ETAk Fernando Mujika PSE-EEko kide eta abokatua eta Joseba Pagazaurtundua alderdi sozialistako militante eta Andoaingo (Gipuzkoa) udaltzainburua hil zituenetik 24 eta 17 urte bete dira, eta PSE-EEk omenaldiak egin zizkien atzo Donostian eta Andoainen. Gipuzkoako hiriburuan, lore eskaintza bat egin zuten Polloeko hilerrian; Andoainen ere lore eskaintza egin zuten haren omenez eginiko eskulturaren aurrean.
Pagazaurtunduaren aldekoan, Maider Lainez Andoaingo alkateak eskatu zuen «ETA zuritu gabeko memoria bat» osatzeko: «Ezin dugu ahaztu, aurrera begiratu beharraren argudiopean. Ezingo da memoria kolektibo eta inklusibo bat eraiki batzuk terrorismoa zuritzen tematzen badira». Gaur, leku berean omenduko dute Pagazaurtunduaren senideek.
Interesgarria izango zaizu
Nabarmenduak
