«Hari ikusezinen» ekarpena, argitara

Emakumeek kartzelarekin eta bakegintzarekin lotuta dauzkaten bizipenak eta ekarpenak jasotzeko konpromisoa hartu du Sare plataformak, eta urrats bat egin zuen atzo, Bilbon: Emakumea, espetxea, gatazkak, elkarbizitza eta bakea ekitaldia egin zuen —irudian—, manifestazioaren aurretik. Andrazkoek egindako lan ikusezina nabarmendu zuten; lehenik, poema musikatu batean, eta, gero, Arantza Aldezabalen hitzetan: «Zer litzateke hau guztia ari ziren eta haria diren andre horiek gabe? Zein garrantzitsua jostun horien lana, askotan isilpekoa, gehienetan aitortu gabea. Memoriaren jostunak dira, eguneroko erresistentziarenak».