Hondarribiko Udalak aldeekin hitz egin nahi du alardeko ordutegiaz

Jaizkibel konpainiakoak, aldekoen eta aurkakoen aurrean, iaz.
Jaizkibel konpainiakoak, aldekoen eta aurkakoen aurrean, iaz. GORKA. RUBIO / FOKU

Erredakzioa -

2019ko abuztuak 28
Hondarribiko alkate Txomin Sagarzazuk (EAJ) proposatu du alarde parekideak eta baztertzaileak —soilik gizonak onartzen dituenak— «kointzidi» ez dezaten batzuen eta besteen ordutegiak aldatzea, «tentsioak» saihesteko. Herenegun proposatu zuen, jaietako egitarauaren aurkezpenean, kazetari bati erantzunez. Udalak BERRIAri azaldu dionez, «asmo» bat baino ez da, eta alkatea datozen egunetan biltzekoa da udalbatzako taldeekin, Alarde Fundazioarekin eta horren gertukoak diren Hondarribiko Emakumeekin —baztertzailearen aldekoak—, eta Jaizkibel Konpainiarekin.

EH Bilduk alkateari leporatu dio gatazkaren alde batekin lerratzea, erabaki horrekin alarde parekideari ikusgaitasuna kentzen diolako. «Tentsioa apaldu nahi duela esan, eta bazterkeria sustatu du. Horrek tentsioa pizten du». Gogoratu du Jaizkibelek jasoa duela ohiko ordutegian desfilatzeko baimena.

Hil hasieran, aldeak elkarrizketak hasteko prest agertu ziren, Jenny Pearce bitartekariari esker. Azkenean, bertan behera geratu zen bilera, baldintza nahikorik ez zegoela eta. Orduan agertutako «ausardia eta oreka» galtzea egotzi dio EH Bilduk alkateari.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna