Indarkeria Matxistaren Aurkako Eguna. Elkarrizketa. Emilie Pelissier. Prefeturako Berdintasun Saileko ordezkaria

«Urtean 150.000 euro bideratzen ditut biktimen babeserako»

Pirinio Atlantikoetako Departamenduko Prefeturako funtzionarioa da Pelissier. Iparraldean emakumeek jasaten duten bortizkeriari aurre egiteko lanean ari diren egitasmo instituzionalak koordinatzen ditu.
BERRIA Tamaina handiagoan ikusi

Oihana Teyseyre Koskarat -

2020ko azaroak 22

Itxialdi betean hartu zuen postua Emilie Pelissierek (1985, Marseilla, Okzitania). Pirinio Atlantikoetako Departamenduko Prefeturako Berdintasun Saileko arduraduna da, eta Emakumeen Eskubideen Frantziako Ministerioko ordezkaria. Ipar Euskal Herrian indarkeria matxistari aurre egiteko egitasmoez aritu da; eta egoera sanitarioak baldintzaturiko urtearen bilana egin du.

Zein dira zure eginkizunak Pirino Atlantikoetako Departamenduko Prefeturan?

Bi arlo nagusitan egiten dut lan. Lehenik, emakumeen aurkako bortizkeriaren arloan, indarkeriaren inguruko egitasmo bat sortu genuen, hiru ardatzetan oinarrituz. Indarkeria jasaten duten emakumeen harrera eta jarraipena egiten duten elkarteak koordinatzen ditugu: badira, alde batetik, eguneko harrera zentroak, eta, bestetik, larrialdiko aterpetze egitasmoak. Tokiko sareen eta instituzioen arteko lotura ere egiten dut, elkarteek, herri elkargoek eta herriko etxeek plantan ezartzen dituzten berdintasu-nerako kanpainen segipena eginez.

Frantziako Estatuak indarkeria matxistaren aurka plantan ezarri dituen egitasmoak nola gauzatzen dira Ipar Euskal Herrian?

Indarkeria Behaketa egitasmoa jarri dugu martxan [estatu osoan]. Horren barruan badira sentsibilizazio kanpainak: osasun langileentzat, polizientzat eta jendarmeentzat, ikasleentzat... Biktimentzako harrera guneak ere baditugu: Iparraldean Atherbea gizarte eragileak kudeatzen ditu. Etxean bikote indarkeria jasaten duten emazteak hartzen dituzte hor, bakarrik nahiz haurrekin. Batzuetan urgentziaz eskapatzen dira etxetik, eta eguneko harrera guneak ahalbidetzen die pausatzea, dutxa bat hartzea, jatea... Epe luzeari begira, Bideratze eta Entzute Zentroa dago, eta, behar izatekotan, beste eragile batzuengana bideratzen dituzte biktimak.

Frantziako Poliziarekin eta Jendarmeriarekin nola egiten duzue harremana?

Indarkeria Behaketaren parte dira beste eragile eta elkarteak bezala. Poliziek eta jendarmeek ere parte hartzen dute egiten ditugun bilkuretan. Usu mahai teknikoak egiten ditugu, elkarteek tratatzen dituzten kasuekin lotura egin dezaten. Bestalde, Herritartasunerako eta Justiziarako Zentroa ere eragileetariko bat da; biktimen harreran berezituak dira, eta permanentziak egiten dituzte polizia etxeetan, lanpostu erdi bat dedikatzen baitute horretara.

Prefeturak 40.000 euro finantzatzen ditu urtean, polizia etxeetan eta jendarmerietan biktimen harrera egiteko gizarte langileak kontratatzeko. Horrek modua ematen du toki horietan biktimak gizarte langile batengana igortzeko. Poliziak eta jendarmeak lehen harrera egiteko formatuak dira, eta gizarte langileengana bideratzeko ere bai.

Bilanak ere egiten ditugu salaketen prozedurei buruz: biktimen harreratik hasita, jarraipena ere nolakoa izan den behatzen dugu Baionako prokuradorearekin harremanetan.

Urtea pasatu da Frantziako Estatuak Bikote Indarkeriari buruzko Eztabaida abiatu zuenetik. Zertan da?

2019ko irailaren 3an abiatu zuen Grenelle-a [Frantziako] gobernuak. Oroitarazi behar da 46 neurri bazirela, eta horietarik 23 bete ditugu Frantziako Estatuko mailan. Ezin dira neurri guztiak aipatu, baina, adibidez, arriskua neurtzeko gida sortu genuen, polizientzat eta jendarmeentzat. Indarkeria matxistaren biktimei harrera egiten dietenean beraz, badute gida hori, arrisku maila ebaluatu ahal izateko. Aterpetze lekuak ere emendatu ditugu, epe luzerako zein larrialdirako.

