Akusazioak dio Abantoko auzipetuak «gaiztakeriaz» hil zituela emaztea eta alaba

Epaiketako azken hitza izan zuen atzo Abantoko (Bizkaia) hiltzaileak, non 2020ko martxoan emaztea eta alaba hiltzeagatik epaitzen ari diren. Egin zuena «barkaezina» dela esan zuen: «Zeharo txikituta nago, eta uste dut jendeak sufritu egiten duela, baina nik inork baino gehiago sufritzen dut». Horri erantzunez, akusazioak esan zion «munstro matxista» bat dela, eta emaztea eta alaba «ezgaituak eta gutxiago» zirela pentsatzen zuela. Ama-alabek «enbarazu egiten ziotelako» hil zituela esan zuten, eta «gaiztakeriaz» hil zituela gehitu.

Akusatuak dio «sufritu ez zezaten» hil zituela, eta Ministerio Publikoaren ordezkariak adierazi zuen ez dagoela hori baino esaldi matxistagorik. Fiskalak, bestalde, ebatzi du 56 urteko emazteak eta 24 urteko alabak «urteak» zeramatzatela indarkeria matxista pairatzen, eta gehitu zuen hilketa modu «kontziente, boluntario eta planifikatu» batean egin zuela. Hiltzaileak buruko gaixotasun bat zuela ere ukatu egin zuen fiskalak. Izan ere, akusatuaren defentsak hamasei urteko zigorra eskatu du bere bezeroarentzat, leungarri hauengatik: konfesioa, alkoholaren menpekotasuna eta buruko gaixotasun larria. Genero astungarria ere ukatu du defentsak, «urteetako dominazioaren frogarik ez dagoelako»: «Kosta egiten zait pentsatzea emakume gogor eta adoretsu bat 30 urtez azpiratua egon izana», esan zuen. «Emazteari tratu bikaina ematen zion», esan zuen hiltzailearen familiak.

Buruko gaixotasunik ez

Akusazioak adierazi zuen Basauriko kartzelan zegoen bitartean egin zioten txosten psikiatrikoak «zorroztasun zientifiko txikia» duela; izan ere, hiltzaileak depresioa eta delirioak dituela dio txostenak, eta akusazioak dio Bizkaiko Balorazio Forentse Integraleko Unitateak egindako txostena profesionalagoa dela, zeinak dioen hiltzaileak ez duela erantzukizuna kentzen dion buruko gaixotasunik.

Herri akusazioak eta partikularrak, Clara Campoamor elkarteak ordezkatuta, 25 urte arteko bi zigor eskatu dituzte hiltzailearentzat, genero eta ahaidetasun astungarriak dituzten hilketengatik. Fiskalak, berriz, 24 urteko kartzela zigorra eskatu du, azpikeriazko hilketengatik, ahaidetasun eta genero astungarriekin. Estatuko Abokatutzak fiskalaren zigor bera eskatu du.