Maiatzaren 17a gogoan

Pamiela etxeak orain baino lehen argitaratu izan ditu genero estereotipoez hausnartzen duten liburuak. Gure kritiken txoko honetan, adibidez, aztertu genituen argitaletxe nafarraren Tango iritsita hiru dira eta Adela Turin idazle feministaren Arrosa eta leuna.

Euskal egileen artean plazaratu izan da gaia, esaterako Marimutila naiz, eta zer? (Ana Jaka, Elkar, 2016), Markos kantinera (Patxi Zubizarreta, Elkar, 2008), Inurri bitxia (Mariasun Landa, Erein, 2004) edota Anttoni Bill oesteko bandidoa (Pello Añorga, Elkar, 1987) liburuetan, ezarritako estereotipoei adorez aurre egiten dieten protagonistekin.

Tradizio horren barruan kokatu behar dugu Oliver Button poxpolin bat da. Album ilustratu tamaina handiko hau Adela Turinen album feministen garaikoa da (1970eko hamarkada), eta bertuteak zein hutsuneak partekatzen dituzte; teknika literarioan luzimendu askorik ez badute ere, aldarrikapen mezu zuzenak plazaratzeko obra eraginkorrak dira, haurrek atseginez irakurtzeko modukoak.