Noiz sortua: 2020-06-30 00:30:00

Eusko Legebiltzarrerako hauteskundeak. Kanpaina

EH Bilduk ziurtatu du 1.080 euroko pentsioak bermatuko dituela

Gizarte Segurantzaren kudeaketa eskatuko dutela azpimarratu dute. «Miseriazko» pentsioak kentzea eta «duintasuna» aldarrikatu dituzte
Kortajarena, atzo EH Bilduk egindako ekitaldian, Lazkaon.
Kortajarena, atzo EH Bilduk egindako ekitaldian, Lazkaon. EH BILDU Tamaina handiagoan ikusi

Irati Urdalleta Lete -

2020ko ekainak 30

Gutxienez 1.080 euroko pentsioak bermatuko dituztela. Hori izan zen atzo EH Bilduk jakinarazitako konpromiso nagusietako bat. Lazkaon (Gipuzkoa) egindako ekitaldian Nerea Kortajarena zerrendakideak ohartarazi zuenez, COVID-19ak ez du bukatu pentsiodunen «borroka eta indarra»: «Itxialdiaren ondoren, kalean ikusi ditugu berriro». Haren hitzetan, EH Bilduk babestu egin nahi ditu pentsiodunen aldarrikapenak eta borroka, eta 1.080 euroko gutxieneko pentsioak bermatuko ditu. EH Bilduk uste du «herri duina» izan nahi duenak bere kideak «zaindu eta babestu» behar dituela, eta bermatu egin behar dituela duintasunez bizitzeko baldintzak eta kalitatezko zaintza zerbitzuak.

Milaka pentsiodunek «miseriazko» pentsioak kobratzen dituztela ere salatu zuen Kortajarenak, eta 1.080 euroko pentsioak eskatzeko arrazoia datuen bidez azaldu zuen: «Araban, Bizkaian eta Gipuzkoan 13.500 pentsiodunek osatu behar dute pentsioa diru sarrerak bermatzeko errentarekin». Nabarmendu zuenez, pentsiodun horien bi heren emakumeak dira. Gainera, koalizioaren zerrendakidearen hitzetan, legeak aitortzen dien baino 300 euro gutxiago jasotzen dituzte, «[Iñigo] Urkulluk eta [Idoia] Mendiak pentsioen osagarria murriztu dietelako».

«Euskal pentsiodunek pentsio duinak merezi dituzte, ez miseriazko pentsioak», azpimarratu du Kortajarenak. Eta haren hitzetan, eskumenak badaude, pentsio «duin» horiek bermatu ahal izateko, baita 1.080 euroko gutxieneko pentsioa bermatzeko ere, Eusko Jaurlaritzak pentsio baxuenak osatuta. «Borondate politiko kontua da, ez du balio ustezko eskumen faltan ezkutatzea».

Kortajarenak azpimarratu zuen Gizarte Segurantzaren kudeaketaren transferentzia ere eskatuko dutela, euskal pentsio sistema propioa sortzeko. Halere, bitartean ere zeregina badagoela nabarmendu zuen: «Jaurlaritzak tresnak baditu pentsio txikienak osatzeko Gizarte Segurantzaren transferentzia osoa gauzatu bitartean, baina borondatea behar da tresna horiek baliatzeko, eta EH Bilduk badu».

Antzeko aldarrikapenak egin zituen Jasone Agirre EH Bilduren hautagaiak ere Bilbon. Haren hitzetan, EH Bilduk pentsiodunei «bizitza duina» bermatzeko konpromisoa hartu du, baita 1.080 euroko gutxieneko pentsioak bermatzeko, milaka euskal pentsiodunek jasotzen dituzten «miseriazko» pentsioak deuseztatzeko, euskal pentsio sistema publiko bat sortzeko eta Gizarte Segurantzaren kudeaketaren transferentzia «atsedenik gabe» eskatzeko ere.

Antzera mintzatu zen Mikel Otero EH Bilduren Arabako zerrendaburua ere. EAJri eta PSE-EEri egotzi zien «eskumen faltaren atzean» babestea. Oteroren iritziz, ordea, Jaurlaritzak baditu nahiko eskumen, «pentsiodunei pentsio duinak bermatzeko». Otero pentsiodunekin egon zen atzo Gasteizen, eta, bertan egindako adierazpenetan azpimarratu zuenez, EH Bilduri botoa emateak soilik ziurtatzen du «konponbide posible guztiak bilatzea pentsio duinak bermatzeko».

Erabakitzeko eskubideaz

Arrasaten (Gipuzkoa) aritu ziren iluntzean Maddalen Iriarte EH Bilduren lehendakarigaia eta Arkaitz Rodriguez Gipuzkoako hirugarren zerrendaburua. Besteak beste, Iñigo Urkullu EAJren lehendakarigaiari egotzi zioten erabakitzeko eskubidea gauzatzeko «oztopo» izatea eta «hitza ez betetzea». Burujabetzaren aldeko botoa eskatu zuen Iriartek: «Urkulluk Ibarretxe plana alfonbra azpian ezkutatu du, erabakitzeko eskubidearen etsaiek belarriekin txalo egiten duten bitartean».

Rodriguezek boto subiranista eta ezkertiarra eskatu zuen, eta Urkulluren agintaldiari buruz esan zuen «zakarretarako botatako» zortzi urte direla: «Subiranotasunaren trena galdu du».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Lehen arretako profesionalen protesta bat, iaz, Gasteizen. ©ENDIKA PORTILLO / FOKU

Murgak egoera hauskorraz ohartarazi du, 15 kutsatu gehiagoren berri emanda

Ane Eslava

Egoera «kontrolpean» dagoen arren, «zuhurtzia» eskatu du. Nafarroan ez da kasu berririk egon. Lehen arretako langileek protesta egin dute

Larrialdi zerbitzuek behin-behineko ospitale bat jarri dute Lleidan. ©Ramon Gabriel / Efe

Kataluniako Gobernuak konfinamendua ezarri die 200.000 herritarri

Berria

Lleidako eskualde batean koronabirusaren zortzi agerraldi detektatu dituzte. Eguerdian jarri dute indarrean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna