Bizitzaren alde, berriro, jubilatuok kalera

Joxe Iriarte 'Bikila' - Alternatibako kidea eta pentsioduna

2020ko abenduak 5

Alain Krivine lagun zaharrak esan berri du 68ko belaunaldia fisikoki zein politikoki hila dagoela, baina bere horretan irauten dutenek badutela oraindik borrokan jarraitzeko grinarik, baita belaunaldi berriekin txertatzeko zioa ere. Bat egiten dut iritzi horrekin.

Orain dela urte bi zendu zen Stephen Hawking-ek askotan adierazi zuen ez ziola beldurrik herioari; alabaina, bizitzea merezi zuela eta ez zuela presarik hiltzeko.

Irakurle arruntek, segur aski, Krivine eta Hawking-en artean ez dute antzemango loturarik edo antzekotasun handirik. Bata, gauchista petoa, 68ko Parisko maiatzean bere une loriatsuena bizitakoa, eta ondorengo borroka internazionalistaren eremu gutxituan askorentzat ispilu izandakoa; bestea, arrakasta handiko zientzialaria, denboraren joan-etorrian fisikoki ahultzen zihoan heinean, intelektualki handitzen joan zena, mundu osoa aho bete hortz utziz.

Biak ala biak Prometeoren oinordekoak, iraultzaile petoak fisikan zein politikan. Unibertsoa zein mundua beste modu batera ulertzera engaiatuak, eta egoera okerrenean ere bizitzea merezi duela sinesgarri egin dutenak.

Krivinek bere bizitza osoan denbora gutxi egin du kartzelan; halaz ere, bizitza osoa ziega ilunetan gatibu izan zen August Blanqui-ren oinordekotzat du bere burua. Hawking-i gorputza bihurtu zitzaion kartzela. Batak zein besteak adimen irudimentsuari esker gainditu zituzten ezintasunaren mugak, gizaki askeak bihurtuz.

Biak ateoak, gainera. Bata, marxista materialista; bestea, «ez dago zerurik edo beste bizitzarik ordenagailu apurtuentzat» adierazi zuen zientzialaria.

Biak ere gizarte justuago baten aldekoak. Communard iraultzailea, Parisko Komunaren eta Manifestu komunista-ren jarraitzailea bata; bestea, «denek izan dezakete luxuz beteriko bizitza bat makinek sorturiko aberastasuna banatzen bada, edo gehienek miseria gorrian amai dezakete makinen jabeek lortzen badute aberastasunaren banaketa zapuztea», halako manifestu iraultzailea egiteko gai izan zena.

Eta egunotan heriotzatik bizitzatik baino hurbilago gauden milaka eta milaka jubilatu kalera aterako gara gaur, abenduaren 5ean, Toledoko Itunaren alde kezkagarrien aurka, bizi garen artean duintasunez bizi nahi dugula adieraziz.

Gora gu eta gutarrak, jubilatu martxosoak!

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna