HAUR ETA GAZTE LITERATURA. 'Fin barkua'

Apokalipsia

Idazlea: Andoni Olaetxea. Ilustratzailea: Maite Caballero. Argitaletxea: Erein.

2022ko azaroak 20

Tamaina handiko album ilustratua da (31x22 cm), azal gogorretan bildua eta kartoi mehezko orriak dituena.

Azkenaldi honetan puri-purian dagoen giro apokaliptikoarekin bat eginez, Fin izeneko barkuaren azken itsasaldia kontatzen zaigu.

Arrantza xede berezia du barkuak, «munduko itsaso guztien zentrora» joango baita, «munduko ur guztiaren iturria» dagoen lekura; baldekadaz baldekada «ura jaso eta gordetzen dute bodegan», munduko ozeanoak lehortu arte.

Testu oso gutxi du, ilustrazioaren gainean ezarria, gutxien molestatuko duen lekua hartuz, batzuetan lortzen ez dena, hainbatetan kalte egiten baitio irudiari. Esaldi laburrak dira, eskematikoak, aditza aurreratuta eta galdegaia atzeratuta dutenak, karga sinbolikoa erantsi nahian hitzei, tonu dramatikoarekin.

Ilustrazioak handiak dira, orri-bikoak hartzen dituzte, plano orokorrak eta hurbilekoak txandakatuz. Istorioak duen dramatismoari jarraiki, kolore ilunak nagusitzen dira, belzkarak, eta baita gorri eta horail zikinak ere. Berdea da kontrasterako kolorea.

Pertsonaien bisaiak arrotzak egin zaizkit, gainerako irudiekin ezkongaitzak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Izan BERRIAlaguna