Aita Mari erreskate ontziak Mediterraneo itsasoan erreskatatutako 112 migratzaileek badute non lur hartu. Lehorreratzeko portu seguru bat eskatzen ari zen ontzia premiaz, eta egunak eman ditu baimena erdietsi nahian. Atzo arratsaldean iritsi zen baimena: Siziliako Augusta portuak eman die aukera. Gaur goizean porturatuko dira.
Orain dela bederatzi egun abiatu zuten azken operazioa, eta 112 migratzaile erreskatatu dituzte guztira ordutik. Ostiralean hartu zituzten azkenak; 45 lagun.
Non porturatu ez zutenez gero, etsipenez, ontzian ziren zenbait migratzailek gose greba hasi zuten asteartean.
Tentsioa, gora
Tentsioa areagotzen ari zen ontzian. Hala ohartarazi zion atzo Izaskun Arriaran Itsas Salbamendu Humanitarioko presidenteak Efe berri agentziari: «Ez du zentzurik trabesia luzea pairatu duten pertsona hauen sufrimendua areagotzeak». Gehitu zuen atzo goizean ontzian zeuden zenbait migratzaileren artean «gaizki-ulertuak eta tentsio uneak» izan zirela: «Tripulazioa lan handia egiten ari da egoera horiek kontrolatzeko eta lasaitasuna mantentzeko». Europako Batasunak migrazio politiketan duen ardura gogorarazi eta igarobide seguruak eskatu zituen.
Mediterranea gobernuz kanpokoerakundearen arabera, Aita Mari-z gain beste bi ontzi daude Mediterraneoan migratzaileak jasota, portu bila. Sea eye 4 ontziak 476 migratzaile jaso ditu itsas zabaletik, eta Sea Watch 4-k, 312. Italiako Gobernuaren datuen arabera, aurten ia 25.000 migratzaile iritsi dira jada Italiako kostara. Iaz, garaiotan, 19.200 zenbatu zituzten.
'Aita Mari' erreskate ontzia Sizilian porturatu ahal izango da gaur
112 migratzaile jaso zituen Mediterraneoan iragan astean, eta portu seguru bat eskatua zuen. Beste bi ontzi daude 800 migratzailerekin
Iruzkinak
Ez dago iruzkinik
Ordenatu