Elkarte feministek emekiegi doala esan dute, eta finantzaketa ere eskasa dela salatua dute.

Noski, neurri horiek guztiak plantan jartzeko finantzaketa handiagoa beharko genuke; beti gehiago beharko genuke biktima guziak kontuan hartzeko. Halere, ideia bat egiteko, Ipar Euskal Herrirako 216.000 euroko buxeta ezartzen du Frantziako Estatuak larrialdiko aterpetzeetarako. Bestalde, nire urteko diru poltsa 160.000 eurokoa da, eta 150.000 euro bideratzen ditut indarkeria matxista jasaten duten emakumeen babesteko, departamendu osorako. Buxeta handiak dira, eta 2020.urtean 20.000 euroz emendatu da.

Biktimen harrerarako 3919 telefono zenbakiko ordutegia hedatzeko, lan merkatu publiko bat ireki nahi du Frantziak. Pribatizaziorako arriskua ikusten dute batzuek hor.

3919 telefono zenbakia indarkeria jasaten duten emakumeak entzuteko eta bideratzeko plataformarena da. Momentuz, astean 09:00etatik 22:00ak arte funtzionatzen du, eta asteburuetan 09:00etatik 18:00etara. Ordutegia eguneko 24 orduetara zabaldu nahi du Frantziako Estatuak, baina bada tentsio bat gai horren inguruan, lan deialdi publiko bat abiarazi nahi duelako. Hala da, bai; baina helburua da ordutegia hedatzea. Estatuarentzat betebehar juridiko bat da. Gainera, orain arte kudeatu duen Frantziako Elkartasun Federazioak aukera guziak ditu deialdia irabazteko. Dena dela, baldintza agiria biziki zorrotza izanen da. Entzuten dut elkarteen haserrea, baina ez dute zalantzarik izan behar: berezko baldintza biktimak laguntzea izanen da.

Pandemian, zein dira indarkeria matxistaren biktimentzako ezarritako baliabide bereziak?

Martxoko itxialdian komunikazioa landu genuen batez ere. Gure sareko larrialdi zenbakiekin komunikazio kanpainak egin genituen, lehentasuna biktimengana iristea baitzen. 114 zenbakia ere ezarri zuen plantan [Frantziako] Estatuak mezuz bidaltzen ahal delako alerta. Konfinamendu denboran ez da beti posible biktimarentzat telefonoz hitz egitea. Bestalde farmazietan Maskara 19 kodea zabaldu zen, alerta gisara: dakigunez , ez da seinalatzerik gertatu, lehen konfinamendu garaian bederen. Ideia da ahal bezainbat toki eskaintzea biktimari. Bestalde, supermerkatuetan harrera guneak plantatu dituzte elkarteek, prefeturarekin partaidetzan. Egitasmo horrekin segitzen dugu, eta Iparraldeko beste toki batzuetan ere badaude orain: Donibane Lohizunen, Angelun [Lapurdi] eta Donibane Garazin. UVIE Baionako ospitaleko biktimologia zentroa ere irekia da, eta oso ongi funtzionatzen du.

Urte hasieratik itxialdia, arintze neurriak eta berriro ere itxialdia ezarri ditu gobernuak Iparraldean. Zer bilakaera izan du indarkeria matxistak osasun krisian?

Aurreikusten genuen itxialdi garaian indarkeria handituko zela; baina dauzkagun datuen arabera konfinamendua arintzeak ditu ekarri identifikatu ditugun kasu gehienak. Bigarren itxialdi honetan prebentzioa lantzen ari gara, egoera errepikatzea eragozteko, eta permanentziak biderkatu ditugu.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Bezeroak Baionako Orbe karrikako erakusleiho bati begira, atzo. ©BOB EMDE

Dendak zabalik, eta gainezka

Oihana Teyseyre Koskarat

Hilabetez hetsirik egon ondoan, dendak ireki dituzte berriz Iparraldean. Gelditurik jarraitzen duten sektoreek protesta egin dute

 ©JAIZKI FONTANEDA / @FOKU

Parlamentuak, 'ahogeldo'

Lander Muñagorri Garmendia

Nafarroako Parlamentuan eta Eusko Legebiltzarrean ostegunean egin zituzten osoko bilkuretan euskara zenbat erabili zen neurtu du BERRIAk. Bi ganberen artean, hitz egindako hamar minututik bitan baino ez ziren aritu euskaraz.

Birusa atzemateko antigeno testak, Zarauzko (Gipuzkoa) osasun etxean. ©Gorka Rubio / Foku

580 positibo atzeman dituzte Hegoaldean, urriaren 5etik erregistratutako gutxien

Berria

Osakidetzaren eta Osasunbidearen artean 10.637 proba egin zituzten atzo.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna