«Eremu publikoa maskulinizatuta dago, gizonek okupatuta, ordezkatuta, pentsatuta eta antolatuta». Epaimahaikideen hitzok lehen lerrora ekarriz jakinarazi zuen Bingen Zupiria Eusko Jaurlaritzako Kultura sailburuak, atzo, Uxue Alberdiren Kontrako eztarritik lanak jasoko duela aurten saiakerako Euskadi saria. Eta, hain justu horregatik, hori kontuan hartuta, emakumeen mintzo publikoa mugatzen duten mekanismoak ikusgai jartzen egindako lanean ikusi dute sarirako merezimendua epaimahaikideek. Emakume bertsolarien bizipenak eta teoria feminista gurutzatzeko modua txalotu diote, batik bat.
«Ezinezkoa egiten tematzeagatik» erabaki du epaimahaiak, bestalde, itzulpengintzako Euskadi saria Idoia Santamariari banatzea. Ingeborg Bachmann austriarraren Aldibereko ipuin bilduma euskaraz jartzeagatik jasoko du aitortza. 1968-1972 artean idatzitako bost istoriok osatzen dute liburua, eta horiek gaurko irakurleari ekartzeko hartu dituen «erabaki ausartak» txalotu dizkiote. Santamariak gogora ekarri du «desordutan» egin ohi den jarduna izaten dela literatura itzultzea, eta aipatu liburu hau arratsaldero Vienara joateko aukera bat izan dela beretzat, idazlea ezagutzeko paradarekin batera. «Benetan bidaia oso-oso atsegina izan da».
Gaztelaniazko literaturako eta saiakerako Euskadi sariak ere jakinarazi zituzten atzo: hurrenez hurren, Aixa de la Cruzek eta Borja Barraguek jasoko dituzte, Cambiar de idea eta Larga vida a la socialdemocracia lanengatik.
Idazleen saria idazleei
Aurreko astean jakinarazi zituzten aurten saritutako beste hiru lanak: Karmele Jaio, Aitaren etxea-gatik (Euskarazko literaturako saria); Iñigo Astiz, Joemak eta Polasak liburuagatik (Euskarazko Haur eta Gazte literaturako saria); eta Miren Asiain Un millín de ostras en lo alto de la montaña lanagatik (Ilustrazioko saria). Horiek eta atzo jakinarazitako egileek azaroaren 19an jasoko dituzte sariak, Bilboko Azkuna zentroan.
Zerrenda osatuta, aurten nabarmendutako lan guztiek «gorputz bat» osatzen duela aipatu zuen Zupiriak, aurreko urteak utzitako «literatur lanen bilduma modura» funtzionatzen duena. «Denak dira bat, baina denak dira ezberdin, bakoitza bere atalean». Literaturak berez dituen generoen aniztasunaren isla dira banatutako sariak, Zupiriaren esanetan; baita idazleen pluraltasunaren isla ere. Epaimahaikideen lana ere azpimarratu eta eskertu du sailburuak: «Sari hauek badute ezaugarri bat, eta da idazleak direla idazleak saritzen dituztenak. Beraz, idazleek beste idazle batzuei egindako aitorpena da».
