Eusko Legebiltzarreko Diputazio Iraunkorrean mintzatu zen atzo goizean Iñigo Urkullu Eusko Jaurlaritzako lehendakaria. Saioan, Urkulluk nabarmendu zuen Euskal Autonomia Erkidegoak ondo betetzen dituela datorren astelehenean itxialditik irteteko 1. fasera igarotzeko irizpideak.
Horretarako, hamar adierazle zerrendatu zituen, eta azaldu nola dagoen osasun sistema horiei erantzuteko; besteak beste, Araban, Bizkaian eta Gipuzkoan zainketa intentsiboetako unitateetako 620 ohe izan ditzakete bost eguneko epean; 2,8 pertsonarentzako oheak 10.000 biztanleko, alegia. Era berean, Osakidetzak eginiko PCR testak 40.000 dira milioi bat biztanleko; «estatuko kopururik handienetan bigarrena». Urkulluk gaineratu zuen Jaurlaritzak badituela nahikoa proba datozen 14 egunetan egiten jarraitzeko.
Gainera, hiru herrialdeetan, gaitza duen pertsona bakoitzak kutsatutakoen tasa 1etik beherakoa da; 0,75 Bizkaian, 0,67 Araban eta 0,58 Gipuzkoan. Hortaz, «osasun sistemaren ikuspegitik, egoera kontrolpean» du Jaurlaritzak, Urkulluren esanetan.
Lurralde osoa, ez probintzia
Jaurlaritzak Eusko Legebiltzarrari eta Espainiako Osasun Ministerioari igorri zien fase aldaketa justifikatzeko txostena, eta, bertan, argudiatu zuen zergatik hartu behar den aintzat Euskal Autonomia Erkidegoa ebaluazio esparru gisa, eta ez probintzia. Besteak beste, Jaurlaritzak azaldu du eremu geografikoa txikia dela; herrialdeen arteko garraiobide onak dituela eta horrek erraztu egiten duela mugikortasuna.
Eusko Legebiltzarreko hauteskundeei dagokienez, «ardura hutsagatik» bozez hitz egiteko garaia dela nabarmendu zuen Urkulluk: «Hauteskunderik eta legebiltzar berririk ez badago, ezin da legerik onartu».
Koronabirusa
Urkullu: «Osasun sistemari dagokionez, Jaurlaritzak kontrolpean du egoera»
Jaurlaritzak eskatu du EAE izatea fase aldaketaren balorazioa egiteko esparrua. Bozez hitz egiteko garaia dela nabarmendu du lehendakariak
Iruzkinak
Ez dago iruzkinik
Ordenatu