Albistea entzun

Koronabirusa. PENTSALDIAN

Oniomania, erosketen sareetan

Herritar batzuk erosketak egiten, Gasteizen.
Herritar batzuk erosketak egiten, Gasteizen. JAIZKI FONTANEDA / FOKU Tamaina handiagoan ikusi

Maite Elizondo - Psikologoa

2021eko abenduak 7

Oniomania, erosketa konpultsiboak egitera bultzatzen gaituen nahasmendu psikologikoa da. Animoan gorabeherak dituzten pertsonek sindrome hau garatzeko aukera gehiago izan ditzakete.

Antsietatea, nekea eta suminkortasuna dira, besteak beste, pandemia garai honetan entzuten ditugun sentsazioak. Gaizkiegon psikologikoa edozein adikzio garatzeko predisposizio faktoreetako bat izan daiteke, baita kanpotik jasotako estimulu bat behin eta berriz jasotzea ere. Erosi, erosi orain, aukera ezin hobea da zuretzat, erosi lehenbailehen, ez galdu azken aukera paregabe hau… erosi, erosi, erosi….

Edozein produktu saltzeko iragarkietan erabiltzen duten karga emozionala handia izan ohi da eta insistentzia izugarria. Gabonak ate joka dauden honetan kontsumitzera bultzatzen gaituzten estimuluak pil-pilean daude eta emozioak polarizatuak (batzuentzat data pozgarriak, besteentzat tristeak). Oniomaniaren sareetan erori ez gaitezen, garrantzitsua da nahasmendu honen eragileak ezagutzea, bere atzaparretatik urrun mantendu gaitezen. Janarien elikaduran badakigu zein elikagai diren gorputzarentzat osasuntsu; elikadura mentalean zerk egin diezagukeen on eta zerk kalte ezagutzea interesgarria izan daiteke, gure osasun mentala zaindu dezagun.

Arreta erakartzen digun produktu bat hautematen dugunean, garunean accumbens nukleoa aktibatzen da, plazeraren muina. Eremu hau sari-zirkuituekin lotuta dago. Adikzio mota ezberdinetan garuneko gune hau martxan jartzen da. Oniomania sindromearen adierazleetako bat erostearen ekintzak bat-bateko satisfazioa eragitean datza, izan ditzakegun hutsune emozionalak une batez estaliz eta egunerokotasunean jasandako zailtasunak mututuz. Baina erosi eta gutxira gaizkiegon izugarria sentitu ohi da, erruduntasuna, frustrazioa, haserrea, antsietatea, lotsa… askotan erositakoa ezkutatzera behartzen gaituena, inor jabetu ez dadin. Dinamika honekin, zurrunbilo itogarrian barneratuta sentitzen gera, ur pozoitsu horietatik nola irten jakin gabe.

Burrunba konplexu honetan erori ez gaitezen, erosi aurretik geure buruari hausnarketarako tarteak eskaintzea garrantzitsua da, inpultsibitateak erabaki ez dezan. Benetan erosketa hau egin nahi dut edo beste gaizkiegonen bat estali nahi dut erosketa honekin?

Nahasmendu psikologiko gehienetan bezala, eraginkorrena prebentzioa da eta honetarako hezkuntza ezinbestekoa. Irakatsi dezagun haurtzarotik zailtasunei aurre egiteko baliabideak barneratzen; estresa, galerak eta ziurgabetasuna modu eraginkorrean jorratuz, erresilientzia garatuz. Era berean, oniomania edo honen sintomaren bat kudeatu ahal izateko marketinak psikologikoki nola eragiten digun ezagutzea ere interesgarria izan daiteke, manipulatuak sentitu ez gaitezen eta ahalik eta askeen erosi dezagun.

Opariak jasotzea eta egitea atsegina da, baina neurrian eta aske egitea izan daiteke oparirik distiratsuena.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Irungo alarde parekidea, atzo. ©JON URBE / FOKU
Alarde parekidea jendetsua izan da, baina alkateak ez die harrerarik egin

Alarde parekidea jendetsua izan da, baina alkateak ez die harrerarik egin

Arantxa Iraola

Balkoian, udaleko taldeek inoiz baino babes handiagoa eman diete, eta udal gobernuko kide batek eman die, lehen aldiz, hiriko bandera

Suhiltzaileak istripua izan den lekuan lanean ©Arabako Foru Suhiltzaileak
Nafarroako 0-3 plataformak egindako agerraldi bat, artxiboko irudian ©Iñigo Uriz / foku

Bertan behera utzi dute Nafarroako haur eskoletako greba

Irati Urdalleta Lete

Ez daude ados Nafarroako Gobernuaren proposamenarekin, baina, prekaritatea tarteko, ez dute greban jarraituko. 0-3 ziklo duina izatea eskatzen dute.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.