Noiz sortua: 2020-03-24 00:30:00

Koronabirusa

Ohiko birusak harrapatuta

Kartzelatik atera berri da Oskar Calabozo. Buruan ebakuntza egin berri diote Asier Aginako euskal preso ohiari. Biek pairatu dute Madrilen jarrera koronabirusaren garaian ere.
Oskar Calabozo euskal preso ohia, atzo, Trapagaranen, etxean.
Oskar Calabozo euskal preso ohia, atzo, Trapagaranen, etxean. BERRIA Tamaina handiagoan ikusi

Enekoitz Esnaola -

2020ko martxoak 24

Ordu arraroak bizi ditu Oskar Calabozo euskal preso ohiak (Trapagaran, Bizkaia, 45 urte): herenegun atera zen Kordobako kartzelatik (Espainia), zigorra osorik beteta, eta, 800 kilometroko bidaiaren ondoren, arratsez iritsi herrira, baina kalean ez zuen inor zain harrera egiteko; atzo irten zen kalera, kontu korrontea zabaltzera eta beste zerbait egitera, «baina ezagunak ikusi, eta ezin besarkatu!...». Koronabirusak agintzen du. Telefonoz jaso ditu agur mezuak, bideoak, bertsoak eta beste. Dena dela, «pasatuko da hau», dio Calabozok. Espetxeetako egoeraz du kezka. «Izan ere, ni azkena egon naizen kartzelan behintzat, presoekin ez dute inolako neurririk hartu: ez tenperaturarik, ez eskularrurik, ez maskararik; ezer ez. Kartzelako arduradunek ez dute gizatasunik». Kordoban, presoek astean behin izan ohi dute kontsulta medikuarekin: «Baina hogeiren bat segundoan begiratzen dizu zerbait, eta kalera. Hori ari da pasatzen orain ere». Oraingoz, koronabirusaren positibo kasurik ez da izan Andaluziako espetxe hartan, «baina sartuko da gaitza barrura, espetxe kanpotik sartu-irtena egoten baita egunero: funtzionarioak, sukaldariak, erizainak... Orduan, zer?».

Logikoa iruditu zaio EH Bilduk, Etxerat-ek eta Sarek euskal preso eriak eta 70 urtetik gorakoak askatzeko eskatu izana. «Koronabirusagatik arrisku handiena dutenak dira. Kartzela ez da horrelako gaitz bati aurre egiteko toki ona; are gutxiago haien kasuan. Kordobako espetxean ez dago euskal preso gaixorik eta 70 urtetik gorakorik —zaharrenak 60 urte dituzten hiru dira—, baina berdin dio, han preso eri asko dago; batez ere, buruko gaixotasunak dituztenak dira horiek, eta botikaz goraino jartzen dituzte. Hori da ematen dieten tratamendua». Calabozok galdetu du zeren zain dagoen Espainiako Espetxeetako Erakundea preso eriak-eta askatzen hasteko; «hildako batzuk egon behar al dira neurriak hartzen hasteko?».

Mendekotasunen bat duten adinekoen arretarako ikasketak egiteko baliatu du kartzelaldia, Etxerat-ek lagunduta: «Koronabirusarekin ere ikusi da zaintzarako behar handia dagoela».

Asier Aginakoren kasua

Asier Aginako (Durango, Bizkaia, 44 urte) euskal preso ohia da zaintza behar duen pertsona bat. Buruko tumore batengatik, bitan egin diote ebakuntza azkeneko urtebete pasan. Eritasun larri horregatik, iazko urtarril bukaeran —lehen ebakuntzatik bi astera—, Espainiako Auzitegi Nazionalak eten egin zuen haren kartzelaldia. Picassent kartzelan (Valentzia, Herrialde Katalanak) zegoen orduan Aginako, baina, Euskal Herrira itzuli beharrean, han ondoko herrixka batean jarri zen bizitzen. Arrazoia: neska-lagun Aitziber Coello espetxe hartan daukate preso, bien haur batekin. Aginakok Valentzia aldean segitu zuen osatze lanetan, eta lortu zuten Coello maiatzetik aurrera egunero lau ordurako ateratzea espetxetik, umearekin.

Beste urrats bat egin zuten: Coellori hirugarren gradua emateko eskatu zuen Txema Matanzas abokatuak udazkenean; eta, halakorik eman ezean, euskal presoari egunero kalera irteteko ordu gehiagoko baimena ematea. Gainera, kondena amaitzear duen preso bat da —maiatzaren 2an bukatuko zaio—. Eskaerei ezezkoa eman zien Espetxe Zaintzak duela aste batzuk, eta bigarren graduan segitu du Coellok.

Aginakori otsailaren 26an egin zioten bigarren ebakuntza buruan, baina, koronabirusaren krisia dela eta, haren bikotekidea ezin da kartzelatik irten; ez diote uzten. «Horrelako egoera batean zabaltasuna agertu beharrean, are gehiago itxi da Madril», dio Aginakok. «Gobernuak aitzakia ona dauka orain hirugarren graduak-eta emateko, baina are gehiago itxi ditu kartzelak». Gainera, ume txikia ateratzen ere ez diote uzten.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Koronabirusaren azken datuak

Koronabirusaren azken datuak

Berria

Euskal Herrian 13.406 gaixok eman dute positibo koronabirusaren proba eginda. 905 hil dira. COVID-19 gaitza izandako 4.972 pertsonari eman diete alta. Grafikoak, albiste barruan.

Diputatuak saioren hasieran, minutu bateko isilunean. / ©Mariscal, EFE

Alarma egoera luzatzea onartu du Espainiako Kongresuak

Berria

EAJk iragarri du bilera horretan egongo dela. EH Bildu, berriz, ez da joango. Konfinamenduan apirilaren 26ra arte luzatu dute Hegoaldean.

Gasteizko farmazia bat. / ©Endika Portillo, Foku

Egun beltzenetan bigarrena izan da atzokoa, hildako kopuruari dagokionez

Ekhi Erremundegi Beloki - Ane Eslava

Gutxienez 59 pertsona hil dira Euskal Herrian azken 24 orduetan koronabirusak jota. 900 hildakoen langa gainditu da. 462 positibo gehiago atzeman dituzte Hegoaldean.

350 diputatutik 43 joan dira Espainiako Kogresura ©mariscal / EFE

EAJk atea ireki dio Sanchezek proposatutako itunean parte hartzeari; EH Bildu ez da joango

Irati Urdalleta Lete

Apirilaren 26ra arte luzatu dute alarma egoera, eta Sanchezek aurreratu du uste duela hamabost egun barru berriro alarma dekretua luzatu beharko duela

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna