bakoitzeko. «Hori ez da nahikoa egun ditugun zerbitzu guztiei erantzuteko».

Baso suhiltzaileak ere falta direla deritzote: «Salatu nahi dugu kanpainetarako gutxieneko langileak kontratatzen dituztela oraindik ere, eta hori ez dela nahikoa». Gaineratu du atal hori egonkortzeko egin den deialdi prozesua ez dela nahikoa.

Agintariei dagokienez, salatu du egitura operatiboa «oso kaskarra» zela legealdi hasieran, eta orain are gehiago okertu dela: «Barne Zuzendaritza Nagusiak epe laburreko konponbideak baino ez ditu bilatu 2020-2023 aldiko Plan Estrategikoan atzemandako okerrak zuzentzeko. Adibidez, gaur egun, buruzagitza operatiboen %50 aldi baterako okupatuta daude».

Horregatik, Amparo Lopez Nafarroako Gobernuko Barne zuzendariaren dimisioa eskatu du, baso suteen kasuan ez delako egon aurreikuspenik, ezta alerta gaitasunik eta prebentzio neurririk ere. Sindikatuaren aburuz, Suhiltzaileen Zerbitzua indartu eta berrantolatu behar litzateke.

Talde espezialista

Adibidez, LABek uste du talde espezialista bat sortu beharko litzatekeela oihanetako suteak itzaltzeko eta prebentziorako. Gainera, helikopteroetan aritzen den taldean langile gutxiago daude, eta horrek erantzuteko gaitasuna apaltzen du. «Egitura, langile eta antolakuntza gabeziei babes eta segurtasun ekipamenduetan, parkeetan, ibilgailuetan eta ordainsarietan egindako inbertsioa hobetzeko beharra gehitu nahi diegu, 2002. urtetik aurrera suhiltzaileen kasuan gelditu egin baitira», aipatu du Urko Araizek.

Eskuinetik ere iritsi zaizkio kritikak Nafarroako Gobernuari. Herenegun, Javier Esparza UPNko presidenteak Javier Remirez presidenteordearen dimisioa eskatu zuen, eta, hari erantzunez, Maria Txibite Nafarroako presidenteak atzo adierazi zuen Remirezekin «erabateko konfiantza» duela, baita iragan larunbatean hasitako suteak itzaltzen jardun zuen talde guztiarekin ere. «Erantzukizunez» jokatu dutela adierazi zuen: «Lehentasuna pertsonak salbatzea izan bada, lortu dugu; lehentasuna eremu urbanoak salbatzea izan bada, hein handi batean lortu dugu. Baaina, noski, baso guneetan eta nekazaritzan izandako kalteak neurtu beharko ditugu». Hain justu, aurreratu zuen datozen egunetan gobernuak azalpenak emango dituela parlamentuan.

Remirezek berak ere egin zion erreferentzia Esparzaren dimisio eskariari: «Tragediaren erabilera alderdikoia» egitea egotzi zion Navarra Sumako bozeramaileari, eta salatu zuen haren kritikak zalantzan jarri dituela babes zibilean aritutako talde osoaren gaitasuna eta kudeaketa. Gainera, gogorarazi zuen Esparzak Nafarroako Gobernuaren babes sozialerako profesionalak «primeran» ezagutzen dituela, Ingurumen kontseilaria izan zenez gero. Horregatik, bereziki larritzat jo zuen haren kritika. «Zorrotzak eta eraikitzaileak» izateko eskatu zuen, eta «politikeria» alboratzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Emakume bat maskararekin paseatzen, Donostian. ©GORKA RUBIO/FOKU

COVID-19arekin hildakoak eta positibo eman dutenak gutxituz doaz etengabe

Jone Arruabarrena

Astetik astera, nabarmen jaisten ari dira kopuruak; oraingoan, 31 hildako izan dira, eta 1.881 positibo.

Aragoiko kanala. ©Javier Cebollada / EFE

Hilik aurkitu dute atzotik desagertuta zegoen Ribaforadako bizilaguna

Berria

Zaragozako Novallas (Aragoi) herrian aurkitu dute 82 urteko gizonaren gorpua.

Tuterako Santanak, artxiboko argazkian. ©TUTERAKO UDALA

Hil egin da Tuterako entzierro batean larri zauritutako gizona

Berria

74 urte zituen, eta uztailaren 26ko entzierroan zauritu zen.

BU-520 errepideko 2. kilometroa, Burgos ©Google Maps

Hiru gazte hil dira asteburuan trafiko istripuz

Lide Egizala Urteaga

Barakaldoko 20 urteko bi gazte hil ziren larunbat gauean. Igandean, berriz, Astigarragako gazte bat hil zen Pirinioetan, moto istripu batean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.