Albistea entzun

Espainiako Vuelta. Gotzon Martin. Euskaltel-Euskadiko ziklista

«Beldurrik ez daukadala uste dut, baina hori Vueltan bertan ikusiko dut»

JUANJO OTAZU Tamaina handiagoan ikusi

Beñat Mujika Telleria -

2022ko abuztuak 19

Inor gutxik esperoko zuen maiatzean Gotzon Martin (Orozko, Bizkaia, 1996) Espainiako Vueltan izatea. Erori eta larri zauritu zen, bakarka entrenatzen ari zela, eta oso denbora gutxiko prestaketa izan du ahalik eta sasoirik onenean iristeko. Bizkaitarra gogotsu dago itzuli handi batean bigarrenez parte hartzeko.

Euskaltelek gorriz markatua izaten du egutegiaren zati hau. Nola dago taldea, eta zein dira taldearen helburuak Vueltan?

Denboraldiaren bigarren erdia oso garrantzitsua da guretzat. Donostiako Klasikoa, Getxoko Zirkuitua, Burgosko Itzulia, Espainiako Vuelta... izen handiko lasterketa asko dira denbora laburrean. Helburua presentzia izatea da. Aurrean sartu nahi dugu, eta egunero borrokatu.

Aurten taldekako erlojupekoari egin beharko diozue aurre. Berezia da, ezta?

Ez da ohiko saioa, ez. Berezia da, eta ez dugu inoiz horrelako saiorik egin. Hala ere, prestatu dugu saioa, eta dena emango dugu.

Aurten bi etapa amaituko dira Euskal Herrian, eta beste bat hasi. Bereziki begiz joak ditu taldeak bi egun horiek?

Gurea bezalako talde batentzat etapa guztiek dute garrantzia, baina, bai, nola ez. Etxeko etapa guztiak izan ohi dira bereziak, batez ere gure zale asko errepide bazterretan izango direlako; bereziki egun ona izan nahi dugu. Ihesaldian egoten saiatuko gara, eta, indarrak edukiz gero, aurrean egotea saria izango da.

Bigarrenez arituko zara Vueltan. Zein da zure helburua?

Iaz egindakoarekin oso gustura gelditu nintzen, baina aurtengoa oso desberdina izango da, batez ere izandako prestaketagatik. Hala ere, iazko sentipenak berritzea helburu polita da niretzat. Garaipen bat edo postu on bat lortzea saria izango litzateke.

Hiru hilabete igaro dira erori eta larri zauritu zinenetik, eta jada bueltan zara. Zer moduz zaude?

Ondo nagoela uste dut. Orain dela pare bat hilabete ez nuen uste Espainiako Vueltan izango nintzenik; denbora gutxi izan dut prestatzeko, baina gogor egin dut lan. Ez nago iazko sasoi berean, baina esperientzia handiagoa daukat, eta espero dut egunetik egunera hobetzen joatea.

Nolakoa izan da prestaketa lesioari buelta eman eta Vueltara ondo iristeko?

Etxean egon naiz, eta denbora asko igaro dut bakarrik lanean. Taldearen laguntza guztiarekin, noski. Denboraz larri genbiltzan, baina ondo planifikatu dugu, eta ondo atera da dena. Oso pozik nago bertan egongo naizelako

Eroriko horrek beldurra sortu dizu tropelera itzultzeko orduan? Askotan esan ohi da horrelako eroriko baten ondoren ez direla jaitsierak lehen bezala egiten.

Beldurrik ez daukadala uste dut. Egia da orain arte egin ditudan lasterketetan ez diodala jaitsiera bihurri bati aurre egin behar izan. Baina horretarako ere prest nagoela uste dut, eta Vueltan bertan ikusiko dut beldurra daukadan edo ez.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jon Pacheco, Aritz Elustondo zoriontzen, hark Realaren bigarren gola sartu ondoren. ©DUMITRU DORU / EFE

Xeriff ere, girgilurik jarri ezinda

Jon Ander De la Hoz

Realak irabazi egin ditu Europa ligan jokatutako partida guztiak; azkena, Moldavian. Eskura du sailkatzea. Silvak eta Aritzek sartu dituzte golak
Moi Gomez, baloiarekin, Rayoren aurkako partidan. Aimar Oroz ageri da hari begira. ©JAGOBA MANTEROLA / FOKU

Aldaera berri bat gehitu du

Iñaki Berastegi

Jagoba Arrasate joko landuaren alde egiten ari da. Moi Gomez eta Aimar funtsezkoak izan dira estilo berria txertatzeko. Osasunak Valentzia hartuko du gaur gauean Sadarren.
 ©BERRIA

Pizgarri eta aukera

Julen Etxeberria

Danel Elezkano eta Iñaki Artola elkarren aurka ariko dira gaur Villabona-Amasan, lau eta erdikoaren final-zortzirenetan. Biek esan dute «nahi baino partida gutxiago» jokatu dituztela udan, baina «esperientziak» lagundu diela egoerara egokitzen.
Aritz Elustondo eta Jon Pacheco, beasaindarraren gola ospatzen. ©DUMITRU DORU / EFE.

Xeriff ere, girgilurik jarri ezinda

Jon Ander De la Hoz

Realak irabazi egin ditu Europa ligan jokatutako partida guztiak, Moldavian gailenduta. Eskura du multzoen fasea gainditzea, Silvak eta Aritzek egindako golei esker.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...