Herriko bozak Ipar Euskal Herrian. Biharamuna. Filipe Aramendi. Urruñako auzapeza

«Jendea aspertua zen kudeatzeko manera horrekin»

ISABELLE MIQUELESTORENA Tamaina handiagoan ikusi

Ekhi Erremundegi Beloki -

2020ko ekainak 30

Urruñako (Lapurdi) auzapeza izanen da Filipe Aramendi (1968, Urruña) ondoko sei urteetarako. Zerrenda zabal baten buru aurkeztu da herriko bozetara, eta hori izan da, haren iritziz, irabaztera eraman duena.

Sorpresa izan da irabaztea?

Sorpresa ez arrunt. Jadaneko lehen itzulian seinalea helarazia zuten urruñarrek. Bigarren itzuliko kanpaina berezia izan da, bilkura publikorik gabe. Baina atez ate ibiltzen ginelarik, sentitzen genuen kanbiamendu nahikari azkar bat. Hala ere, zalantza genuen, bai baikenekien Gavilanen zerrenda ari zela ahal zuen guzia egiten. Sorpresa ez da izan irabaztea, baina ez nuen pentsatzen hainbesteko emaitza eginen genuenik bigarren itzulian.

Abstentzio handia izan da berriz. Nola esplikatzen duzu?

Bada oraindik koronabirusaren arazoa. Jendea ez da oraindik arrunt lasaitua. Beharbada, hiru hilabete horiek pasatuta, aspertze bat ere izan da. Ez dakit, egia erran. Urruñan %40ko abstentzioa izan da; handia da, bereziki herriko bozetarako. Baina hobekuntza izan da lehen itzulitik.

2014an gutigatik irabazi zuen Odile de Coralek. Zer aldatu da sei urtean?

Jendea aspertua zen kudeatzeko manera horrekin: herritarrak ez ziren entzunak. Herriko etxe barnean ere hainbat arazo izan dira langileekin: ez ziren entzunak. Eta nik pentsatzen dut zerrenda irekiaren ondorioa ere badela hor. 2014an abertzale zerrenda zen; hor, irekiduraren parioa egin dugu. Zerrenda horretan sartu ditugu hainbat herritar ez zirenak politikoki ezagutuak, baina ezagunak zirenak herrian hainbat elkartetan lan egiten baitute, eta herriaren ekonomian parte hartzen baitute. Uste dut horrek esplikatzen duela emaitza on hori. Eta, gero, erranen nuke gure programak ere eragin duela. Ez badugu trantsizio ekologikoari buruzko birakoa hartzen, paretaren kontra goaz.

Zer izanen da Urruñan hartuko duzuen lehen neurria?

Ez dakit lehen neurria izanen den, baina lehentasuna izanen da gure barazkigune proiektua sortzea. Gure herrian baditugu laborantza lur batzuk herriaren jabetzan direnak. Horiek baliatu nahi ditugu barazkiak landatzeko, eta gure herriko eskoletako jantegiak, zahar etxea, zentro soziala eta abar hornitzeko. Ikusi dugu konfinamendu garaian zinez eskaera handia zela herritarren partetik. Beraz, uste dut lehentasun hori izanen dugula.

Hego Lapurdin, ezkertiar eta abertzaleak gehiengoan izanen dira kasik herri guzietan. Elkarlanean arituko zarete?

Espero dut baietz. Ez gara oraindik bildu, baina, nire ustez, beharrezkoa izanen da. Hego Lapurdiko lurralde eremuan zinezko pisu politikoa izanen dugu. Hendaia, Biriatu, Urruña, Ziburu, Senpere, eta horiei franko erraz lotzen ahal dira nire ustez Sara eta Ainhoa, auzapezak gure nahiko hurbil ibilki baitira. Hori baliatu behar dugu.

Zer eragin izan dezakete Hego Lapurdiko emaitzek Ipar Euskal Herrian?

Uste dut ondorio politikoak izanen dituela; hala espero dut behintzat. Beste politika bat eramateko parada badugu, pisu politiko horrekin.

Zu joanen zara elkargora?

Bai. Gure zerrendak hiru hautetsi izanen ditu hirigune elkargoan, eta oposizioak bat. Horrez gain, beste hiru hautetsi izendatu beharko ditugu Hego Lapurdiko lurralde polora joateko.

Zer lan egiteko?

Urruñatik badugu erronka nagusi bat. Kostalde honetako herri bakarra da, non oraindik badiren laborantza eta natura lurrak. Beraz, horiek absolutuki babestu behar ditugu. Jakinez ondoko urteetan lur-antolakuntza planak ez direla gehiago herrietan erabakiko, lurralde eremu handiago batean baizik, nire ustez badugu herri gisa zer ekarria. Jakinez gure inguruan gehiena eraiki dutela, hirigintza arauak errespetatu nahi baditugu, Urruñarentzat aukera bat izan daiteke.

Lehendakaria hautatzeko bozkatu beharko duzu.

Ez dakit oraindik nor aurkeztuko den ere. Entzuten dut batzuek gogoa dutela. Ikusi beharko da. Pentsatzen dut EH Bairen barnean gauza horiek eztabaidatu beharko ditugula ondoko egunetan. Ikusita zein den orain abertzale eta ezkertiarren pisu politikoa, horren gibelean hautagaitza bat gutxienez aurkeztu beharko litzateke.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Bi erizain, Galdakaoko ospitalean (Bizkaia) maiatzaren 6an, 55 egun gaixorik zeramatzan gizon bat sendatu zela ospatzen. ©ANDONI LUBAKI / FOKU

Koronabirusaren lehen kolpea Euskal Herrian: 2.152 hildako lau hilabetean

Mikel P. Ansa

Martxoaren 1etik ekainaren 30era, lau hilabete. Neguaren azken hondarra, eta udaberri guztia. Koronabirusaren pandemiak hankaz gora jarri du Euskal Herria, eta bizimoduak astindu ditu. Pandemiaren lehen olatuaren balantzea egin du BERRIAk, hamazazpi grafiko eta hamazazpi galdera hauekin.

Osasun langile bat pertsona bati PCR proba egiten, herenegun, Ordizian. ©Jon Urbe / Foku

58 dira Ordiziako agerraldiarekin lotutako kasuak

Iosu Alberdi - Irati Urdalleta Lete

Positibo emandakoek ezingo dute bozkatu Ordizian. Bai, ordea, haien kontaktu zuzenek. Araban beste foku bat izan den ikertzen ari da Osasun Saila, azken orduetan bederatzi kasu atzeman ostean.

Nafarroako Gobernuko Osasun kontseilari Santos Indurain. ©Jesus Diges / Efe

23 positibo detektatu dituzte Tuterako agerraldian

Igor Susaeta

Beste agerraldi bat gertatu da Iruñean, eta bost pertsona kutsatuta daudela baieztatu dute

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna