Albistea entzun
Emakumeen aurkako indarkeriari ez
Emakumeen aurkako indarkeriari ez
Emakumeen aurkako indarkeriari ez

Eusko Legebiltzarrerako hauteskundeak. EH Bildu

EH Bilduk lau eserleku irabazi ditu, eta alternatiba gisa sendotu da

Botoetan hazi den alderdi bakarra izan da koalizio subiranista. Eserleku bat irabazi du Araban, beste bat Gipuzkoan, eta bi Bizkaian. 2012ko emaitza historikoak hobetzea lortu du koalizioak
Maddalen Iriarte lehendakarigaia, Mikel Otero Arabako zerrendaburuarekin, atzo, emaitzak ospatzen.
Maddalen Iriarte lehendakarigaia, Mikel Otero Arabako zerrendaburuarekin, atzo, emaitzak ospatzen. JON URBE / FOKU Tamaina handiagoan ikusi

Edurne Begiristain -

2020ko uztailak 13

ESERLEKUAK: 22

BOTOAK: 248.688

LEGEBILTZARKIDEAK

Araba: Mikel Otero, Eva Blanco de Angulo, Josu Estarrona, Maria Garde, Unai Fernandez de Betoño, Itxaso Etxebarria.

Bizkaia: Jasone Agirre, Iker Casanova, Pazis Garcia, Leire Pinedo, Julen Arzuaga, Ikoitz Arrese, Diana Urrea.

Gipuzkoa: Maddalen Iriarte, Nerea Kortajarena, Arkaitz Rodriguez, Lore Martinez, Andres Rodriguez, Ibai Iriarte, Oihana Etxebarrieta, Eraitz Saez de Egilaz, Rebeka Ubera.

Emaitza historikoak lortu ditu EH Bilduk, eta oso indartuta irten da igandeko hauteskundeetatik. Lau eserleku irabazi ditu, eta 22 ordezkari izango ditu legebiltzarrean. Azken urteotako hauteskunde deialdietako goranzko joerari eutsi dio koalizio subiranistak, eta EAJren alternatiba gisa sendotzea lortu du. Azpimarratzekoa da EH Bildu izan dela botoetan hazi den alderdi bakarra: duela lau urteko bozekin alderatuta, 23.000 boto inguru irabazi ditu, eta boto portzentajean %6 igo da. Hori horrela, Eusko Legebiltzarreko bigarren indarra izango da berriro EH Bildu, baina joan den legealdian baino indar handiagoa izango du.

Hauteskundeetako parte hartzea nabarmen jaitsi bada ere, botoetan gora egitea lortu du koalizio subiranistak: 248.688 boto bildu ditu, botoen %27,84. 2016an baino 23.000 gehiago izan ditu orain. Eserlekuetan hiru herrialdeetan egin du gora koalizioak: Araban sei izango ditu (+1), Bizkaian zazpi (+2) eta Gipuzkoan bederatzi (+1).

Eusko Legebiltzarrerako hauteskunde batzuetan ezkerreko koalizio subiranista batek inoiz lortu duen emaitza onenetarikoa erdietsi du Maddalen Iriarteren hautagaitzak. 2012ko hauteskundeetan eta Laura Mintegi lehendakarigai zenean erdietsitako marka hobetzea lortu du, orduan 21 eserleku lortu baitzuen koalizioak. Lau urte geroago hiru eserleku galdu zituen koalizioak; orain lau irabazi ditu.

Hiru lurraldeetan gora

Bigarren indarra da EH Bildu hiru lurraldeetan. Araban, 30.886 boto eskuratu ditu (%24,88), duela lau urteko emaitzak nabarmen hobetuta. 2016an hirugarren indarra izan zen EH Bildu PPren atzetik, botoen %17,93rekin. Bizkaian, berriz, gorakada handiagoa izan da: botoen %23,94 lortu ditu, 112.443 boto eta 2016an baino 12.833 gehiago. Gipuzkoan ere gorakada handia izan du koalizio subiranistak, eta EAJtik lau mila botora geratu da. 105.359 boto eskuratu ditu EH Bilduk Gipuzkoan, botoen %35,18. Duela lau urteko emaitzak hobetu ditu lurralde horretan ere, 6.696 boto gehiago lortuta.

Arabako eta Gipuzkoako azken eserlekua lortzeko lehia estua izan da, eta, hasieran, boto zenbaketa nahiko aurreratuta egon denean, bi eserleku galdu ditu EH Bilduk. Haatik, emaitzen zenbaketa ixterako eserleku bat berreskuratu du, Bizkaitik. Nolanahi ere, hauteskunde emaitzen behin betiko emaitzak ostiralean jakingo dira, atzerrian bizi diren egoiliarren botoak zenbatzea falta delako. Azken eserlekua lortzeko lehia estua da oraindik ere Araban eta Bizkaian, eta boto horiek balantza alde batera edo bestera makurtu dezakete. Izan ere, azken aulkia lortzeko lehian 200 botoren aldea atera dio EAJk EH Bilduri Araban, eta 137 botoren aldea dago EH Bilduren eta PP eta Ciudadanos koalizioaren artean Bizkaian.

Lortutako emaitzekin «oso pozik» agertu zen atzo Iriarte EH Bilduko lehendakarigaia: «Inoizko emaitzarik hoberenak izan ditugu, kontuan izanda parte hartzea txikia izan dela». Iriartek eskua luzatu zien Euskal Herria «ezkerretik eta burujabetzatik» eraiki nahi duen orori, eta honako mezua helerazi zien: «Aldaketa hasi baino ez da egin. EH Bildu gero eta zabalagoa eta handiagoa izango da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

EAJren burukideak, BECeko Batzar Nagusian ©Monika del Valle / Foku

«Entzute aktiboko» prozesu bat abian jarriko du EAJk datozen hilabeteetan

Gotzon Hermosilla

Jeltzaleak VIII. Batzar Nagusia egiten ari dira Barakaldoko BECen.

Igandean egin ziren kontzejuetako hauteskundeak. Irudian, Añuako herritarrak botoa ematen. ©ARABAKO KONTZEJUEN ELKARTEA

Arabako kontzejuen %24k izango dute emakume bat lehendakari

Edurne Begiristain

Kontzejuetako administrazio batzarretako ordezkariak aukeratu dituzte. Finantzaketa, digitalizazioa, emakumeen parte hartzea eta despopulazioa izango dituzte erronka nagusi

Maddalen Iriarte EH Bilduko bozeramailea, atzo, Eusko Legebiltzarrean. ©JAIZKI FONTANEDA / FOKU

«Aukera bat» aurrekontuei

Jon O. Urain

EH Bilduk ez dio osoko zuzenketarik jarri Jaurlaritzaren aurrekontu proiektuari, «elkarrizketarako borondate zintzoa» erakusteko. Eskertuta erantzun du Urkulluk: «Bide berri bat irekitzen da»

Olatz Garamendi Gobernantza Publiko eta Autogobernu sailburua ©Raul Bogajo / FOKU

Garamendik ez du parte hartuko Autonomia Erkidegoetako Presidenteen Konferentzian

Oihane Puertas Ramirez

Adierazi du Espainiako Gobernua hitzartutako «aldebiko akordioak behin eta berriz ukatzen» ari dela, eta Sanchezen Gobernuari eskatu dio bete dezala Eusko Jaurlaritzarekin «hitzartutakoa». Garamendik nabarmendu du ez dutela onartuko «Eusko Jaurlaritza gutxiestea».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.