«Norabide aldaketa bat dago»

Elkarrekin Podemosek «aldaketak sartzeko prest» ikusi du Jaurlaritza, aurrekontuak adosteko eginiko lehen bileran. 350 milioiren balioa duten aldaketak egitea proposatu dute
Eusko Jaurlaritzako eta Elkarrekin Podemoseko ordezkariak, atzo, Gasteizen egindako bileran.
Eusko Jaurlaritzako eta Elkarrekin Podemoseko ordezkariak, atzo, Gasteizen egindako bileran. JUANAN RUIZ / FOKU Tamaina handiagoan ikusi

Enekoitz Telleria Sarriegi -

2019ko azaroak 15

Aurreneko bilera zuten, baina bilerara joan aurretik izan dira keinuak eta esanak egunotan. Aurrekontuak aurkeztu zituen egun berean esan zuen Pedro Azpiazu Ekonomia eta Ogasun sailburuak Elkarrekin Podemosekin ikusten zituela «baldintzarik egokienak» akordioa lortzeko. Egun berean erantzun zion Lander Martinez Elkarrekin Podemoseko legebiltzarkideak «oso positibotzat» hartzen zutela haiek egindako zenbait proposamen kontuan hartu izana, eta «etorkizuna» egon zitekeela. Eta atera dira lehen bilera horretatik, eta berretsi egin dituzte keinuak, eta berretsi esanak. «Norabide aldaketa bat nabaritu dugu gobernuan, eta aldaketak sartzeko prest dagoela ikusi dugu. Baina aurreneko hartu-emana izan da. Ikusteko dago zertan geldituko den gaur abiatutako negoziazioa».

Mahaiaren bueltan, Eusko Jaurlaritzako ordezkariak, Pedro Azpiazu buru zutela. Elkarrekin Podemosen izenean, Lander Martinez, Cristina Makazaga eta Jon Hernandez. Mahai gainean, Elkarrekin Podemosen proposamena: zortzi puntu nagusiren bueltan taxututakoa, eta Jaurlaritzak egindako aurrekontuetan 350 milioiren balioa duten diru sailak mugitzea proposatzen duena.

Elkarrekin Podemosek enplegu plan bat aurkeztu dio Azpiazuri, berdintasunaren eta indarkeria matxistaren arloan 15 milioi euro bideratzeko eskatu, klima aldaketaren ondorioei aurre egiteko neurriak proposatu, eta trantsizio energetikoa bultzatuko duten neurriak galdegin. Bi arlo horietarako 50 milioi euro jartzea proposatu dute. Bileraren ostean egindako adierazpenetan Lander Martinezek argitu du berdintasunari, klima aldaketari eta etxebitzitzari buruz egindako proposamenetan «bat egin» dutela, baina «erresistentziak» topatu dituztela, besteak beste, zerga sistemari buruz egindakoetan.

Jaurlaritzako iturriek berretsi egin dute Martinezek esandakoa, jakinarazi dute arlo batzuetan aldaketak egitea «ezinezkoa» izango dela, baina beste batzuk «berriro diseina» daitezkeela, eta beste hainbatetan «aurrera egin» daitekeela. «Zehaztasun gehiagori buruz aritzeko», hilaren 22an biltzekotan gelditu dira.

EH Bildu, zuzenketa eske

Maddalen Iriarte EH Bilduren legebiltzarkideak eskatu du Eusko Jaurlaritzaren 2020ko aurrekontu egitasmoa «zuzendu» egin behar dela, «eta gobernuak argitu behar du zer aldatzeko prest dagoen». Esate baterako, azaldu du ez dagoela politika feministak garatzeko, pentsiodunen beharrei erantzuteko eta klima larrialdiari aurre egiteko neurri berririk. «Aurten aurrekontuari beste zelofan bat ipini diote, baina edukiak lehengoan jarraitzen du».

EH Bilduk kezka agertu du aurrekontu proiektuan Jaurlaritzak «gauza bat esan eta beste bat egin» duelako. Iriarteren arabera, aurrekontu proiektuaren zuzentarauak aurkeztu zituztenean, berdintasuna, klima aldaketaren kontrako neurriak edota kalitatezko enplegua aipatu zituzten, besteak beste. «Hitzak oso erraz esaten dira, baina gero benetako finantzaketarik ez baldin badaukate, hutsean geratzen dira». Adibide modura jarri du klima aldaketarena: «Legeak 100 milioi euroko funtsa aurreikusten zuen, eta derrigorrez bete behar da. Non daude klima aldaketari aurre egiteko 100 milioiak? Aurrekontu proiektuan ez daude». EH Bilduk uste du Jaurlaritzak diskurtsoa aldatu duela. «Zenbakiak beste modu batez ordenatu ditu, baina edukiak aldaezin segitzen du, iaz bezala».

EH Bilduko bozeramaileak iragarri du bere taldea proposamen bat prestatzen ari dela 2020ko aurrekontuak alda daitezen, eta adierazi du prest daudela Jaurlaritzarekin akordio bat bilatzeko. Joan den urtean bi parteak epea amaitu arte hizketan egon ziren, baina ez zuten akordiorik lortu. Oraingoei buruz aritzeko lehen bilera heldu den astean egingo dute. Itxura guztien arabera, ostegunean izango da.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Murga eta Tapia jarduneko sailburuak, gaur, Eusko Jaurlaritzaren Bilboko egoitzan. ©Javier Zorrilla / Efe

Eusko Jaurlaritzak neurri murriztaileak ezarriko ditu pilaketarik ez sortzeko

Andoni Imaz

Tapia jarduneko sailburuak adierazi du «agertoki berri bat» iritsiko dela, eta osasun larrialdia ezartzeak ez duela esan nahi iragan hilabeteetako neurriak hartuko dituztenik. Jendea ez pilatzeko, edukiera murriztuko dute zenbait lekutan, eta ordutegiak mugatuko dituzte.

Bilboko Zorrozgoiti zahar etxeko egoiliar bat, atzo. ©MIGUEL TOÑA / EFE

Etsipena, beldurra eta nekea zahar etxeetan

Aloña Beraza Peña

Zahar etxeetako kutsatzeek gorakada nabarmena izan dute azken asteetan, eta langileak beldur dira ez ote diren itzuliko gaitzaren lehenengo olatuko egoerara. Egoiliarren artean ere kezka da nagusi.

Salvador Illa Espainiako Osasun ministroa, atzoko agerraldian. ©CHEMA MOYA / EFE

Jaurlaritzak osasun larrialdia ezarriko du astelehenetik aurrera

Irati Urdalleta Lete - Olatz Esteban Ezkati

Tapia eta Murga sailburuek gaurko agerraldian emango dituzte xehetasunak. Madrilek hartu ditu lehen neurriak, egoera epidemiologikoak okerrera egin duela eta: tabernek 01:00ean itxi beharko dute, eta gauerditik aurrera ezingo da bezero gehiagorik sartu. Kalean erretzea ere debekatuta egongo da, bi metroko tartea bermatu ezin bada.

 ©ARITZ LOIOLA / FOKU

«Martxoko egun zailenetan PCRak orain bezala eginda, 6.000 kasu izango genituen»

Maite Asensio Lozano

Pandemiaren jarraipena egiten ari den lantaldeari esker COVID-19aren transmisioa moteldu egin dela uste du Ignacio Garitano epidemiologoak. Bigarren olatua iritsi dela berretsi du, baina orain askoz positibo gehiago detektatzen direla nabarmendu du.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna